Ababelenga Ino Magazini Balepusha Ukuti . . .

Bushe Ukwikala Umuyayaya mu Paradaise Kukalatendusha?

▪ Baibolo yatulaya ukutila kuti twaikala umuyayaya mu Paradaise pe sonde. (Amalumbo 37:29; Luka 23:43) Bushe ukwikala umuyayaya mu Paradaise kukalatendusha?

Ici cipusho icacindama sana. Abafwailisha pa fintu basanga ukuti ukumfwa icitendwe pa nshita ntali kuti kwalenga umuntu ukusakamikwa sana, kabili kuti alatontonkanya na pa kuipaya. Abashaishiba ico babela pano calo nelyo abatendwa ukubomba imilimo babomba cila bushiku kuti baba ne citendwe ica mutatakuya. Bushe abakalaikala mu Paradaise bakalaumfwa icitendwe? Bushe imilimo bakalabomba cila bushiku ikalabatendusha?

Ica kubalilapo ico mulingile ukwishiba ca kuti Yehova Lesa, uwalembele Baibolo, e watulaya umweo wa muyayaya. (Yohane 3:16; 2 Timote 3:16) Imibele yapulamo iya kwa Lesa kutemwa. (1 Yohane 4:8) Yehova alitutemwa nga nshi kabili alitupeela ne fintu fyonse ifisuma ifyo tuipakisha.—Yakobo 1:17.

Kabumba wesu alishiba ukuti pa kuti tube ne nsansa, tukabila ukulabomba imilimo iisuma. (Amalumbo 139:14-16; Lukala Milandu 3:12) Abakalaikala mu Paradaise tabakabe kwati maroboti. Bakalanonkelamo mu milimo bakalabomba kabili ikalanonsha na bo batemwa. (Esaya 65:22-24) Bushe kuti mwatendwa nga mulebomba incito iisuma cila bushiku?

Icalenga bubili ca kuti te muntu fye uuli onse uo Yehova Lesa akasuminisha ukuba mu Paradaise. Akapeela umweo wa muyayaya ku bantu fye abapashanya Umwana wakwe, Yesu. (Yohane 17:3) Ilyo Yesu ali pano calo, alitemenwe ukucita ukufwaya kwa kwa Wishi. Alesambilisha abasambi bakwe ukuti insansa shine shine shaba mu kupeela te mu kupokelela, kabili ifi fine e fyo alecita. (Imilimo 20:35) Bonse abakaba mu Paradaise bakalakonka amafunde yabili ayakalamba, e kutila, ukutemwa Lesa no kutemwa abanensu. (Mateo 22:36-40) Elenganyeni ifyo cingawama ukulaikala na bantu abamutemwa kabili abatemwa imilimo babomba! Bushe muletontonkanya ukutila kuti muleumfwa icitendwe nga muli na bantu ba musango yu?

Finshi fimbi abakalaikala mu Paradaise bakalacita? Cila bushiku tukalaishibilapo ifintu na fimbi pali Kabumba wesu. Muno nshiku, basayantisti balisanga ifintu ifingi ifyo Yehova abumba ifyo tushaishibe kale. (Abena Roma 1:20) Na lyo line, finono fye twaishiba pa fyo Yehova abumba. Imyaka iingi nga nshi iyapita, ilyo umuntu wa cishinka Yobo atontonkenye pa fyo aishibe pa fyo Lesa abumba, asangile ukuti finono fye aishibepo nge fi fine caba na kuli ifwe. Atile: “Utu nalanda tunono fye utwa micitile [ya kwa Lesa], kabili tumfwa fye ukutepelesha kwakwe! Lelo ukubuluma kwakwe ukwa maka nani engakwiluka?”—Yobo 26:14.

Nangu tukekale umuyayaya, tatwakatale atwishiba fyonse pali Yehova Lesa ne fyo abumba. Baibolo ilanda ukuti Lesa alibika inshita ya muyayaya mu mitima yesu. Lelo ilanda no kuti tatwakatale ‘atwiluka umulimo uo Lesa wa cine aabomba ukutula pa kutendeka no kufika ku mpela.’ (Lukala Milandu 3:10, 11) Bushe muletontonkanya ukuti mukalatendwa ukwishibilapo na fimbi pali Kabumba wenu?

Na pali ino ine nshita, abantu ababomba imilimo iyo bambi banonkelamo kabili iiletela Lesa umucinshi te lingi bomfwa icitendwe. Ukwabula no kutwishika, nga twatwalilila ukubomba imilimo ya musango yu, tatwakulaumfwa icitendwe pali ino nshita kabili tatwakaleumfwa icitendwe na lintu tukalaikala umuyayaya.

[Abatusuminishe Ukubomfya Ifikope pe bula 27]

Earth: Image Science and Analysis Laboratory, NASA-Johnson Space Center; Galaxy: The Hubble Heritage Team (AURA/STScI/NASA)