Abantu ba Mutende Baisosela Ifyo Basuminamo

ICISHIBISHO KU BENA RUSSIA: Ici cipande cili no kulenga abantu abengi nga nshi mu fyalo ukucila pali 230 ukwishiba ifyo Inte sha kwa Yehova mu Russia babekala pa nsambu bakwata isha kupepa. Ulupungu lwa kwa Kalinda e lupapulo bapilibula mu ndimi ishingi sana kabili lulasabankanishiwa mwi sonde lyonse. Ici cipande cili no kupilibulwa mu ndimi 188. Amakope ukucila pali 40 milioni yali no kupulintwa. Aba mu buteko bamo nalimo te kuti batemwe aba mu fyalo fimbi ukwishiba ifilecitikila ba Nte ba mu Russia. Lelo amashiwi Yesu alandile yakafikilishiwa, ayatila: “Takuli icafiswa icishakasokoloke, nangu ica mu bumfisolo icishakeshibikwe.”—LUKA 12:2.

MU December, 2009, na mu January 2010, ifilye fibili ifikalamba ifya mu Russia fyapingwile ukuti Inte sha kwa Yehova balaleta ifimfulunganya mu calo. Ica musango yu calicitikepo na kale. Ilyo ubuteko bwa Soviet Union bwaleteka mu Russia, ba Nte abengi balibabepeshe ukuti baleimina ubuteko. Balibakakile mu fifungo, balibabikile mu nkambi umo balebomba incito ya cibe e lyo bambi babatwele ku ncende imbi. Ilyo ubuteko bwa Soviet Union bwapwile, Inte sha kwa Yehova balibakakwile. Ubuteko bwakonkelepo bwatile Inte sha kwa Yehova bantu abasuma kabili tabemina ubuteko. * Nomba abantu bamo muno nshiku, balabepesha Inte sha kwa Yehova.

Ku kutendeka kwa mwaka wa 2009, aba mu buteko baimine Inte sha kwa Yehova. Mu February fye mweka, baloya ba buteko balifwailishe ifintu ifingi pa Nte sha kwa Yehova mu calo conse. Finshi balefwailisha? Balefwaya ukwishiba amafunde ayo balemona ukuti e yo Inte sha kwa Yehova baletoba. Mu myeshi yakonkelepo, bakapokola balesansa ba Nte nga balelongana mu Ng’anda ya Bufumu kabili balesansa na mayanda yabo. Balebapokolola impapulo ne fipe. Aba mu buteko balitamfishe ba loya abalelandilako Inte sha kwa Yehova kabili balibabindile no kubwelela mu calo.

Pa 5 October, 2009, ababomfi ba buteko ababombela pa mupaka waba mupepi na St. Petersburg balikeenye ukwingisha  impapulo sha Nte sha kwa Yehova mu Russia. Ishi mpapulo bashipulintile mu Germany kabili shali no kuya mu filonganino ifingi ifya mu Russia. Aba mu kabungwe ka mu Russia abashininkisha ukuti takuli ifipe ifileingila nelyo ukufuma mu calo mu bufufuntungu, bapikite mu mpapulo. Mulandu nshi? Balefwaya ukwishiba ifyalimo pantu kwali ifyalembwa babatumine umo balembele ukuti mu fipe fyaleisa “kuti mwaba impapulo ishingalenga ifimfulunganya mu mipepele.”

Tapakokwele, ukucusha Inte sha kwa Yehova kwalicililemo. Ifilye fikalamba fibili, ica Russian Federation ne ca mu Altay Republic (icitungu icaba mu Russia), fyapingwile ukuti impapulo shimo isha ba Nte, ukubikako na magazini ino ine mulebelenga, shilaleta ifimfulunganya mu calo. Inte sha kwa Yehova balitwele umulandu ku cilye na kabili, na ba mu fyalo fimbi na bo balibalandileko, lelo tapali ifya-alwike! Na ino ine nshita ubuteko mu Russia bwalibinda ukwingisha impapulo sha ba Nte mu calo nelyo ukushisabankanya.

Finshi ba Nte bacitapo pali ifi fyonse, pa fyo ubuteko bwabonawila ishina no kubinda umulimo wabo? E lyo kabili bushe ifi icilye capingula filanga cinshi pa buntungwa bwa mipepele ubwa bantu bonse aba mu Russia?

Ifyo Bacitile Ilyo Batendeke Ukubacusha

Pali Cisano, pa 26 February 2010, Inte sha kwa Yehova nalimo 160,000 mu Russia shatendeke ukusabankanya trakiti yaleti Could It Happen Again? A Question for the Citizens of Russia. (Bushe Kuti Cacitika na Kabili? Icipusho ico Abena Russia Balingile Ukutontonkanyapo) Iyi trakiti yali amakope 12 milioni. Ku ca kumwenako, mu musumba wa Usol’ye-Sibirskoye uwaba mu citungu ca Siberia, ba Nte nalimo 400 baile mu misebo ne nshita ya 05:30 hrs no kutendeka ukupeela abantu iyi trakiti. Bamo pali aba ni balya bafumishe ku fitungu fimbi ifya Russia no kubaleta mu Siberia mu 1951 pa mulandu wa fyo basuminemo. Nangu ca kuti kwalitalele nga nshi ukufika kuli -40°C., baliile mu misebo ku kupeela abantu amatrakiti 20,000 ayo babapeele.

Ba Nte baliteekeshe miting’i mu Moscow, umusumba ukalamba uwa Russia, ukwasangilwe na bakalemba we lyashi. Pali iyi miting’i, epo balandile ukuti nabatendeka kampeni ya nshiku shitatu iya kupeela abantu trakiti. Pa bo baitileko, abalandilepo ni ba Lev Levinson, abaishiba sana amafunde, abafumine ku kabungwe ka Human Rights Institute. (Akabungwe Akalolekesha pa Nsambu sha Bekala Calo) Balandile pa fyo ubuteko bwa Nazi mu Germany no buteko bwa mu Soviet Union bwacushishe Inte sha kwa Yehova na pa fyo bakateka bakonkelepo baishilefumya ba Nte mu fifungo. Balandile no  kuti: “Aba mu mipepele yonse abo balecusha mu Soviet Union balibapeele ubuntungwa bwa kupepa kuli Presidenti Yeltsin. Kabili fyonse ifyo babapokele bali no kubabwesesha. Ilyo Russia yali Soviet Union, ba Nte tabakwetemo ifikuulwa ifyo bali no kubabwesesha, lelo umuseebanya babikile pe shina lyabo walipwile.”

Abantu balitampa ukucusha Inte sha kwa Yehova na kabili. Ba Levinson batile: “Mu calo umo basosele ukuti ba Nte tabakwete umulandu, e mo balebacusha nga nshi na kabili.”

Abantu Balitemenwe Ifyalembelwe Muli Trakiti

Bushe iyi kampeni ya kupeela abantu trakiti yalibombele ukulingana ne fyo balefwaya? Ba Levinson batile: “Ilyo nacilaya ku miting’i nacimona abantu pa citesheni ce shitima nabekala balebelenga akapepala ako ba Nte bacibapeela. . . . Abantu nabekala balekabelenga kabili nabapoosako sana amano pa kukabelenga.” * Ku ca kumwenako, umfweni ifyo bamo balandile pali iyi trakiti.

Nakulubantu umo uwikala mu ncende ya mu Russia umwafula sana abaShilamu alipokeleko iyi trakiti kabili aipwishe ifyo balembelemo. Ilyo bamwebele ukuti trakiti yalelanda pa nsambu no buntungwa bwa bantu ba mu Russia, alandile ukuti: “Cawama ukuti bamo balandapo pali ili lyashi! Icalo ca Russia cili fye kwati ni lilya cali Soviet Union. Natasha sana, mwabombeni!”

Umwanakashi umbi uo bapeeleko trakiti mu Chelyabinsk atile: “Nabampeelako kale iyi trakiti kabili ninjibelenga. Na ine ndi ku lubali lwenu. Takwaba imipepele iingaisosela ifyo yasuminamo mu nshila iisuma nge fyo mulecita. Nalitemwa ifyo mufwala, kabili lyonse fye mucita ifintu mano mano. Naci-ilanga apabuuta ukuti mwalicetekela sana ifyo mwasuminamo.  Ndemona kwati Lesa aba na imwe.”

Umwaume umo mu St. Petersburg uwalandile ukuti alipokeleko iyi trakiti balimwipwishe nga ca kutila alitemenwe ifyo abelengelemo. Atile: “Nimfitemwa. Ilyo nacilabelenga, nacumfwa ububi ica kuti nacilila no kulila. Bamama balibekele pa nsambu [mu Soviet Union] kabili balinshimikile ifintu ifingi pa bo babakakile nabo. Abengi bali fipondo, lelo kwali na bamo aba kaele abo bakakile pa mulandu wa fyo basuminemo. Ndemona ukuti umuntu uuli onse afwile ukwishiba ifi fyacitike, kanshi umulimo mulebomba usuma sana.”

Bushe Ifintu Fikaba Shani mu Russia?

Inte sha kwa Yehova mu Russia bali-ipakishe ubuntungwa bakwete imyaka 20 iyapita. Na lyo line, balimona ifyo ifintu fya-aluka mu nshita fye iinono. Te kuti twishibe nampo nga ifi abantu batendeke ukubifya ishina lya ba Nte fili no kulenga ukuti bakabapoke ubuntungwa bwa kupepa na kabili.

Te mulandu ne fikacitika ku ntanshi, Inte sha kwa Yehova bapampamina pa kutwalilila ukushimikila imbila nsuma iya mutende kabili iipeela isubilo. Iyi trakiti yalisupula ico bapampaminapo mu mashiwi ya kuti: “Nangu batwikale pa nsambu tatwakaleke ukulanda pali Yehova Lesa ne fyaba mu Cebo cakwe, Baibolo, mu mucinshi kabili mu mucenjelo. (1 Petro 3:15) Tatwalekele ilyo abaNazi mu Germany baletucusha, tatwalekele na lilya batwikele pa nsambu muli cino calo, kabili tatwakabale atuleka.—Imilimo 4:18-20.”

[Amafutunoti]

[Amashiwi pe bula 20]

Ba Vladimir Litvin (abali ne myaka 81) babasendele ku Krasnoyarskiy Kray ilyo bali ne myaka 14. Pali Cisano lucelocelo, e batungulwile ibumba lya Nte sha kwa Yehova ilyo kampeni ya kupeela abantu trakiti yaibela yatendeke

[Amashiwi pe bula 21]

Ba Nikolay Yasinskiy (abali ne myaka 73) balitemenwe nga nshi ukubombako uyu mulimo wa kushiila abantu iyi trakiti. Baipwishe ukuti, “Bushe cine cine bakatendeka ukutucusha na kabili no kutupoka ubuntungwa bwa kupepa Yehova?”

[Amashiwi pe bula 21]

Ba Stepan Levitsky (abali ne myaka 85) na bena mwabo ba Yelena. Ba Stepan babakakile imyaka 10 pa mulandu wa kubasanga na magazini imo fye iya Ulupungu lwa kwa Kalinda

[Akabokoshi pe bula 19]

 Ifipepala fya Kubeshibisha Ukuti Bantu Abasuma

Ba Nte abo balekelesheko ukufumya mu cifungo mu buteko bwa Soviet Union babafumishe mu 1990. Ba Nte abengi nga nshi balitemenwe icine cine pantu umuseebanya walifumine pe shina lyabo, balibapeele ifipepala fyalelangilila ukuti tabali “balwani ba buteko,” lelo bali ba kaele. Ifi fipepala babapeele fyalilenga abantu ukwishiba ukuti Inte sha kwa Yehova bantu abasuma.

[Akabokoshi ne Cikope pe bula 19]

Bushe Muletontonkanya Ukuti Ishi Mpapulo Shalibipa?

Pa mpapulo sha Nte sha kwa Yehova isho icilye ca Russian Federation Supreme Court catile shalibipa paba ne shi:

▪ Icitabo Candi ca Malyashi ya mu Baibolo * (icili pa muulu)

▪ Palameni Kuli Yehova

▪ Life—How Did It Get Here? By Evolution or by Creation?

▪ Ukusapika Lesa Ukwa Mutundu wa Muntu *

▪ Ifipusho Abacaice Bepusha —Ifyasuko Fibomba, Ibuuku 1 *

▪ Bushe Cinshi Baibolo Isambilisha? *

Ifi fitabo filenga abantu ukucindika Lesa ne Cebo cakwe, Baibolo. Fikoselesha abantu ukuba na mano no kubebeta ifyo balebasambilisha pa kuti bamone nga fya cine. Bushe muletontonkanya ukuti bafwile ukubinda impapulo sha musango yu?

[Amafutunoti]

[Akabokoshi ne Cikope pe bula 20]

Ubukombe bwa Maka

Trakiti ya kuti Could It Happen Again? A Question for the Citizens of Russia ilalanga apabuuta ukuti Inte sha kwa Yehova bantu abasuma. Ilondolola ifyo ifyacitike kale ifyalengele ukuti ba Nte batendeke ukubacusha sana mu Soviet Union fyapalana ne fyo balebabepesha ubufi pali nomba. Trakiti ilekoselesha abantu ukuya pa Intaneti, pa www.jw-russia.org, apo bengabelenga ilyashi ililanda pa Nte sha kwa Yehova isha mu Russia na pa mulimo wabo. Ifyebo fyaba pali iyi adresi fyaba mu lulimi lwa bena Russia. Muli iyi trakiti balyambula na mashiwi ya pa Intaneti ayo Presidenti wa ku Russia, Dmitri Medvedev alandile, pa bushiku bwa kwibukisha abantu abo ubuteko bwa Soviet Union bwaikele pa nsambu. * Nangu ca kutila pali ilya nshita ba Nte bali fye abanono, bali pa bantu abo ubu buteko bwaikele pa nsambu.

[Futunoti]

[Akabokoshi pe bula 21]

 Ukwibukisha Abo Balecusha

Pa bushiku abena Russia bebukisha abo balecusha mu buteko bwa Soviet Union, Presidenti Dmitri Medvedev alandile amashiwi yakonkapo:

“Buno bushiku bwa kwibukisha abo baikele pa nsambu mu buteko bwa Soviet Union. . . . Te kuti twelenganye ifyabipa ifyalecitika mu calo cesu. . . . Abantu abengi mu calo cesu balibepeye. . . . Aba mapepo balebacusha. . . . iminshipendwa balibepeye. [Bushiku bwa kwibukisha] abantu abo baipeye ukwabula ukubalubulwisha kabili abo tushaishiba no kwishiba; abantu abo batwele ku ncende imbi nelyo mu nkambi sha kucushishamo abantu, abo baikele pa nsambu pa mulandu wa ncito balebomba nelyo umutundu wabo.

“Bena ne ndupwa shabo balebeta ukuti ‘abalwani ba calo cesu.’ Taleni tontonkanyeni pali ifi: Abantu abengi nga nshi balifwile pa mulandu wa bufi balebabepesha na pa mulandu wa kubacusha. Balibekele pa nsambu, ukubikako fye ne nsambu sha kubashiika bwino. Pa myaka iingi, cali kwati aba bantu tabaliko no kubako.

“Tabacitile umulandu uuli onse uwa kubacushisha nelyo ukubepaya.”