Fundeni Abana Benu

Bushe Limo Ulatalalilwa no Kumfwa Umwenso?

ABANTU abengi muno nshiku balatalalilwa; bamona kwati takwaba nangu umo uwabapoosako amano. Abakote maka maka e bomfwa ifi. Lelo na baice abengi muno nshiku, ukubikako na babombela Lesa, nabo balatalalilwa no kumfwa umwenso. Bushe walishiba umulandu?— *

Kwaliba ifintu ifingi ifilenga. Ku ca kumwenako, natulande pa muntu uwaliko imyaka iingi ku numa, nalimo imyaka 1,000 ilyo Yesu talaisa pano calo. Ishina lyakwe ni Eliya. Ali pano calo pa nshita abena Israele balekele ukubombela Lesa wa cine, Yehova. Abengi batendeke ukupepa lesa wa bufi Baali. Eliya atile: “Nine fye neka nshelepo.” Lelo bushe uletontonkanya ukuti Eliya fye e washele alebombela Yehova?—

Nangu ca kuti Eliya taishibe, kwali na bambi mu Israele abatwalilile ukupepa Lesa wa cine. Lelo balibeleme. Bali no mwenso. Bushe nawishiba umulandu?—

Ahabu, imfumu ya Israele, talepepa Yehova; alepepa Baali, lesa wa bufi uwalepepa umukashi wakwe Yesebele, uwabipile nga nshi. Yesebele na Ahabu balefwaya abantu abalepepa Yehova pa kuti babepaye, maka maka Eliya. E mulandu wine Eliya abutukile. Aile ku ciswebebe ca ku Horebu, ico Baibolo ita no kuti Sinai, ukwalepele amakilomita mupepi na 483. Imyaka iingi nga nshi ninshi Eliya talabako, kuli iyi ncende e ko Yehova apeelele abena Israele Amafunde Ikumi na Mafunde yambi. Eliya  ailebelama mu lucengo mu Horebu. Bushe uletontonkanya ukuti Eliya alingile ukumfwa umwenso?—

Baibolo ilanga ukuti ilyo ifi fishilacitika, Yehova alibomfeshe Eliya ukucita ifipesha amano ifikalamba. Inshita imo Yehova alyaswike ipepo lya kwa Eliya ilyo atumine umulilo ukufuma mu muulu no koca ilambo. Ifi Yehova acitile fyalangile apabuuta ukuti e Lesa wa cine, te Baali iyo. Nomba ilyo Eliya ali mu lucengo, Yehova alilandile nankwe.

Yehova amwipwishe ati: “Cinshi ulecita kuno?” Ni pali iyi nshita epo alandile ukuti, ‘Ni ne fye neka nshelepo pa bamupepa bonse.’ Lyena Yehova alilungike Eliya, amwebele ati, ‘kuli na bambi 7,000 abamombela.’ Yehova aebele Eliya ukubwelela uko afumine, no kumulondolwela ukuti alimukwatile imilimo na imbi iingi iyo alingile ukubomba.

Bushe uletontonkanya ukuti cinshi twingasambilila kuli Eliya?— Na babombela Yehova limo kuti baumfwa umwenso. Kanshi ifwe bonse, nampo nga tuli baice nelyo abakalamba, tufwile ukulaibukisha ukupepa kuli Yehova pa kuti atwafwe. Baibolo yatulaya ukuti: “Yehova aba mupepi na bonse abalilila kuli ena.”

Kuli na cimbi ico twingasambililako: Mu calo conse, twalikwata bamunyinefwe ne nkashi abatemwa Yehova kabili abatutemwa. Baibolo itila: “Bamunyinenwe bonse pano calo na bo balecula fye nge fi fine na imwe mulecula.” Bushe tautemenwe ifi waishiba ukuti te ifwe fweka tubombela Yehova?—

Belenga muli Baibolo yobe

1 Ishamfumu 19:3-18

Amalango 5:1-22

Amalumbo 145:18

1 Petro 5:9

[Futunoti]