Sambilileni Icebo ca kwa Lesa

Yesu Kristu Nani?

Ici cipande cilelanda pa mepusho ayo nalimo mufwaisha ukwishiba kabili cilemulanga na po mwingasanga amasuko muli Baibolo yenu. Inte sha kwa Yehova kuti shatemwa nga nshi ukulanshanya na imwe aya masuko.

1. Yesu Kristu nani?

Ukupusanako na bantu bonse, Yesu ali cibumbwa ca mupashi ku muulu ilyo ashilafyalwa pano isonde. (Yohane 8:23) E o Lesa abalilepo ukubumba, kabili aleafwako Lesa ukubumba ifintu fimbi ifyashala. E cibumbwa fye ico Yehova abumbile eka kabili e mulandu wine etilwa ukuti “umwana [wa kwa Lesa] uwafyalwa eka.” Yesu e o Lesa alelandilamo, e co etilwa ukuti “Cebo.”—Yohane 1:1-3, 14; belengeni Amapinda 8:22, 23, 30; Abena Kolose 1:15, 16.

2. Mulandu nshi Yesu aishile pano calo?

Lesa atumine Umwana wakwe ukwisa pano calo ilyo akuushishe ubumi bwakwe muli nacisungu umuYuda uwe shina lya kuti Maria. Kanshi Yesu takwete wishi umuntunse. (Luka 1:30-35) Yesu aishile pano calo (1) ku kusambilisha icine pali Lesa, (2) ku kutulanga ifya kucita ukufwaya kwa kwa Lesa, na (3) ku kupeela umweo wakwe uwapwililika “icilubula.”—Belengeni Mateo 20:28; Yohane 18:37.

3. Mulandu nshi tufwaila icilubula?

Icilubula cintu ico balipila pa kulubula umuntu. Ilyo Lesa apangile abantu talefwaya ukuti balekota no kufwa. Twaishiba shani? Lesa aebele umuntu wa kubalilapo, Adamu, ukuti nga acita ico Baibolo ita ati ulubembu, ali no kufwa. Adamu akanabembuka, nga tafwile. Nangu ca kutila palipitile imyaka iingi pa kuti Adamu afwe, kuti twatila atendeke ukufwa lilya line fye abembwike. (Ukutendeka 2:16, 17; 5:5) Adamu alyambukishe abana bakwe bonse ulubembu ne mfwa. Kanshi, imfwa ‘yaingilile’ mu calo muli Adamu. E mulandu wine tufwaila icilubula.—Belengeni Abena Roma 5:12; 6:23.

  4. Mulandu nshi Yesu afwilile?

Nani wali no kupeela icilubula pa kuti atulubule ku mfwa? Umuntu nga afwa, alipila fye pa membu shakwe epela. Takwaba umuntunse umubembu nangu umo uwingalubula umunankwe ku membu.—Belengeni Amalumbo 49:7-9.

Apo Yesu tafyelwe ku mwaume umuntunse, icalengele ukuti afwe te lubembu lwakwe, lelo ni membu sha bantu bambi. Pa kulanga ifyo Lesa atemwa nga nshi abantunse, atumine Umwana wakwe ukwisatufwila. Yesu na o alangile ukuti alitutemwa pa kumfwila Wishi no kupeela umweo wakwe pa mulandu wa membu shesu.—Belengeni Yohane 3:16; Abena Roma 5:18, 19.

5. Cinshi Yesu alecita ino nshita?

Ilyo Yesu aleposha abalwele, ukubuusha abafwa, no kwafwa abali na mafya, alelanga ifyo akacitila abantunse aba cumfwila ku ntanshi. (Luka 18:35-42; Yohane 5:28, 29) Lintu afwile, Lesa alimubuushishe no mubili wa mupashi. (1 Petro 3:18) Lyena, aikele ku kuboko kwa ku kulyo ukwa kwa Yehova, alelolela ukuti bamupeele amaka ya kuba Imfumu pe sonde lyonse. (AbaHebere 10:12, 13) Ino nshita Yesu ni Mfumu mu muulu, kabili abasambi bakwe aba pano calo balebilisha imbila nsuma mwi sonde lyonse.—Belengeni Daniele 7:13, 14; Mateo 24:14.

Apo nomba Yesu ni Mfumu, nomba line, ali no kubomfya amaka yakwe ukupwisha ukucula kabili akonaula bonse abacita ifyabipa. Abantu abengi nga nshi abatetekela Yesu kabili abamumfwila bakaipakisha ubumi muli paradaise pano isonde.—Belengeni Amalumbo 37:9-11.

Nga mulefwaya ukwishibilapo na fimbi, belengeni icipandwa 4 icaba muli ici citabo icalembwa ne Nte sha kwa Yehova.Bushe Cinshi Baibolo Isambilisha?

[Icikope pe bula 17]

Abantu abengi nga nshi abatetekela Yesu kabili abamumfwila bakaipakisha ubumi muli paradaise pano isonde