“Mukafuluka”
Palameni Kuli Lesa
“Mukafuluka”
TULOMFWA sana ububi ukumona umuntu twatemwa alecula mpaka afwa. Nga twafwilwa, tulaba no bulanda. Lelo tulasansamuka ukwishiba ukuti Kabumba wesu, Yehova Lesa, aleshiba ubulanda tumfwa. Ne cacindamisha ca kutila alafwaisha ukubomfya amaka yakwe ku kubuusha abafwa. Umfweni amashiwi Yobo alandile ayatupeela isubilo, ayalembwa pali Yobo 14:13-15.
Taleni elenganyeni ifyo cali. Yobo, umwaume wa citetekelo cakosa, aponenwa no bwesho ubwabipa sana, ifyuma fyakwe fyonse fyaloba, abana bakwe bonse abo atemwa nga nshi bafwa, kabili alwala ubulwele ubwamucusha icine cine. Ilyo alepita muli ubu bucushi, alilila kuli Lesa ukuti: “Iye nga mwingamfisa mu Nshiishi!” (Icikomo 13) Ifyo Yobo aletontonkanya fya kuti nga afwa e lyo alalubuka ku macushi akwete. Pantu nga afwa, takalecula nangu ukukalipwa, cikaba kwati Lesa namufisa nge fyo engafisa icipe ca mutengo. *
Bushe Yobo ali no kwikalilila mu Nshiishi? Yobo aishibe ukuti tali na kwikalilila mu Nshiishi. Akonkenyepo ukupepa ukuti: “Iye . . . nga mwampimina inshita no kunjibukisha!” Yobo acetekele ukuti tali na kwikalilila mu Nshiishi no kuti Yehova tali no kumulaba. Yobo alingenye inshita ali no kuba mu Nshiishi ku nshita ya ‘kulolela.’ Ali no kulolela ukufika lilali? Atile: “Mpaka ukutuusha kwandi kukese.” (Icikomo 14) Uku kutuusha kwalolele mu kuti ali no kufuma mu Nshiishi, e kutila ali no kubuuka ku bafwa!
Cinshi Yobo ashininkishishe ukuti ukutuusha kwakwe kwali no kwisa? Pantu alishibe ifyo Kabumba wesu uwatutemwa omfwa pa babomfi bakwe aba cishinka abafwa. Yobo atile: “Muketa, na ine nkaasuka. Pantu mukafuluka umulimo wa minwe yenu.” (Icikomo 15) Yobo aishibe ukuti Lesa e wamupangile. Lesa uwapeele Yobo ubumi kabili uwamupangile mu nda muli nyina, cine cine aali no kumubuusha nga afwa.—Yobo 10:8, 9; 31:15.
Amashiwi Yobo asosele yalatusambilisha isambililo ilisuma pali Yehova, ilya kuti: Alitemwa sana bonse abaituula mu maboko yakwe, nge fyacitile Yobo, abafwaya ukuti Lesa abaalule pa kuti babe abantu abatemwikwa nga nshi kuli ena. (Esaya 64:8) Yehova alicindamika bakapepa bakwe aba cishinka. ‘Alafuluka’ ababomfi bakwe aba cishinka abafwa. Uwasoma umo atile ili shiwi lya ciHebere ilyo bapilibula ukuti “mukafuluka,” “e shiwi ilyo umuntu engabomfya pa kulondolola ifyo umo alefwaisha ukucita icintu.” Kanshi, Yehova tebukisha fye bakapepa bakwe abafwa lelo alafuluka no kubabuusha.
Caliwama ukuti Yehova alisokolola ubufwayo bwakwe ubwa kubuusha abafwa * mwi buuku lya kwa Yobo, ilyaba pa mabuuku ya mu Baibolo ayo babalilepo ukulemba. Afwaya ukubuusha abatemwikwa benu abafwa pa kuti mukeseba pamo nabo. Ukwishiba ifi kuti kwalenga ubulanda ukucepako. Bushe te kuti mutemwe ukwishibilapo na fimbi pali uyu Lesa wakwata ukutemwa ne fyo mwingaleka ukuti amwalule pa kuti mukabe pa bantu abakamonako ilyo ukufwaya kwakwe kukafikilishiwa?
Amalembo ya kubelenga mu March:
[Amafutunoti]
^ para. 4 Icitabo cimo catila amashiwi Yobo asosele aya kuti “mwingamfisa,” kuti yapilibula ukuti “[ukumbika] ukwacingililwa kwati cipe ica mutengo.” Icitabo cimbi catila aya mashiwi kuti yapilibula ati “mumfise nge fyo mwingafisa icipe ca mutengo.”
^ para. 8 Nga mulefwaya ukwishiba na fimbi pa bulayo bwaba mu Baibolo ubwa kuti abafwa bakabuuka mu calo cipya icalungama, belengeni icipandwa 7 mu citabo citila Bushe Cinshi Baibolo Isambilisha? Abalemba ici citabo ni Nte sha kwa Yehova.
