Balimutemenwe Kuli Lesa na ku Banankwe
Fundeni Abana Benu
Balimutemenwe Kuli Lesa na ku Banankwe
MUNO nshiku takwaba nangu umo uwaishiba ishina lyakwe. Bamwishiba fye ukuti ni mwana Yefta. Leka tubelenge Baibolo pa kuti twishibe aba bantu babili. Nga twabelenga, twalasanga ukuti umwana mwanakashi wa kwa Yefta balimutemenwe kuli Lesa na ku banankwe.
Ilyashi lya kwa Yefta no mwana wakwe lisangwa mwi buuku lya mu Baibolo ilya Abapingushi icipandwa 11. Apo Yefta ali mubomfi wa kwa Lesa uwa cishinka, afwile lyonse alesambilisha umwana wakwe ifya mu Malembo.
Yefta ali pa calo ninshi abantu ba kwa Lesa, abena Israele, tabalalomba ukuti baletekwa ne mfumu. Yefta ali uwakosa kabili uwa maka. E co abena Israele bamulombele ukuti abatungulule pa kulwa na bena Amone, uluko lwapalamene nabo ulwalebalwisha.
Yefta alefwaya ukuti Lesa amwafwe ukucimfya abena Amone, e ico alapile umulapo kuli Yehova. Atile nga Yehova amulenga ukucimfya, ninshi uwali no kubalilapo ukufuma mu ng’anda yakwe ku kumusengela, ali no kumupeela kuli Yehova. Uyo muntu ali no kulabombela pa cikuulwa ca mushilo inshiku shakwe shonse, apo balepepela Lesa pali ilya nshita. Bushe nawishiba uwabalilepo ukufuma?— *
Ee, ni mwana Yefta! Yefta alyumfwile sana ubulanda. Akwete fye umwana umo. Lelo alilapile umulapo kuli Yehova kabili alingile ukufikilisha. Apo pene fye, umwana wakwe atile: “Tata, nga mwalilaya kuli Yehova, citeni kuli ine ukulingana ne fyo mwalandile.” (Abapingushi 11:36) Lyena alombele ukuti abe eka pa myeshi ibili pa kuti aye ku mpili ku kuloosha. Mulandu nshi abelele no bulanda? Pantu pa kufikilisha umulapo wa kwa wishi, tali na kuupwa no kukwata abana. Na lyo line, talemona ukuti ifyo alefwaya e fyacindeme sana. Alefwaya ukumfwila wishi no kuba uwa cishinka kuli Yehova. Bushe uletontonkanya ukuti alilengele Yehova na wishi ukuba ne nsansa?—
Yefta alekele umwana wakwe na banankwe ukuyaikala beka pa myeshi ibili. Ilyo abwelele, wishi alifikilishe umulapo alapile lintu amutumine ku cikuulwa ca mushilo ica kwa Lesa ku Shilo uko ali no kulaikala inshiku shonse. Cila mwaka, abakashana abena Israele baleya ku Shilo ku kukoselesha umwana wa kwa Yefta.
Bushe walishibako abaice banobe abomfwila abafyashi babo kabili abatemwa Yehova?— Kuti cawama nga waishiba abo baice no kubapanga ifibusa. Nga wapashanya umwana wa kwa Yefta kabili waba ne cumfwila ne cishinka, ukakwata ifibusa ifisuma. Ukalenga abafyashi bobe ukuba ne nsansa, kabili na iwe wine Yehova akakutemwa.
Belenga muli Baibolo yobe
[Futunoti]
^ para. 6 Nga ca kuti mulebelengela capamo na bana, apo mulesanga bashilile fye ninshi mufwile mwalolelako pa kuti abana balandepo.
Nalimo Kuti Mwatemwako ne fi
BENI CIBUSA WA KWA YEHOVA
Uleumfwila Abafyashi
Mulandu nshi ukumfwila abafyashi kwacindamina? Tambeni iyi vidio ya bakadoli pa kuti musambilile pamo na Kalebu umulandu cacindamina.
BENI CIBUSA WA KWA YEHOVA
Uleumfwila Yehova
Bushe calicindama ukusala bwino ifilubi fya kwangasha? Tambeni vidio pa kuti mumone icalalenga Kalebu abe cibusa wa kwa Lesa.
ULUPUNGU LWA KWA KALINDA
Mulandu Nshi Bamo Abalembwa mu Baibolo Bashabalumbwila Amashina?
ULUPUNGU LWA KWA KALINDA
Ifyo Tufwile Ukwishiba Pali Yesu Kristu
ULUPUNGU LWA KWA KALINDA
Lesa Alomfwa Ububi—Ifyo Twingalenga Lesa Ukusekelela
ULUPUNGU LWA KWA KALINDA
