Ifyo Tusambilila Kuli Yesu

Ifya Kusanga Insansa

Cinshi cilenga umuntu ukuba ne nsansa?

▪ Mu lyashi lyalumbuka ilya pa lupili, Yesu alandile pa nsansa nangu pa kupaalwa mu mashiwi aya kubalilapo fye. Atile: “Balipaalwa abaishiba ukuti balakabila ifya kwa Lesa.” (Mateo 5:3) Aloseshe mwi? Nge fya kwa Lesa ifyo tukabila finshi?

Pa kuti fwe bantu tutwalilile ukuba aba mweo, tulakabila umwela, amenshi, ne fya kulya. Inama na sho e fyo shikabila. Lelo pa kuba ne nsansa, tukabila ukucita fimo ifyo inama te kuti shicite—tukabila ukwishiba umulandu twabela pano calo. Kabumba wa bumi epela e wingatulenga ukwishiba umulandu twabela pano calo. E mulandu wine Yesu asosele ati: “Te ku fya kulya fyeka umuntu ekalila no mweo, lelo na ku mashiwi yonse ayafuma mu kanwa ka kwa Yehova.” (Mateo 4:4) Abaishiba ukuti balakabila ifya kwa Lesa balaba ne nsansa pantu bena balapalamina kuli Yehova, “Lesa wa nsansa,” kabili alabapeela isubilo, ilyacindama sana pa kuti babe ne nsansa.—1 Timote 1:11.

Bushe Yesu alengele shani abantu ukuba ne subilo?

▪ Yesu atile: “Balipaalwa abafuuka, pantu bakapyana isonde.” (Mateo 5:5) Ilyo Yesu aposeshe abalwele no kubuusha abafwa pano isonde, alilengele abantu ukuba ne subilo. Ubukombe ubo alebilisha na bo bwalelenga abantu ukuba ne subilo. Alondolwele ukuti: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Abantu abomfwila Lesa bakaipakisha umweo wa muyayaya pano isonde. Elenganyeni ukwikala na bantu abafuuka kabili abashilekota! E mulandu wine Icebo ca kwa Lesa cisosela ukuti: “Sekeleleni mwi subilo.” (Abena Roma 12:12) Yesu alilandile na pa fya kusanga insansa pali ino ine nshita.

 Finshi Yesu asambilishe ifingalenga abantu ukuba ne nsansa?

▪ Yesu alisambilishe ifingatwafwa ukulaumfwana na bantu, ifyo twingaipakisha mu cupo, ubusuma bwaba mu kuicefya, ne fyo twingalamona ifyuma. (Mateo 5:21-32; 6:1-5, 19-34) Nga mwakonka ukufunda kwa kwa Yesu, mukaba ne nsansa.

Bukapekape bulaletela umuntu insansa. (Imilimo 20:35) Ku ca kumwenako, Yesu asosele ati: “Ilyo wapekanya umutebeto, ita abapiina, abalemana, na balemana amolu, e lyo ne mpofu; e lyo ukaba ne nsansa, pantu tabakwete ica kukulambula nangu cimo.” (Luka 14:13, 14) Kanshi ukucila ukulafwaya fye ifingatuletela insansa, tukasanga insansa sha cine cine nga tulelenga bambi ukuba ne nsansa.

Cinshi sana sana icingatuletela insansa?

▪ Nga muleafwa bambi, mukaba ne nsansa, lelo mukacilapo ukuba ne nsansa nga mulebombela Lesa. Mukaba aba nsansa ukucila fye na filya umufyashi uwatemwa abana bakwe omfwe cilumba. E fyo na Yesu alandile inshita imo ilyo alesambilisha ibumba lya bantu. “Umwanakashi umo mwi bumba asanswile ishiwi lyakwe no kumweba ati: ‘Lyalipaalwa ifumo ilyakusendele na mabele ayo waonkeleko!’ Lelo atile: ‘Awe, Abapaalwa ni abo abomfwa no kukonka icebo ca kwa Lesa!’”—Luka 11:27, 28.

Yesu alesanga sana insansa mu kucita ukufwaya kwa kwa Wishi wa ku muulu. Lesa afwaya ukuti abantu bomfwe pa lwe subilo lya mweo wa muyayaya. Pa numa ya kulondolwela ili isubilo kuli umo uwalekutika kuli ena, Yesu asosele ati: “Ica kulya candi kucita ukufwaya kwa wantumine.” (Yohane 4:13, 14, 34) Na imwe bene kuti mwakwata insansa nga ca kuti mulecita ifisekesha Lesa kabili mulesambilishako bambi ifyaba muli Baibolo.

Nga mulefwaya ifyebo na fimbi, moneni icipandwa 1 muli ici citabo. Abalemba ici citabo ni Nte sha kwa Yehova.

[Icikope pe bula 16]

Tuba ne nsansa sha cine cine nga twaishiba umulandu twabela pano calo