Cinshi Lesa Alecita Ino Nshita?

“Mulandu nshi, mwe Yehova, mwimininina akatalamukila? Cinshi ico mufisamina mu nshita sha mafya?” *—AMALUMBO 10:1.

NGA twakutika ku malyashi yalecitika mu calo, kuti twashininkisha ukuti cine cine tuleikala “mu nshita sha mafya.” Nga ca kutila ifipondo fyatusansa, twaba mu busanso, nelyo umuntu twatemwa afwa, kuti nalimo twatontonkanya ukuti, Bushe Lesa alatusakamana? Bushe alamona ificitika? Bushe na kuba Lesa e ko aba?

Lelo bushe mwalishiba ukuti fimo ifyo tutontonkanya pali Lesa fyalilubana? Lekeni tulangilile: Elenganyeni umwana umunono uufulilwe pa mulandu wa kuti bawishi nabaya ku ncito. Alefuluka sana bawishi ica kuti alefwaya babwele bwangu. Ena alemona kwati bawishi nabamulekelesha. Akasuba konse aleipusha fye ati, “Bushe batata bali kwi?”

Kuti twamona ukuti ifyo uyu mwana aletontonkanya pali bawishi nafilubana. Pantu pali iyi nshita aletontonkanya ifi, ninshi bawishi balebomba incito iya kuti basungilemo ulupwa lonse. Limbi na ifwe tulaluba ilyo tuyipusha ukuti “Bushe Lesa e ko aba”?

Ku ca kumwenako, bamo kuti bafwaya ukuti Lesa alekanda umuntu onse uwalufyanya palya pene fye. Bambi nabo bamona kwati Lesa aba nga Father Christmas uwakwata fye incito ya kupeela ifya bupe pamo nga incito, uwa kuupana nankwe nelyo ishuko lya kuwina mu fyangalo.

Ifi fyonse abantu batontonkanya filanga ukuti Lesa nga takandile umuntu palya pene fye alufyanya nangu nga tatupeele ifyo twamulomba, ninshi tatupoosako amano kabili tatusakamana. Lelo icishinka ca kutila, pali ino ine nshita, Yehova Lesa alebombela pa fikawamina abantunse bonse, nangu cingati te mu nshila iyo ifwe twingenekela.

Nomba finshi ifyo fine alecita? Pa kwasuka bwino ici cipusho, natubale tulande pa fyacitike kale sana lintu abantu ba kubalilapo baonawile bucibusa bwabo na Lesa.

Ifyabipa Ifyafuma mu Lubembu

Tontonkanyeni pa ng’anda iyalekeleshiwa pa myaka iingi. Umutenge walibwantila, ifiibi fyalyonaika kabili na fyonse ku nse fyalyonaulwa. Pa kubala, iyi ng’anda yali fye bwino. Nga twatontonkanya pa fyo iyi ng’anda yaonaika, kuti twamona ukuti ukuiwamya kuti kwasenda inshita iikalamba pantu umulimo ukalamba.

Nomba tontonkanyeni pa bonaushi bwacitike imyaka 6,000 iyapita, ilyo Satana atunkile Adamu na Efa ukupondokela Lesa. Ilyo ifi tafilacitika, Adamu na Efa bali no bumi ubusuma  kabili bali no kwikala umuyayaya pamo na bana babo abo bali no kukwata. (Ukutendeka 1:28) Nomba ilyo Adamu na Efa babembwike, cali kwati baonaula fyonse ifyo abantunse abali tabalafyalwa bali no kukwata.

Mwimona kwati ubonaushi ubwacitike ilyo Adamu apondokele Lesa bwali bunono. Baibolo itila: “Ulubembu lwaingilile mu muntu umo [Adamu] pano calo ne mfwa yaingilile mu lubembu.” (Abena Roma 5:12) Ulu lubembu talwaleta fye imfwa yeka, lelo lwalyonaula na bucibusa bwesu na Kabumba kabili lwalilenga ukuti tube abashapwililika. Ne ci calenga ukuti tube kwati ni ilya ng’anda iyaonaika. Yobo umuntu umulungami alandile pa fyo ubumi bwa muntunse bwaba lintu atile “ubumi bwakwe bwipi kabili bwaisulamo amacushi.”—Yobo 14:1.

Lelo bushe Lesa alilekeleshe abantunse ilyo Adamu na Efa babembwike? Awe nakalya! Na kuba, ukufuma fye lilya line babembwike ukufika na lelo, Shifwe wa ku muulu alabombesha pa kuti ifintu fikawame ku bantunse. Pa kuti twishibe bwino ifyo Lesa alecita, natubale tulande pa fintu fitatu ifyacindama ifikabilwa pa kuti ing’anda yaonaika iwame, kabili twalamona ne fyo ifi fintu fikumine ifyo Lesa aacita pa kuti ifintu fikawame ku bantunse.

1 Pa numa ya kuceceeta ing’anda yaonaika, umwine afwile ukupingulapo nampo nga kuibongolola nelyo kuiwamya fye.

Lilya line fye Adamu na Efa babembwike mu Edeni, Yehova Lesa alilandile ifyo ali no kucita pa kuti akalenge ifintu ukuba nge fyo fyali pa kubala. Aebele Satana uwalengele babembuke ukuti: “Ndebika no bulwani pali iwe no mwanakashi, na pa mwana obe no mwana wakwe. Ena akakufwanta ku mutwe nobe ukamusuma ku citende.”—Ukutendeka 3:15.

Muli aya mashiwi, Yehova alaile ukuti ali no konaula uwalengele ukuti Adamu na Efa bapondoke mwi bala lya Edeni. (Abena Roma 16:20; Ukusokolola 12:9) Na kabili Yehova alilandiile libela ukuti ku ntanshi, “umwana” ali no kulubula abantunse ku lubembu. * (1 Yohane 3:8) Ifi fyonse ifyo alaile fyalangile ukuti Lesa tali na konaula ifyo abumbile lelo ali no kufiwamya. Nomba umulimo wa kuwamya ifintu pa calo tawali no kubombwa mu bushiku bumo.

2 Uwaishiba ifya makuule alalemba pulani iilanga ifyo akawamya ing’anda.

Yehova Lesa alipeele abena Israele amafunde, abebele no kukuula itempele lya kumupepelamo kabili ili tempele lyakuulilwe ukulingana ne fyo umwine alefwaya. Baibolo itila: “Ifyo fintu fyaba fye cinshingwa ca fikesa.” (Abena Kolose 2:17) Fyali kwati ni pulani iyalelanga ifintu ifikalamba ifyali no kucitika.

Ku ca kumwenako, abena Israele balepeela amalambo ya nama pa kuti Lesa abalekelele imembu. (Ubwina Lebi 17:11) Amalambo  balepeela yaleimininako ilambo ilikalamba ilyali no kupeelwa ku ntanshi, ilyali no kulenga abantunse ukulubuka umupwilapo. * Pulani ya cikuulwa ca kukumaninamo ne ye tempele abena Israele balepepelamo, yaleimininako ifyo Mesia ali no kucita ukufuma pa nshita apeele umweo wakwe nge lambo ukufika na lintu ali no kunina ukuya ku muulu.— Moneni icikope pe buula 7.

3 Umwine wa ng’anda alasala uwaishiba ukukuula uwingakonka pulani.

Yesu e Mesia walailwe uwali no kufikilisha filya abena Israele balepeela amalambo, kabili ali no kupeela umweo wakwe ku kulubula abantunse. Na cine, Yohane Kabatisha aitile Yesu ukuti “Umwana wa mpaanga uwa kwa Lesa, uulesenda ulubembu lwa ba mu calo.” (Yohane 1:29) Yesu alisumine ukubomba uyu mulimo. Atile: “Ico nafumina ku muulu te ku kucita ukufwaya kwandi, lelo ni ku kucita ukufwaya kwa wantumine.”—Yohane 6:38.

Umulimo Lesa apeele Yesu tawapelele fye pa “kupeela umweo wakwe icilubula pa kuti alubule abengi” lelo ali no kupangana na basambi bakwe icipangano ca Bufumu. (Mateo 20:28; Luka 22:29, 30) Ubu Bufumu e bo Lesa akabomfya ku kucita ukufwaya kwakwe ukwakuma abantunse. Ilyashi lilanda pa Bufumu bwa kwa Lesa balita ukuti “imbila nsuma” pantu lilondolola ukuti Lesa alibikako ubuteko mu muulu ubukalateka isonde!—Mateo 24:14; Daniele 2:44. *

Umulimo wa Kuwamya Ifintu Walitwalilila

Ilyo Yesu talaya ku muulu, aebele abasambi bakwe ukuti: “Kalengeni aba nko shonse ukuba abasambi, mulebabatishisha mwi shina lya kwa Tata ne lya Mwana ne lya mupashi wa mushilo . . . Kabili, moneni! nakulaba na imwe inshiku shonse mpaka na ku mpela ya calo.”—Mateo 28:19, 20.

Kanshi umulimo wa kuwamya ifintu pa calo tawali no kupwa ilyo Yesu afwile. Lelo wali no kutwalilila ukufika fye na “ku mpela ya calo,” ilyo Ubufumu bwa kwa Lesa bwali no kutendeka ukutungulula ifintu mu calo. Inshita ya mpela e ino ine tuleikalamo. Ico twaishibila ukuti ino e nshita ya mpela ca kuti icishibilo Yesu alandile ukuti e cikeshibisha “impela ya calo” cilefikilishiwa muno nshiku. *—Mateo 24:3-14; Luka 21:7-11; 2 Timote 3:1-5.

Muno nshiku, Inte sha kwa Yehova mu fyalo 236 balomfwila ifunde lya kwa Yesu ilya kushimikila imbila nsuma ya Bufumu bwa kwa Lesa. Na kuba, ico balembela ino magazini mulebelenga kutila mwishibe ifingi pali ubu bwine Ubufumu na pa fyo bukacita. Pe bula 2 mu Ulupungu lwa kwa Kalinda paliba amashiwi ya kuti: “Ino magazini . . . ilasansamusha abantu pa kubebako imbila nsuma ya kuti Ubufumu bwa kwa Lesa nomba line buli no kufumyapo ifyabipa fyonse no kulenga cino calo ukuba paradaise. Ubu Bufumu buteko bwa cine cine ubwaba ku muulu. Ino magazini ilakoselesha abantu ukucetekela Yesu Kristu, uwatufwilile pa kuti tukakwate umweo wa muyayaya. Uyu wine Yesu pali ino nshita ni Mfumu ya Bufumu bwa kwa Lesa.”

Cishinka ukuti pali ino nshita mulomfwa ukusansa kwa fipondo, utuyofi, nelyo ifyabipa kuti fyamucitikila. Lelo nga mulesambilila Baibolo mukashininkisha ukuti Lesa alasakamana abantu kabili “taba kutali kuli ifwe umo umo.” (Imilimo 17:27) Kabili akafikilisha ubulayo bwakwe ubwa kuwamya isonde pa kuti likabe nga filya fine lyali ilyo abafyashi besu bashilabembuka.—Esaya 55:11.

[Amafutunoti]

 [Ifikope pe bula 7]

 (Nga mulefwaya ukumona ifikope, moneni muli magazini)

‘Icimpashanya ca Ncende ya Mushilo iya Cine Cine’—Ifyo Icikuulwa ca Mushilo Caleimininako

ICIPAILO

Ifyo Lesa aitemenwa ukupokelela ilambo lya kwa Kristu.—ABAHEBERE 13:10-12.

SHIMAPEPO MUKALAMBA

Yesu.—ABAHEBERE 9:11.

1 Pa Bushiku bwa Cifuta Mulandu, shimapepo mukalamba aletuula ilambo lya kufuta imembu sha bantu bonse.—UBWINA LEBI 16:15, 29-31.

1 Pa Nisani 14, 33 C.E., Yesu alitufwilile.—ABAHEBERE 10:5-10; 1 YOHANE 2:1, 2.

UMUPUTULE WA MUSHILO

Yesu Umwana wa kwa Lesa uwasubwa no mupashi.—MATEO 3:16, 17; ABENA ROMA 8:14-17; ABAHEBERE 5:4-6.

INSALU

Umubili wa buntunse uwa kwa Yesu, uulekanya ubumi bwa pano calo no bwa mu muulu.—1 ABENA KORINTI 15:44, 50; ABAHEBERE 6:19, 20; 10:19, 20.

2 Pa kwingila Umwa Mushilo Nga Nshi, shimapepo mukalamba alepita apali insalu iyalekenye Umuputule wa Mushilo no wa Mushilo Nga Nshi.

2 Ilyo Yesu abuushiwe ‘apitile apali insalu’ lintu aingile mu muulu ‘ku kumoneka ku cinso ca kwa Lesa pa mulandu wesu.’—ABAHEBERE 9:24-28.

UMUPUTULE WA MUSHILO NGA NSHI

Mu muulu.—ABAHEBERE 9:24.

3 Shimapepo mukalamba nga aingila mu Muputule wa Mushilo Nga Nshi, alekana umulopa we lambo pa ntanshi ya cipao ca cipangano.—UBWINA LEBI 16:12-14.

3 Ilyo Yesu apeele umutengo wa mulopa wakwe kuli Lesa, e lyo afutile imembu shesu.—ABAHEBERE 9:12, 24; 1 PETRO 3:21, 22.