Ifyo Yesu Asambilishe Pali Lesa

“Takuli uwaishiba Wishi ifyo aba kano Umwana, na untu Umwana afwaya ukusokolwela.”—LUKA 10:22.

ILYO ibeli lya kwa Lesa lyali ku muulu, lyaikele na Wishi imyaka iingi nga nshi. (Abena Kolose 1:15) Ici calengele ukuti Umwana eshibe ifyo Wishi atontonkanya, ifyo omfwa pa fintu, kabili calengele eshibe ne nshila Shakwe. Ilyo Umwana aishile pano calo mu buntunse, alefwaisha ukusambilisha abantu icine pali Wishi. Kuti twasambilila ifingi pali Lesa nga tulekutika ku fyo Umwana wakwe alandile.

Ishina lya kwa Lesa Yesu alicindamike nga nshi ishina lya mushilo ilya kwa Lesa, ilya kuti Yehova. Uyu Mwana watemwikwa, alefwaya sana abantu ukwishiba ishina lya kwa Wishi. Ishina lyakwe ilya kuti Yesu, lipilibula ukuti “Yehova e Pusukilo.” Inshita ya bushiku ninshi tabalamwipaya, Yesu apepele kuli Yehova ati: “Nalenga beshibe ishina lyenu.” (Yohane 17:26) Yesu alebomfya ishina lya kwa Lesa kabili alelenga na bambi ukulishiba. Na kuba, bushe abantu Yesu alesambilisha kuti baumfwikisha shani icine pali Yehova nga ca kuti tabeshibe ishina lyakwe ne fyo lipilibula? *

Ukutemwa kwa kwa Lesa ukukalamba Inshita imo ilyo Yesu alepepa kuli Lesa, atile: “Tata, . . . mwantemenwe ilyo icalo tacilabako.” (Yohane 17:24) Ilyo Yesu ali ku muulu, alimwene ukutemwa uko Lesa akwata, e ico ilyo aishile pano calo, na o alelanga ukutemwa nga kulya kwine ukwakwata Wishi mu nshila shalekanalekana.

Yesu alilangile ukuti ukutemwa kwa kwa Yehova kukalamba nga nshi. Atile: “Lesa atemenwe nga nshi aba pano calo ica kuti apeele Umwana wakwe uwafyalwa eka, ukuti onse uumutetekela ekonaika lelo akabe no mweo wa muyayaya.” (Yohane 3:16) Ishiwi lya mu ciGriki ilyo bapilibula ukuti “icalo,” talilosha kwi “sonde.” Icalo balandapo pali ili lembo, bantu bonse abaikalamo. Lesa alitemwa sana abantu ica kuti atumine Umwana wakwe uwatemwikwa pa kuti abantu ba cishinka bengalubuka ku lubembu ne mfwa no kukwata isubilo lwa kwikala umuyayaya. Ukutemwa kwa kwa Lesa kwalikulisha ica kuti te kuti twishibe ne fyo kwakula.—Abena Roma 8:38, 39.

Yesu alikomaile pali ici cishinka ica kuti Yehova alitemwisha umuntu umo na umo uumupepa. Yesu asambilishe ukuti Yehova aba nga kacema uwacindamika impaanga imo na imo. (Mateo 18:12-14) Yesu atile takuli uluseba nangu lumo ulwingapona pa nshi ukwabula Yehova ukwishiba. Alandile no kuti: “Ne mishishi ya ku mitwe yenu yonse yalipendwa.” (Mateo 10:29-31) Nga ca kutila Yehova aleshiba uluseba lumo fye nga taluli pa cisansala, bushe te kuti acilenapo ukusakamana umuntu umo umo uumupepa? Nga ca kutila Yehova kuti apenda no mushishi onse uwa ku mitwe yesu, bushe kuti akaana ukwishiba fyonse ifyo tulepitamo pamo nga, ifyo tulekabila, ifiletucusha, na masakamika tukwete?

Shifwe wa ku muulu Nga filya twacibelenga mu cipande cifumineko, Yesu Mwana wa kwa Lesa uwafyalwa eka. E mulandu wine libili libili aleitila Yehova ati “Tata.” Na kuba, mu mashiwi ya kubalilapo ayalembwa ayo Yesu  alandile ilyo ali mwi tempele ninshi ali fye ne myaka 12, aitile Yehova ati “Tata.” (Luka 2:49) Mu mabuuku ya Mbila Nsuma, ishiwi lya kuti “Tata,” lisangwamo imiku mupepi na 190. Ilyo Yesu alelanda pali Yehova, alebomfya amashiwi yalekanalekana pamo nga “Shinwe,” “Shifwe,” na “Tata.” (Mateo 5:16; 6:9; 7:21) Ifi Yesu alebomfya amashiwi ya musango uyu, alelanga ukuti nangu fye bantu abashapwililika na babembu kuti baba ifibusa ifisuma ifya kwa Yehova.

Wa luse kabili aleleela Yesu alishibe ukuti abantunse abashapwilika balakabila sana uluse ulukalamba ulwa kwa Yehova. Mu cilangililo Yesu ashimike ica mwana walubile, apashenye Yehova ku mufyashi wa nkumbu, uulekelela, uwingapokelela umwana wakwe uwalapila. (Luka 15:11-32) Kanshi amashiwi ya kwa Yesu yalatulanga bwino ukuti umuntu umubembu nga alapila, Yehova alamona kabili kuti amubelela uluse. Yehova alafwaisha ukweleela umubembu nga alapila. Yesu alondolwele ukuti: “Ndemweba nati, e fyo kukaba ukusekelela mu muulu pa mubembu umo uwalapila ukucila pa balungami 99 abashikabila ukulapila.” (Luka 15:7) Nani ashingafwaya ukupalama kuli Lesa uwaba no luse ifi?

Alomfwa amapepo Ilyo Yesu ali mu muulu ninshi talaisa pano calo, alimwene ukuti Yehova ‘aleumfwa amapepo,’ kabili alimwene no kuti Yehova alitemwa ukukutika ku mapepo ya bantu ba cishinka abamupepa. (Amalumbo 65:2) E mulandu wine ilyo alesambilisha abantu, alebasambilisha ne fya kupepa ne fyo balingile ukupepela. Abafundile ukuti pa kupepa, “wilabwekeshapo ukusosa fimo fine.” Akoseleshe abalemukutika ukupepa ukuti ukufwaya kwa kwa Lesa “kucitwe pano isonde nga mu muulu.” E lyo kuti twapepela na pa fya kulya fya ubo bushiku, ukuti Lesa atwelele imembu, no kuti tucimfye amesho. (Mateo 6:5-13) Yesu asambilishe no kuti Yehova alaasuka amapepo ya babomfi bakwe kabili alabapeela ifyo balemulomba mu bufumacumi ne citetekelo, nga filya fine umufyashi musuma acita ku bana bakwe.—Mateo 7:7-11.

Cine cine, Yesu alefwaisha ukusambilisha abantu icine pali Yehova na pa fyo aaba. Lelo kwali icintu na cimbi pali Yehova ico Yesu alefwaisha ukwebako abantu, ne ci cintu, ni nshila Yehova akabomfya pa kwalula ifintu pa calo pa kuti ifyo afwaya isonde na bantunse ukuba, fikafikilishiwe. Na kuba, ili e lyashi ilikalamba ilyo Yesu alelandapo sana ilyo aleshimikila.

[Futunoti]