Ababelenga Ino Magazini Balepusha Ukuti . . .

Bushe pa Kuba Umwina Kristu Kamo Mwasumina Ukuti Kwaba Balesa Batatu?

▪ Icitabo babomfya ku sekondari icitila World Religions in Denmark, icasabankanishiwe mu 2007, calanda ukuti pa Bena Kristu bonse, Inte sha kwa Yehova e bakonka sana ifyo Baibolo ilanda. Na kuba, imipepele ya Nte sha kwa Yehova e yalenga butatu ku bukulu pa macalici yaba mu calo ca Denmark.

Shikofu wa mu mipepele ya Danish National Church, alisuushishe sana uyu kalemba pa kulanda na pa Nte sha kwa Yehova mu citabo alembele. Mulandu nshi amusuushishe? Shikofu atile, “Nshilamonapo uwasambilila pa fya mipepele uulanda ukuti [Inte sha kwa Yehova] Bena Kristu. Inte sha kwa Yehova balakaana icisumino ca kuti kwaba balesa batatu, kabili ici cisumino e cacindamisha ku Bena Kristu.”

Kalemba wa cilya citabo, Annika Hvithamar, uwasambilila sana pa fya mikalile ne mipepele ya bantu, atile abantu nga babepusha umulandu baitila ukuti Bena Kristu, tabalandapo ukuti ni co basumina ukuti muli Lesa umo mwaba balesa batatu. Na kabili icipande caba muli ici citabo icitila “Bushe Muli Bena Kristu?” cilanda ukuti: “Icisambilisho ca kutila muli Lesa umo mwaba balesa batatu, e cisambilisho cakoseshapo ico abasambilila pa fya mipepele basanga.” Calanda no kuti: “Lyonse fye cilafya ukulondolwela umuntu uushasambilila pa fya mipepele umulandu lesa umo uwa Bena Kristu abelamo batatu, mu nshita ya kuti babe fye batatu abalekana.”

Ifyo Baibolo isambilisha pali Lesa na Yesu fyalyanguka ukumfwa, tafya-afya nakalya. Mu Cebo ca kwa Lesa, tamwaba amashiwi ya kuti “balesa batatu” nelyo fye icisambilisho cilanga ukuti kwaliba balesa ba musango uyu. Baibolo ilalondolola bwino ukuti Yesu Kristu Mwana wa kwa Lesa, ibeli lyakwe. (Abena Kolose 1:15) Na kabili itila Yesu ni “kawikishanya . . . pa kati ka kwa Lesa na bantu.” (1 Timote 2:5) Ilyo ilanda pali Wishi, itila: “Imwe mweka, mwe bakwata ishina lya kuti Yehova, ni mwe Mwapulamo pano isonde ponse.”—Amalumbo 83:18.

Inte sha kwa Yehova balisumina ukuti ukutetekela Yesu kwalicindama. (Yohane 3:16) E mulandu wine bakonkela sana ukukonkomesha kwa kwa Yesu ukwa kuti: “Calilembwa ukuti, ‘Yehova Lesa obe e o ulepepa, kabili eka fye e o ulebombela.’” (Mateo 4:10) Kanshi umuntu uwesha sana ukumfwila amafunde ya kwa Yesu e Mwina Kristu.

[Amashiwi pe bula 22]

“Icisambilisho ca kutila muli Lesa umo mwaba balesa batatu, e cisambilisho cakoseshapo ico abasambilila pa fya mipepele basanga”