Mulandu Nshi Lesa Aonawilile Abena Kanaani?

“Mufwile ukubonaula, abena Hiti na bena Amore, abena Kanaani na bena Perisi, abena Hibi na bena Yebusi, nga filya fine Yehova Lesa wenu amwebele.”—AMALANGO 20:17.

‘Muleba aba mutende ku bantu bonse.’—ABENA ROMA 12:18.

BUSHE aya malembo yalapilikana? Abengi balafilwa ukwishiba bwino ico Lesa aebele abena Israele ukonaula abena Kanaani pantu Baibolo itila tufwile ukuba aba mutende ku bantu bonse. * (Esaya 2:4; 2 Abena Korinti 13:11) Abengi bamona kwati aya malembo yabili yalapilikana.

Nga ca kuti mwali no kulanshanya ili lyashi na Lesa, finshi mwingamwipusha? Natulande pa mepusho 5 ayo abengi bepusha, tumone ne fyo Baibolo yasuka aya mepusho.

1. Mulandu nshi abena Kanaani babatamfishe mu calo? Nga kukonka, icalo abena Kanaani baleikalamo tacali cabo. Cinshi twalandile fi? Pantu imyaka nalimo 400 ku numa, Lesa alaile umwaume wa cishinka Abrahamu ukuti abakafuma mu lupwa lwakwe akabapeela icalo ca Kanaani. (Ukutendeka 15:18) Lesa alifikilishe ubulayo bwakwe ilyo alekele abena Israele, abatuntwike muli Abrahamu, ukwikala muli cilya calo. Lelo bamo kuti batila, abena Kanaani e baleikala muli cilya calo ukufuma na kale, kanshi cali calo cabo. Kwena, apo Lesa e Kabumba wa fintu fyonse, alikwata insambu sha kupingula uko umuntu onse afwile ukwikala.—Imilimo 17:26; 1 Abena Korinti 10:26.

2. Mulandu nshi Lesa ashalekele fye abena Kanaani ukulaikala mu calo cimo cine na bena Israele? Lesa asokele abena Israele pa bena Kanaani ukuti: “Tabafwile ukwikala mu calo cobe, pa kuti bekulenga ukubembukila ine. Nga ca kutila wabombela balesa babo, cikaba citeyo kuli iwe.” (Ukufuma 23:33) Inshita imbi, kasesema Mose aebele abena Israele ukuti: “Ni pa mulandu wa fyabipa ificita ishi nko e co Yehova Lesa wenu aleshitamfisha.” (Amalango 9:5) Fintu nshi ifyabipa ifyo ishi nko shalecita?

Abena Kanaani balecita sana ubulalelale, balepepa balesa ba bufi no kupeela abana amalambo kuli balesa ba bufi. Kalemba wa lyashi lya kale ilya mu Baibolo Henry H. Halley atile abaleshula ifintu mu Kanaani “basangile imitondo iingi umwali amafupa ya bana abo balepeela amalambo kuli Baali [lesa uo abena Kanaani balepepa sana].” Asosele no kuti: “Incende yonse yali ni nshiishi ya tunya. . . . Abena Kanaani balecita ubulalelale pa kupepa balesa babo, kabili baleipaya na mabeli yabo no kubapeela amalambo kuli aba bene balesa. Icalo ca Kanaani calibipile kwati fye ni filya fine imisumba ya Sodomu na Gomora  yabipile. . . . Abashula ifya kushulashula mu Kanaani balapapa ico Lesa ashaonawilile abena Kanaani bwangu.”

3. Bushe pa calo tapali abantu babipa na bambi ilya nshita? Mulandu nshi Lesa aonawilile fye abena Kanaani? Pa nshita shalekanalekana isho Lesa aonawile abantu babipa, alesala pa kubonaula. Ilyo “pano isonde . . . pafulile ubunkalwe” mu nshiku sha kwa Noa, Lesa aletele ilyeshi ilyaonawile abantu bonse ukufumyako fye ulupwa lwa kwa Noa. (Ukutendeka 6:11; 2 Petro 2:5) Lesa alyonawile umusumba wa Sodomu na Gomora ilyo imembu sha bantu balimo ‘shabipishe.’ (Ukutendeka 18:20; 2 Petro 2:6) Na kabili apingwile ukonaula Ninebe, umusumba ukalamba uwa calo ca Asiria, ‘umusumba uwalesumya umulopa,’ lelo taonawile uyu musumba ilyo abena Ninebe balapiile. (Nahumu 3:1; Yona 1:1, 2; 3:2, 5-10) Lelo ico aonawilile abena Kanaani alefwaya ukucingilila abena Israele, uluko umwali no kwisafuma Mesia.—Amalumbo 132:11, 12.

4. Bushe filya Lesa aonawile abena Kanaani tafipilikana na mashiwi yatila Lesa kutemwa? Umuntu nga tatontonkenyepo sana kuti amona kwati filya Lesa aonawile abena Kanaani filapilikana no kutemwa kwakwe. (1 Yohane 4:8) Lelo, nga twatontonkanya sana pa fyo ifintu fyali e lyo twingamona ukuti kutemwa kwalengele onaule abena Kanaani.

Ni kale sana Lesa aishibe ukuti abena Kanaani balecita ifyabipa. Lelo tabonawile lilya line fye, alekele papita ne myaka 400 mpaka ifilubo fyabo ‘fyafika ku kubipisha.’—Ukutendeka 15:16.

Lintu imembu sha bena Kanaani shabipishe ica kuti te kuti balapile, Yehova alibonawile. Na lyo line, taonawile abena Kanaani bonse. Mulandu nshi? Pantu bamo balilapile. Abalapile, pamo nga Rahabu na bena Gibeone, alibabelele uluse.—Yoshua 9:3-11, 16-27; AbaHebere 11:31.

5. Mulandu nshi Lesa wa kutemwa engonawila abantu? Abantu kuti baipusha ici cipusho pantu ukonaula ubumi bwa muntu takwawama. Lelo icalengele Lesa ukonaula ababifi mulandu wa kutemwa. Natulangilile: Nga ca kutila umuntu nakwata icilonda icishipola, ilingi line ico badokota bengacita fye kuputula icilundwa ukuli icilonda. Banono badokota abengatemwa ukucite fi, lelo dokota uwaishiba  bwino ukundapa alishiba ukuti ukucite fi e kwingafwa umulwele ukucila ukuleka fye icilonda cilekulilako. Nangu ca kutila dokota akomfwa ububi ukuputula icilundwa ca mulwele, akacite co pantu alimutemwa kabili naishiba no kuti ukucite fi e kukafwa umulwele.

E fyo cali na kuli Yehova, na o wine tatemenwe ukonaula abena Kanaani. Umwine atila: “Nshisekelela mu mfwa ya mubifi.” (Esekiele 33:11) E lyo kabili, alefwaya ukuti mu luko lwa bena Israele e mo mukafume Mesia, uwali no kulenga abantu bonse abakamutetekela ukupusuka. (Yohane 3:16) Kanshi, Lesa tali na kuleka abena Israele ukukoweshiwa ne misango yabipa iya bena Kanaani. E co aebele na bena Israele ukonaula abena Kanaani nelyo ukubatamfya mu calo. Lesa tatemenwe ukonaula abena Kanaani, lelo e nshila alangilemo ukutemwa kukalamba pa kuti bakapepa bakwe aba cishinka bamwenemo.

Ifyo Twingasambililako

Bushe finshi twingasambililako kuli filya abena Kanaani babonawile? Pa Abena Roma 15:4 patila: “Fyonse ifyalembelwe kale fyalembelwe ku kutufunda, pa kuti mu kushipikisha kwesu na mu cisansamushi ca mu Malembo tube ne subilo.” Bushe ifyacitike mu Kanaani fitufunda finshi, kabili fitulenga shani ukuba ne subilo?

Kuli ifi fyacitike tulasambililako ifintu ifingi nga nshi. Ku ca kumwenako, pa mulandu wa luse lwakwe, Lesa taonawile Rahabu na bena Gibeone ilyo bamutetekele. Ici citusambilisha ukuti umuntu onse uulefwaya ukusekesha Lesa kuti acite fyo, te mulandu ne membu acitile nelyo inkulilo yakwe.—Imilimo 17:30.

Amalyashi ayalanda pa konaulwa kwa bena Kanaani yalatulenga ukuba ne subilo pantu yatulanga ifyo Lesa ali no kucita nomba line fye. Yatulenga twacetekela ukuti Lesa takaleke ububifi ukucimfya ubusuma. Baibolo itulanga ukuti nomba line fye Lesa ali no konaula abantu bonse ababipa, kabili akapususha bonse abamutemwa no kubengisha mu calo cipya umukaba ubulungami. (2 Petro 2:9; Ukusokolola 21:3, 4) Pali ilya nshita, aya mashiwi ya kusansamusha yakafikilishiwa ayatila: “Lolela Yehova no kusunga inshila yakwe, na o akakusansabika ku kupyana icalo. Ilyo ababifi bakalofiwa, ukamonako.”—Amalumbo 37:34.

[Futunoti]

[Akabokoshi pe bula 14]

Bushe Baibolo Yalisuminisha Ukulwa Inkondo?

Bushe filya Lesa aebele abena Israele ukonaula abena Kanaani filangilila ukuti na muli shino shine nshiku caliba fye bwino ukulwa inkondo? Awe, ne co twa-asukila ifi mulandu wa fishinka fitatu ifyakonkapo:

▪ Takwaba uluko pano calo ulo Lesa atemwisha ukucila inko shimbi. Ilyo abena Israele bakeene Yesu ukuti te wali Mesia, palya pene epo Lesa alekele ukubabomfya mu milimo yalekanalekana ukubikako fye na mu konaula abalwani bakwe. (Mateo 21:42, 43) Yehova atendeke ukumona abena Israele nge nko shimbi ishashala. (Ubwina Lebi 18:24-28) Ukutula ilya nshita ukufika na lelo, tapaba uluko pano calo ulwingatila e lo Lesa asala kabili e lo afwilisha mu nkondo.

▪ Yehova tatila abamupepa balingile ukuba fye mu calo cimo nelyo ku ncende fye imo. Lelo, ababomfi bakwe balasangwa “mu nko shonse ne mitundu” pano calo.—Ukusokolola 7:9; Imilimo 10:34, 35.

▪ Yesu alilondolwele bwino ukuti abasambi bakwe tabalingile ukulwa inkondo. Ilyo alebasoka pa fyo Yerusalemu yali no kusanswa, abebele ukuti tabalingile ukwikala mulya mwine no kulwako inkondo, lelo abebele ukuti balingile ukufulumukamo, na kabushe e fyo bacitile. (Mateo 24:15, 16) Mu nshita ya kulwa inkondo, Abena Kristu ba cine bacetekela Ubufumu bwa kwa Lesa, pantu nomba line buli no kupwisha ifyabipa fyonse pano calo.—Daniele 2:44; Yohane 18:36.

[Icikope pe bula 15]

lfyacitile Rahabu filanga ukuti umuntu onse uulefwaya kuti atetekela Lesa