Palameni Kuli Lesa

Yehova Alitupeela Ubuntungwa bwa Kuisalila

Amalango 30:11-20

UMWANAKASHI umo Umwina Kristu, uwalemona ukuti ifyabipa ifyamucitikile ilyo ali umwaice kuti fyalenga afilwa ukubombela Yehova atile: “Ilingi ndatiina, imona kwati nshakatwalilile ukuba uwa cishinka kuli Yehova.” Bushe na imwe e fyo mumona? Bushe ca cine ukuti ifyatucitikilapo mu bumi kuti fyalenga twafilwa ukutwalilila aba cishinka kuli Lesa? Awe nakalya. Yehova Lesa alitupeela insambu ya kuisalila, kanshi kuti twasala fwe bene ifyo tulefwaya ukulacita mu bumi. Yehova afwaya ukuti tulesala bwino, kabili Icebo cakwe Baibolo, cilatweba ifya kucita pa kuti tusale bwino. Natulande pa mashiwi Mose asosele ayaba mu Amalango icipandwa 30.

Bushe calyafya ukwishiba no kulacita ifyo Lesa afwaya? * Mose atile: “Ili funde ndemweba lelo talikosele sana kuli imwe ukulikonka, kabili talili ukutali.” (Icikomo 11) Yehova tatweba ukucita ico tushingakumamo ukucita. Ifyo afwaya ukuti tulecita tafyakosa kabili te kuti tufilwe ukuficita. Na kabili, ifyo Lesa afwaya ukuti tulecita kuti twafishiba. Pa kuti twishibe ifyo Lesa afwaya ukuti tulecita, tatufwile ukunina “mu muulu” nelyo ukuya “bushilya bwa bemba.” (Icikomo 12 na 13) Baibolo ilatweba bwino bwino ifyo tufwile ukucita.—Mika 6:8.

Na lyo line, Yehova tatupatikisha ukuti tulemumfwila. Mose atile: “Nabika ku cinso cenu lelo umweo no busuma, kabili imfwa no bubi.” (Icikomo 15) Twalikwata ubuntungwa bwa kusala umweo nelyo imfwa, ubusuma nelyo ububi. Kuti twasalapo ukupepa Lesa no kumumfwila e lyo twakwata na amapaalo, nelyo kuti twasalapo ukukanamumfwila ica kuti twacula pa mulandu wa kukanamumfwila. Ni fwe fwe bene tulingile ukusala, nampo nga kumumfwila nelyo ukukanamumfwila.—Ifikomo 16-18; Abena Galatia 6:7, 8.

Bushe ifyo tusalapo ukucita filakuma Yehova? Ee filamukuma sana! Mose uwaletungululwa no mupashi wa kwa Lesa atile: “Saleni umweo.” (Icikomo 19) Nomba bushe kuti twasala shani umweo? Mose alondolwele ukuti: ‘Ni pa kulatemwa Yehova Lesa wenu, pa kulaumfwila ishiwi lyakwe na pa kulambatila kuli ena.’ (Icikomo 20) Nga twatemwa Yehova, tukalamumfwila kabili tukalambatila kuli ena te mulandu ne cingacitika. Nga twacite fi ninshi twasala umweo, kabili ifi fine e fyo tulingile ukucita pa kutila imikalile yesu ibe bwino ino nshita kabili kuti twaisaikala umuyayaya mu calo cipya ica kwa Lesa.—2 Petro 3:11-13; 1 Yohane 5:3.

Amashiwi Mose alandile yalatusambilisha icine ica kutusansamusha nga nshi. Nangu ifintu fimo ifyabipa fyalimucitikila muli cino calo cabipa, te kutila muli ba cabecabe nelyo ukuti tapali ifyo mwingacita mu bumi. Yehova alimucindika pa kumupeela ubuntungwa bwa kuisalila. Kuti mwasala ukutemwa Yehova, ukumumfwila, no kuba aba cishinka kuli ena. Nga mwasala ukucite fi, Yehova akamupaala.

Ici cishinka ca kuti twalikwata ubuntungwa bwa kusala fwe bene ukutemwa Yehova no kumubombela, calisansamwishe nga nshi ulya mwanakashi twacilandapo pa kubala. Atile: “Nalitemwa Yehova. Lelo limo ndalaba ukutila icacindama sana ca kuti nalitemwa Yehova. Kanshi kuti naba uwa cishinka.” Na imwe bene Yehova kuti amwafwa ukuba aba cishinka.

[Futunoti]