Imbila Nsuma mu Fitundu 500

ILYO mu calo ca Rwanda mwali inkondo, abantu bamo abanono abapilibula impapulo balifulumwikemo no kusha amayanda yabo ne fipe. Lelo ilyo balefulumuka, balisendele na makompyuta yalya ayanono ayo basendela mu cola. Cinshi basendele aya makompyuta? Balefwaya kuti baleyabomfya mu nkambi sha mbutushi umo balebutukila pa kuti bakatwalilile ukupilibula impapulo shilanda pa fyaba mu Baibolo mu citundu ca Kinyarwanda.

Umwanakashi umo uwikala mu Asia, nanaka nga nshi kabili nakukaba icipesha amano e lyo amalaiti nayo yaleyayaya fye, lelo atwalilile fye ukulemba ifyebo pa kompyuta mpaka pa kati ka bushiku. Cinshi alefwaya? Alefwaya ukutuma ifyebo alelemba pa nshita filingile ukupulintilwapo.

Aba bakapilibula baba pa bantu baipeelesha 2,300, ababombela mu fifulo ukucila pali 190 mwi sonde lyonse. Imyaka ya kufyalwa iya aba bakapilibula yatampila pali 20 ukufika mupepi na 90 kabili balabombesha pa kutila abantu bapokelele imbila ya cisansamushi iyaba muli Baibolo mu fitundu 500.—Ukusokolola 7:9.

Impapulo mu Fitundu Fyalekanalekana

Mu myaka ya nomba line, umulimo Inte sha kwa Yehova babomba uwa kupilibula impapulo walikulilako. Ku ca kumwenako, mu mwaka wa 1985, magazini ya Ulupungu lwa kwa Kalinda baleipilibwila mu ndimi 23 kabili lyonse yalefuma ibili cila mweshi, uku kwali kubombesha pali ilya nshita. Nomba lelo, iyi magazini baipilibwila mu fitundu 176, kabili cila mweshi ilafuma ibili pa kuti abantu mwi sonde lyonse baisambilile pa nshita imo ine.

Kwaliba ifitundu fimo 50 muno calo ifishakwata impapulo ishili shonse, lelo Ulupungu lwa kwa Kalinda lweka fye e lupapulo bakwata. Mulandu nshi? Pantu utwampani utupulinta impapulo tatwatemwa ukupulinta impapulo mu fitundu fya bekala calo bamo. Lelo Inte sha kwa Yehova mwi sonde fye lyonse, balasangula indalama pa kutila abantu balekwata Icebo ca kwa Lesa ne mpapulo shilanda pa fyaba mu Baibolo.—2 Abena Korinti 8:14.

Abantu balatemwa sana ukubelenga amashiwi ya mu Baibolo mu fitundu fyabo. Ku ca kumwenako, nomba line, impapulo shilanda pa fyaba mu Baibolo shalilembwa mu citundu ca Miskito, ico abantu nalimo 200,000 balanda mu calo ca Nicaragua. Umwanakashi umo alilombele ukuti bamupeeleko icitabo ca kutila, Icitabo Candi ca Malyashi ya mu Baibolo * mu citundu ca Miskito, kabili ilyo bamuleteele ici citabo, shimapepo umo alemonako. Ilyo uyu shimapepo amwene ifyo icitabo caweme, alombele umwanakashi ukuti amupeele. Umwanakashi na o alikaninine fye ukumupeela cilya citabo nangu ca kutila uyu shimapepo amwebele ukuti alamupeela isaka lya nseke sha kofi ishafinine amakilogramu 20!

 Mu myaka 10 iyapita, impapulo shilanda pa fya mu Baibolo shalipilibulwa mu fitundu ukucila pali 12, ifyo balanda mu Mexico, ukubikako ne ciMaya, iciNahuatl ne ciTzotzil. E lyo mu myaka 10 iyapita, ifilonganino fya Nte sha kwa Yehova, ukusanshako ne filonganino ifibomfya ululimi lwa bacibulu ulwa fishibilo, fyalifulilako ukufuma pali 72 ukufika kuli 1,200. Inte sha kwa Yehova balashimikila abantu imbila nsuma yaba mu Baibolo, lelo ni Lesa umwine e ulenga abantu ukumfwikisha no kukonka ifyo basambilila.—1 Abena Korinti 3:5-7.

Baibolo Iisuma Iyapilibulwa mu Fitundu 80

Mu myaka ya nomba line, Inte sha kwa Yehova balibombesha ukupilibula Baibolo ya Amalembo ya Calo Cipya mu fitundu 80. Mu fitundu fimo baipilibula fye yonse e lyo muli fimbi bapilibulako fye amabuuku yamo yamo. Bushe abantu baumfwa shani? Nte umo mu South Africa alandile pali Baibolo yapilibulwa mu ciTswana ukuti: “Iyi Baibolo isuma nga nshi. Ikangafwa ukumfwikisha Icebo ca kwa Lesa. Amashiwi yabamo yalyanguka ukubelenga ica kuti nga ulebelenga uleumfwa na bwino.” Umuntu na umbi uwa ku Mozambique uubelenga iciTsonga alembele ati: “Ukukwata fye impapulo shilanda pa fyaba mu Baibolo ukwabula ukukwata Baibolo, cimo cine no kubyata kwa nkuba ne cibulukutu lelo ukwabula imfula! Nomba ifi Baibolo ya Amalembo ya Calo Cipya yafuma mu ciTsonga, caba kwati imfula yaliloka.”

Bonse abapilibula impapulo no kwebako bambi imbila nsuma iyaba muli Baibolo bafikilisha amashiwi ya kusesema ayalembelwe kale muli Baibolo. Yesu Kristu umwine e walandile ukuti: “Imbila nsuma iyi iya bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.”—Mateo 24:14.

[Futunoti]

[Icikope pe bula 25]

(Nga mulefwaya ukumona icikope, moneni muli magazini)

BAIBOLO YA AMALEMBO IMPAPULO

YA CALO CIPYA SHIMBI

Bapilibula Baibolo yonse

nelyo Amalembo fye yamo

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

IMPENDWA YA FITUNDU

[Ifikope pe bula 24, 25]

Abantu abaipeelesha 2,300 e bapilibula impapulo shilanda pa fyaba mu Baibolo mu fitundu 500

BENIN

SLOVENIA

ETHIOPIA

BRITAIN