Isukulu Lya Gileadi Ilyalenga 126

Ifya Kucita pa Kubomba Bwino Bumishonari

PA CIBELUSHI pa 14 March mu 2009, abantu abengi nga nshi abali ne nsansa balilongene pa Watchtower Educational Center ku Patterson, mu musumba wa New York. Pali ubu bushiku, epo abali mwi kalasi lyalenga 126 bapwishishe amasambililo mwi Sukulu lya Gileadi. Aba bapwishishe isukulu bali no kubatuma mu fyalo 22 ku kushimikila imbila nsuma ya Bufumu bwa kwa Lesa.—Mateo 24:14.

Abali muli ili isukulu e lyo fye bapwishishe ukusambilila ifintu ifingi ifya muli Baibolo mu myeshi fye isano kabili ifyo basambilile fyali no kubafwa ukubomba bwino bumishonari. Ubu bushiku e bwali ubwa kulekeleshako ukukutika ku fyebo fyali no kubafwa ukuba bamishonari bafikapo.

Ba Anthony Morris ababa mwi Bumba Litungulula ilya Nte sha kwa Yehova kabili abali ba ceyamani pali uku kulongana, balandile ukuti Isukulu lya Gileadi ilya bumishonari lyatendeke mu 1943. Ukutula apo ili sukulu lyatendekele, bonse abapitamo balashimikila sana mwi sonde lyonse, kabili mu kubombesha kwabo mulafuma ifisuma ifingi.

Ba Morris batile, nangu ca kutila bakalemba na baFarise balemona abatumwa ba kwa Yesu ukuti bali “abashasambilila kabili abantu yaweyawe,” basangile ukuti icalengele balelanda mu kushipa ni co baali pamo na Yesu. (Imilimo 4:13) Ifyo abaya kuli ili isukulu basambilila, e filenga ukuti balelanda mu kushipa.

Ba Robert Ciranko abafwilisha muli Komiti ya Kulemba impapulo iye Bumba Litungulula balandile ilyashi ilyaleti, “Mwilakonka Ifyo Abantu Bamoneka pa Menso.” Balandile ukutila abalepwisha isukulu bakayasanga abantu abapusanapusana, kabili abakwata ne ntambi ishapusana. Nomba tabakakwate ubwafya bwa kushimikila abantu ba musango yu nga ca kutila balepashanya Yehova. Ilembo lya Imilimo 10:34 nga kulikonka fye mu ciGriki lipilibula ukuti, “Lesa takonka ifyo abantu bamoneka pa menso,” e kutila Lesa tatemwapo umusango wa bantu umo no kupata bambi. “Lesa taba na kapaatulula.” (Imilimo 10:35) Munyinefwe Ciranko alandile no kuti, “nga ca kuti mwalapashanya Lesa no kulamona abantu bonse uko mwakulabombela ukutila nabo bene kuti bapokelelwa kuli Lesa, ninshi mukabomba bwino sana bumishonari.”

“Namukwata Ifikamwafwa Ukubomba Bwino Umulimo”

Ba Samuel Herd ababa mwi Bumba Litungulula batendeke ilyashi lyabo na mashiwi ya kuti, “abantu bamo batila ingamila taimoneka bwino, nomba filya fine yapangwa e filenga ukuti ilinge ukwikala mu ciswebebe.” Ifi fine, e fyo na aba bamishonari abapya bali, nabakwata ifya kubafwa ukubomba bwino umulimo mu fyalo balabatuma. Kuli ifintu fisano ifikabafwa ukubomba bwino.

1. Ukutemwa Yehova. (Mateo 22:37, 38) Abalepwisha isukulu balilanga kale kale ukuti balafwaisha ukubombela Yehova.

2. Ifyo basambilila kale mu Cebo ca kwa Lesa. Ingamila isungila ifya kulya mu ntengele nelyo icifutu. Nomba taileka ukulya pantu fye naisunga ifya kulya. E fyo na bamishonari balingile ukuba, tabalingile ukulabomfya fye ifyo basambilile ku Sukulu lya Gileadi epela, lelo balingile ukutwalilila ukulasambilila Icebo ca kwa Lesa.

3. Ukutemwa abantu. (Mateo 22:39) Aba abalepwisha isukulu baliba ne cikuuku ku bantu.

4. Ukuitemenwa ukubomba. (Amalumbo 110:3) Ilyo amaka ya kwa mishonari yapwa, Yehova akalamukosha.—Esaya 40:29.

 5. Amaka ya bulumendo. Filya fine ingamila isenda umuntu mu ciswebebe, e fyo na bamishonari balingile ukula-afwa Abena Kristu banabo abali na mafya ilyo balebombela Yehova. Uyu mulimo walikosa, nomba bamishonari kuti babomba bwino pantu balikwata amaka ya bulumendo.

Amalyashi na Yambi Ayaliko

Ba Michael Burnett, bakafundisha mwi Sukulu lya Gileadi, balandile ukuti pa fintu Yakobo atumiine imfumu ya ku Egupti, pali na ma-almonde. (Ukutendeka 43:11) Ama-almonde nangu yali fye ayanono yalapeela sana amaka ku mubili. Ilyo abapwishishe isukulu balesambilila, cali kwati balelya ama-almonde ayengi nga nshi aya Cebo ca kwa Lesa. Balisambilile ifintu ifingi, nomba fimo ifyo bali no kulaibukisha sana fya kuti balingile ukuteka imitima ku fintu Yehova alebapeela e lyo no kutemwa icalo babatumako.

Ba Mark Noumair, bakafundisha na bambi abe Sukulu lya Gileadi, balondolwele ukuti Icebo ca kwa Lesa caba kwati ‘mufuko wa mano.’ (Yobo 28:18) Tulingile ukwisula uyu mufuko no kubomfya amano yabamo. Nga ca kuti bamishonari tabasangile ifyo bale-enekela mu mulimo wabo uwa bumishonari, balingile ukutontonkanya pa mutumwa Paulo. Abasambi ba kwa Yesu, bamutumine kwi tauni afumine uko ailebombela pa myaka 9. Mu nshita ya kutontonkanya ukuti alingile ukubombela ku ncende imbi pantu ali ‘cipe icasalwa,’ Paulo alebombesha konse uko aleya. (Imilimo 9:15, 28-30) Ukukonka ifyo Yehova aletweba limo kulafya. Umuntu na umbi uwacitile ifyo Yehova alefwaya ni Yonatani. Ilyo aishibe ukuti Yehova nasala Davidi ukuba imfumu, Yonatani alemwafwilisha.

Mu lyashi lyaleti “Ababomfi ba kwa Lesa Balashipa pa Kulanda,” e mo abalepwisha isukulu balangilile ifisuma ifyalecitika ilyo baleshimikila pa nshita bali mu kalasi. Abengi balitendeke no kusambilisha abantu Baibolo. Ilyashi lyakonkelepo lyaleti, “Ukuteyanya kwa kwa Yehova Kwalibakansha.” Muli ili lyashi balipwisheko bamishonari batatu ababomba uyu mulimo pa myaka iingi. Cila muntu alilondolwele ifyo akanshiwe ukulakonka ubutungulushi bwa kwa Lesa.

“Beni Bamishonari ba Nsansa”

Ba Gerrit Lösch, ababa mwi Bumba Litungulula, balandile ilyashi likalamba pali uku kulongana ilyaleti, “Beni Bamishonari ba Nsansa.” Balandile ukutila ifingi ifyo bamo bamona kwati e “fisuma” tafileta insansa sha cine cine. (Amapinda 14:13; Lukala Milandu 2:10, 11) Umuntu kuti akwata insansa sha cine cine nga ca kuti fye alecita ifyo Lesa afwaya nangu ca kuti ukucite fi kwalyafya. Isukulu lya Gileadi lyalikosele, lelo abapwishishe isukulu bali ne nsansa sana.

Kwaliba ifintu ifingi ifilenga Abena Kristu ba cine ukuba ne nsansa. Bapepa Lesa wa nsansa. (Amalumbo 33:12; 1 Timote 1:11) Baba muli paradaise wa ku mupashi, kabili Baibolo yalaya ukutila nomba line fye cino calo cili no kuba paradaise. Balishiba no kuti ico babela pano calo kubombela Yehova no kulamulumbanya. Ne cacilapo ca kuti balitemwikwa kuli Yehova na Yesu.

Ba Lösch balandile no kuti, “Mukaba bamishonari ba nsansa nga ca kuti mwasambilila ukulateka imitima ku fintu mukwete.” Cimbi icingalenga mwaba ne nsansa, kutemwa abantu bambi no kutemwikwa kuli bena. E ico mwilakusha ifilubo fya bambi, nga bamulufyanya mulesuulako fye. Mulecitila abantu ifisuma, muleafwa abanaka mu kupepa, muleshimikilako bambi ifisuma ifyamucitikila.  (Amalumbo 41:1, 2; Imilimo 20:35) Umuntu aba ne nsansa nga ca kuti alebombesha mu mulimo wa kushimikila.—Luka 11:28.

Ba Lösch balekeleshe na mashiwi ya kuti, “Kabiyeni, kabombeni umulimo wa bumishonari ne nsansa, limo muleangalako lelo mulebika sana amano ku kulumbanya Yehova Lesa wesu uwa nsansa, no kulenga bambi ukuba ne nsansa.”

Pa numa ya kubelenga imitende bamunyinefwe mu fyalo fyalekanalekana batumine, ba Anthony Morris bapeele abapwishishe isukulu amadipuloma. Lyena umo pa baali muli ili kalasi lyalenga 126 abelengele kalata iyo balembeele Ibumba Litungulula, umo batashishe pa kusangwa kwi Sukulu lya Gileadi.

Pa kulekelesha, ceyamani alandile ukuti “imfyufyu ne mishipa” e fikatanya umubili kabili bafipashanya ku fintu ifyo “umusha wa cishinka kabili uwashilimuka” apeela abantu ba kwa Yehova pa kuti babe abakosa mu kupepa e lyo no kubatungulula. (Abena Kolose 2:18, 19; Mateo 24:45) Abapwishishe isukulu nga balebombela pamo na bantu abo Lesa asonta, bakabomba bwino sana umulimo wa kushimikila.—2 Timote 4:5.

[Akabokoshi pe bula 30]

IFIPENDO FYA BALI MU KALASI

Bafumine mu fyalo: 6

Bakayabombela mu fyalo: 22

Abasambi bonse pamo bali: 5

Bonse balyupa nangu ukuupwa

Imyaka ya kufyalwa ili: 32.8

Imyaka baba mu cine ili: 17.9

Imyaka babomba mu mulimo wa nshita yonse ili: 13.5

IFYALO BABATUMINEKO

Babatumine ku Benin, Bolivia, Bulgaria, Burkina Faso, Cameroon, Costa Rica, Ghana, Guatemala, Honduras, Kenya, Liberia, Madagascar, Mozambique, Nicaragua, Panama, Paraguay, Peru, Romania, Sierra Leone, South Africa, Togo, na ku Uganda.

[Icikope pe bula 31]

Abapwishishe Isukulu lya Gileadi Ilyalenga 126

Ukupenda kutampiile ku ntanshi ukulola ku numa, amashina yena yatantikwe ukufuma ku kuso ukulola ku kulyo mu mulongo umo na umo.

(1) Kirchhoff, K.; Nichols, C.; Guzmán, Y.; Coil, H.; Becker, O.; De Simone, A. (2) Manzanares, A.; Bouvier, E.; Peddle, J.; Mason, H.; Braz, J. (3) Lee, J.; Forte, A.; Boucher, T.; Marsh, A.; Leighton, S.; Glover, M. (4) Kambach, H.; Jones, T.; Ferreira, A.; Morales, J.; Chicas, S.; Davis, B.; Dormanen, E. (5) Dormanen, B.; Nichols, J.; Pacho, T.; Titmas, L.; Bouvier, E.; Kirchhoff, A. (6) Leighton, G.; Pacho, A.; Van Campen, B.; Manzanares, A.; Rivard, A.; Lee, Y.; Titmas, L. (7) Boucher, M.; Coil, K.; Marsh, C.; Guzmán, J.; Jones, W.; Kambach, J. (8) Glover, A.; Ferreira, G.; Mason, E.; Forte, D.; Davis, N.; Chicas, O.; Rivard, Y. (9) Braz, D.; Van Campen, D.; Morales, A.; De Simone, M.; Becker, M.; Peddle, D.