Ukupepa kwa Cine Kulasambilisha Abantu Ukucindika Icebo ca kwa Lesa

YESU alesambilisha abantu ukucindika Icebo ca kwa Lesa, Baibolo. Icilanga ukuti cine cine alicindike Icebo ca kwa Lesa fintu aleasuka Satana Kaseebanya ilyo alemutunka. (Mateo 4:4-11) Ku ca kumwenako, ilyo Satana amwebele ukusangusha amabwe ukuba umukate, cinshi Yesu acitile? Yesu alikeene kabili ayambwile amashiwi ya kwa Lesa ayo Mose alembele ayaba pa Amalango 8:3. Kabili ilyo Satana Kaseebanya aebele Yesu ukuti alamupeela amabufumu yonse ayaba pe sonde nga ca kuti amupepako fye panono, bushe Yesu acitile shani? Alikeene kabili abomfeshe amashiwi yaba pa Amalango 6:13.

Baleni tontonkanyeni, nangu ca kuti Yesu ali Mwana wa kwa Lesa, ashintilile pa Cebo ca kwa Lesa ukumwafwa ilyo alesambilisha. Kabili tasuulile Icebo ca kwa Lesa pa mulandu wa ntambi sha bantu. (Yohane 7:16-18) Lelo bashimapepo abengi mu nshita yakwe, tabacindike Icebo ca kwa Lesa nge fyo ena acicindike. Mulandu nshi? Pantu bacindikishe intambi sha bantu ukucila Amalembo ya Mushilo. Yesu alibebelepo ati: “Namulenga icebo ca kwa Lesa ukuba ica fye pa mulandu wa ntambi shenu. Mwe ba bumbimunda mwe, Esaya aliseseme bwino pali imwe, ilyo atile, Aba bantu bancindika fye pa tunwa twabo, lelo imitima yabo yalitaluka kuli ine. Kwa fye ukupepa uko bampepa, pantu ifisambilisho basambilisha mafunde ya bantu.”—Mateo 15:6-9.

Imipepele iingi iya Bena Kristu ukubikako fye ne mipepele imbi iishili ya Bena Kristu, batila balicindika Baibolo. Lelo mipepele inga  mwaishiba iikaana ukukonka intambi nga ca kutila shilepusana ne fyo Icebo ca kwa Lesa cilanda? Natulandeko pa fintu fibili.

NATULANDE PA: Mashina ya bashimapepo aya malumbo.

IFYO BAIBOLO ISAMBILISHA: Yesu alisuushishe bashimapepo abali mu nshita yakwe pa fyo batemwishishe amashina ya malumbo no kufwaisha ukucindikwa. Atile aba baume “batemwa ne fya kukuwamapo fya ntanshi ku mitebeto, ne fipuna fya ntanshi mu masunagoge, no kuposhiwa mwi sokoni, no kwitwa ku bantu, Rabi.” Lelo Yesu aebele abasambi bakwe ati: “Lelo imwe mwiitwa Rabi; pantu Kasambilisha wenu umo, na imwe muli ba bwananyina. Kabili mwiita uwa pano isonde, Tata; pantu Shinwe umo, uwa mu muulu.”—Mateo 23:1-10.

ICIPUSHO: Bushe bashimapepo ba mu mipepele mwaishiba balitemwa ukwitwa amashina ya malumbo kabili balafwaisha ukulumbuka, nelyo bushe balakonka ifunde lya kwa Yesu ilya kukanatemwa ifi fintu?

NATULANDE PA: Kubomfya ifipasho pa kupepa.

IFYO BAIBOLO ISAMBILISHA: “Wilacita cabaswa, icipasho ca cintu conse ca mu muulu ku muulu, nangu ca mu calo pa nshi, nangu ca mu menshi mwi samba lya calo: wilafishinshimuna, nangu kufibombela.”—Ukufuma 20:4, 5.

Umutumwa Yohane alembeele Abena Kristu ukuti: “Muletalukako ku tulubi.”—1 Yohane 5:21.

ICIPUSHO: Bushe imipepele mwaishiba ilomfwila ifunde lya mu Baibolo ilyaba fye ilyaololoka ilya kuti tatufwile ukubomfya ifipasho nelyo ifilubi pa kupepa Lesa?

Kuti Mwasanga Ukupepa kwa Cine

Nangu ca kutila kwaliba inshila ishingi nelyo imipepele iingi sana, na lyo line kuti mwasanga iingamutungulula ku mweo. Kwaliba ifintu ifingi ifyo twingeshibilako “ukupepa ukwasanguluka kabili ukushakowela ku menso ya kwa Lesa.” (Yakobo 1:27) Amalembo yantu tulandilepo muli ifi fipande kuti yamwafwa ukusanga ukupepa kwa cine.

Nga mulefwaya ukwishiba amasuko ku mepusho yali muli ifi fipande, mukwai kuti mwaeba Inte sha kwa Yehova ukuti bamwafwe. Ilyo muletontonkanya pa fyo balemulondolwela, kuti cawama nga mwakonkele ifyo abantu bamo abali mu musumba wa Berea balecita. Ilyo Paulo abashimikile, ‘balepituluka mu Malembo ya mushilo, pa kumona nga ifyo Paulo alelanda fyacishinka.’ (Imilimo 17:11) Na imwe nga mwacindika Icebo ca kwa Lesa nga bena Berea, no kulapoosako amano pa kucisambilila, mukasanga ukupepa ukukamutungulula ku bumi. Kanshi cashalila kuli imwe ukusalapo nga mukaba mu kupepa kwa cine nelyo iyo.

[Amashiwi pe bula 9]

Kupepa nshi ukukoselesha abantu ukusambilila Baibolo pa kuti baimwene abene nga ca kuti ifyo balesambilila fya cine?