Ababelenga Ino Magazini Balepusha Ukuti

Bushe Lesa Alisuminisha Ukuupa Impali?

Awe; filya fine Lesa aufishe umwanakashi umo ku mwaume umo mu Edeni e fyo na lelo afwaya abantu ukulakonka. Pa numa, Yesu Kristu aishilekomaila pali uyu mulandu ilyo alelanda na basambi bakwe.—Ukutendeka 2:18-24; Mateo 19:4-6.

Bushe abantu balembwa mu Baibolo pamo nga Abrahamu, Yakobo, Davidi, na Solomone tabakwete abakashi abengi? Balikwete, lelo bushe Baibolo ilandapo shani pa fyupo fya musango yo? Yalitusokolwela amafya no kupusana ifyali mu cupo ca kwa Abrahamu ne ca kwa Yakobo pa mulandu wa kuupa impali. (Ukutendeka 16:1-4; 29:18–30:24) Umuye nshiku, mu Mafunde ya kwa Lesa mwaishileba ifunde ilyo imfumu imo imo yalekabila ukulakonka, ifunde lyatile: “Ikaifushisha abakashi, ukuti umutima wa iko wikafuma kuli ine.” (Amalango 17:15, 17) Solomone asuulile ili funde no kuupa abanakashi ukucila pali 700! Ica bulanda fye ca kuti umutima wa kwa Solomone na cine walifumine kuli Yehova, na balengele ukuti ufumeko bakashi bakwe abengi. (1 Ishamfumu 11:1-4) Twaimwena ukuti Baibolo tailanda ifisuma pa fyupo fya mpali.

Na lyo line, bamo kuti batila nomba cinshi Lesa alekele fye abantu bakwe ukulaupa impali? Taleni tontonkanyeni pali ci: Bushe mwalilekapo icipe icikalamba, pamo nge cipuna, ico mwishibe ukuti cilekabila ukupyanikwapo ne cipya caikala fye ifyo fine pa nshita imo, napamo ukutontonkanya ukuti te kuti cilinge ukucipoosa ino nshita? Kwena, amatontonkanyo ya kwa Lesa ne nshila shakwe fyalicila amatontonkanyo yesu ne nshila shesu. (Esaya 55:8, 9) Lelo, kuti twaishiba imilandu yalengele ukuti aleke abantu baleupa impali pali ilya nshita.

Ibukisheni ukuti mu Edeni, Yehova alaile ukuti kukesa “umwana” uukesaonaula Satana. Ilyo papitile imyaka iingi, Abrahamu bamwebele ukuti muli ena mukafuma uluko ulukalamba kabili bamwebele no kuti ulya Mwana wa bulayo akafyalilwa mu lupwa lwakwe. (Ukutendeka 3:15; 22:18) Satana alikoselepo fye ukuti acilikile ukwisa kwa uyu Mwana. Ico alefwaya fye konaula uluko lwa bena Israele. Ilingi line alelenga abena Israele ukubembuka pa kutila Lesa aleke ukubapaala no kubacingilila.

Pa kwafwilisha abena Israele ukuti beponena mu fiteyo fya kwa Satana, Yehova libili libili aletuma bakasesema ukusoka abantu bakwe nga batendeka ukufuma mu nshila. Na lyo line, alishibile limo ukuti abantu bakwe ilingi bakalafilwa ukumfwila na mafunde fye aya-anguka pamo nga ifunde lya kukanapepa utulubi. (Ukufuma 32:9) Nga ca kutila ifunde fye ilya-anguka lilebafya ukukonka, bushe ilya kulesha ukuupa impali kuti balikonka? Apo Yehova alishiba bwino bwino ifyo abantu baba, amwene ukuti inshita yali tailafika iya kubinda impali—ishali ngo lutambi muli shilya nshiku. Lesa alesha ukuupa impali pali ilya nshita, Satana nga calimwangukile nga nshi ukubeleleka abena Israele ukubembuka.

Filya Lesa alekele fye pa nshita imo abantu ukulaupa impali mwali ubusuma na bumbi. Ukuupa impali kwalengele uluko ukukula bwangu. Ukufula kwa bantu mu luko kwalengele ukuti uluko lwiloba ukufikila inshita ya kwisa kwa kwa Mesia. Na kabili impali nalimo shalecingilila abanakashi bamo, ukubalenga bakwata umwa kwikala e lyo no lupwa mu nshita ya mafya.

Na lyo line, mwilaba ukuti Yehova te watendeke impali. Alekele fye ukuti shibeko pa nshita fye iinono, uku ninshi kwena alemona ukuti takuli uulecusha umunankwe. (Ukufuma 21:10, 11; Amalango 21:15-17) Ilyo Yehova amwene ukuti calinga ukulesha ababomfi bakwe ukuupa impali, abomfeshe umwana wakwe ukubwekeshapo ukweba abantu umusango wa cupo afwaya ukulingana ne cupo aufishe mu Edeni. E ico, Yesu alibindile abasambi bakwe ukuupa impali. (Marko 10:8) Uyu mulandu nomba waishileumfwika bwino bwino muli aya mashiwi ya kuti: Ifunde lya kwa Mose lyali fye bwino pali ilya nshita, nomba pali lelo “ifunde lya kwa Kristu” lyalicilanapo ukuwama.—Abena Galatia 6:2.