Palameni Kuli Lesa

Icikalamba Icitulanga Ukuti Lesa Alitutemwa

Ukutendeka 22:1-18

ABRAHAMU alitemenwe Lesa. Uyu muntu wa cishinka alitemenwe no mwana wakwe Isaki uo afyele mu bukote. Lelo ilyo Isaki ali ne myaka nalimo 25, Abrahamu alyeshiwe pantu aebelwe ukucita icintu ico umufyashi umwaume ashingafwaya ukucita, Lesa amwebele ukupeela umwana wakwe nge lambo. Lelo, kwena Isaki tabamupeele nge lambo iyo. Ilyo Abrahamu afwaile ukwipaya umwana wakwe, Lesa alimuleseshe ukubomfya malaika. Ili lyashi ilya mu Baibolo, ilyaba pa Ukutendeka 22:1-18, lyalesobela ifyo Lesa atutemwa nga nshi.

Icikomo 1 citila, ‘Lesa aeseshe Abrahamu.’ Abrahamu ali ne citetekelo, nomba icitetekelo cakwe cali no kweshiwa ifyo cishatalile aceshiwapo. Lesa atile: “Buula umwana obe umwaume, umwana obe umo fye mpo uo watemwisha, Isaki, . . . umutuule ngo mutuulo wa koca pa lupili lumo ulo ndekweba.” (Icikomo 2) Ibukisheni ukuti Lesa taleka ababomfi bakwe ukweshiwa ica kuti bafilwa no kushipikisha. E ico ubu bwesho bwalangile ukuti alicetekele Abrahamu.—1 Abena Korinti 10:13.

Abrahamu alyumfwilile apo pene fye. Tubelenga ukuti: “Abrahamu acelele ulucelo no kunina pa mpunda yakwe kabili asendele na babomfi bakwe babili na Isaki umwana wakwe; kabili alepawile inkuni sha kupeelelapo umutuulo wa koca. E lyo aimine no kuya.” (Icikomo 3) Abrahamu afwile taebeleko nangu umo pali ubu bwesho.

Awe baimine ulwendo lwa nshiku shitatu, kabili Abrahamu alikwete inshita ya kutontonkanyapo nga nshi pali ubu bwesho. Lelo Abrahamu ta-alwile amano iyo. Amashiwi alandile yalangile icitetekelo akwete. Ilyo amwene ulupili apatali, aebele ababomfi bakwe ati: “Shaleni pano . . . , lelo ine no mulumendo tuleya kulya ku kupepa kabili twalamusanga pano pene.” Ilyo Isaki aipwishe ukwali impaanga bali no kutuula, Abrahamu atile: “Lesa umwine alapekanya impaanga.” (Ifikomo 5 na 8) Abrahamu alishibe ukuti alabwelelamo no mwana wakwe. Mulandu nshi? Pantu ‘alishibe ukuti Lesa ali na maka ya kwimya Isaki ku bafwa.’—AbaHebere 11:19.

Ilyo bali pa lupili, Abrahamu ‘abuulile umwele ukuti epaye umwana wakwe,’ lelo malaika alimuleseshe. E lyo nomba Lesa amupeela impaanga, iyaiketwe mu fimpusa, ukuti e yo Abrahamu atuule “ukucila ukutuula umwana wakwe.” (Ifikomo 10-13) Kuli Lesa, cali fye kwati Isaki nabamutuula no kumutuula. (AbaHebere 11:17) Umo uwasambilila sana Baibolo, alondolwele ukuti: “Kuli Lesa, filya Abrahamu aipeelesha ukutuula umwana wakwe, cali kwati namutuula kale.”

Ici calangile ukuti filya Yehova acetekele Abrahamu talubile iyo. Abrahamu balimulambwile pa fyo acetekele Yehova, pantu Lesa alibwekeshepo icipangano apangene na Abrahamu no kumulaya na fimbi, kabili muli ici cipangano mwali no bulayo bwa kuti abantu bonse bakapaalwa.—Ifikomo 15-18.

Kwena, Lesa talekele Abrahamu ukupeela Isaki nge lambo, lelo Lesa ena alipeele umwana wakwe nge lambo. Filya Abrahamu aipeeleshe ukutuula umwana wakwe Isaki calelanga ifyo Lesa ali no kwisatuula Umwana wakwe uwafyalwa eka, Yesu, pa membu shesu. (Yohane 3:16) Ilambo lya kwa Yesu e cikalamba icitulanga ukuti Yehova alitutemwa. Apo Lesa alitupeele ili lambo, tufwile ukuipusha ukuti, ‘Finshi mfwile ukucita pa kuti ndesekesha Lesa?’