ILYO fye ba Anita * babatishiwe no kuba Inte ya kwa Yehova, abena mwabo batendeke ukubacusha sana. Ba Anita batile: “Abena mwandi balendesha ukuya mu kulongana e lyo no kulumbula ishina lya kwa Lesa. Nga nalumbula fye ishina lya kuti Yehova, abena mwandi balefulwa icine cine.”

Ubwafya na bumbi ubo ba Anita bakwete bwa kusambilisha abana babo Baibolo. Batile: “Abena mwandi balinkeenye ukulasambilila ifya kwa Lesa pa ng’anda, kanshi nalesambilisha abana bandi Baibolo mu bumfisolo. Tabalefwaya no kuti ndebasenda mu kulongana.”

Ifi ba Anita bashimika filelangilila ukuti icitetekelo cesu kuti caeshiwa nga nshi, nga ca kuti ba lupwa lwesu baletukaanya ukupepa Lesa. Ifi fine e fyo cingaba na lintu twalwala ubulwele ubushipola, lintu twafwilwa umwana, umwina mwesu, nelyo nga ca kuti lupwa lwesu apondokela Yehova. Finshi fingatwafwa ukutwalilila aba cishinka kuli Yehova nga twakwata amafya ya musango yu?

Bushe nga ni mwe mwakwete amafya ya musango yu kuti mwacita shani? Umutumwa Paulo atile: “Mukabila ukushipikisha.” (Heb. 10:36) Finshi fingamwafwa ukushipikisha?

Ukupepa no kucetekela sana Yehova kwaba pa fingatwafwa ukushipikisha amafya. Natulande pa cacitikiile ba Ana. Bushiku bumo pali Cimo akasuba, abena mwabo abo baikeele nabo mu cupo pa myaka 30 balifwile ukwabula ukwenekela. Ba Ana batile: “Ilyo baile ku ncito tababwelele. Baafwile ninshi bali fye ne myaka 52.”

Cinshi cayafwile ba Ana ukushipikisha? Balitwalilile ukuya ku ncito, ukucita ifi kwalibafwile pantu incito balebomba yalelenga belatontonkanya sana pa mafya bakwete. Lelo nangu cali ifi, ubulanda bakwete bwena tabwapwile. Ba Ana batile: “Nalepepa kuli Yehova lyonse no kumweba ifyo naleumfwa, nalemulomba no kuti angafwe ukushipikisha.” Bushe Yehova alyaswike amapepo yabo? Ba Ana balishininkisha ukuti alyaswike, pantu batile: “Lesa alimpeele umutende wakwe ica kuti nshaleba sana no bulanda. Nalicetekela ukuti Yehova akabuusha abena mwandi.”—Fil. 4:6, 7.

Lesa ‘uumfwa amapepo’ alilaya ukuti akapeela ababomfi bakwe ifyo bakabila pa kuti batwalilile ukuba aba cishinka. (Amalu. 65:2) Bushe tamulesumina ukuti ifi Lesa atulaya filalenga icitetekelo cesu ukuba icakosa? Kanshi na imwe bene kuti mwashipikisha nga muli na mafya!

Yehova alafwa abantu bakwe ukushipikisha ukubomfya aba bwananyina mu cilonganino. Ku ca kumwenako, ilyo aba mu cilonganino ca ku Tesalonika balebacusha, Paulo abakoseleshe ukuti: “Mulesansamushanya no kukuulana, nga filya fine mucita.” (1 Tes. 2:14; 5:11) Apo abena Tesalonika balekumana pamo kabili baleyafwana, calengele ukuti baleshipikisha amafya ayaleesha icitetekelo cabo. Na ifwe bene kuti twashipikisha amafya nga ca kuti tuleba pamo na ba bwananyina nga filya abena Tesalonika balecita.

Nga ca kuti twakosha bucibusa bwesu na ba babwanyina, tukalalanda pa fintu “ifingatukuula.” (Rom. 14:19) Ukucita ifi kwalicindama maka maka nga tuli na mafya. Umutumwa Paulo alikwete amafya ayengi, lelo Yehova alimupeele amaka ya kushipikisha. Limo Lesa alebomfya aba bwananyina ku kumukoselesha. Ku ca kumwenako, ilyo Paulo aposeshe aba mu cilonganino ca ku Kolose, alandile ukuti aba “e bankoselesha.” (Kol. 4:10, 11) Aba bwananyina balitemenwe sana Paulo, e mulandu wine balemukoselesesha no ku musansamusha ilyo aleba na mafya. Nalimo na imwe bene balimukoseleshapo ku ba bwananyina mu cilonganino.

Lesa alibikako na baeluda mu cilonganino abengatwafwa ukushipikisha nga twaba na mafya. Aba bamunyinefwe baba “ngo mwa kufisama ku mwela kabili nge cifulo ca kubelamamo ku mfula iikalamba, nge milonga ya menshi mu calo icabula amenshi, nge cintelelwe ca cilibwe cafina mu calo icauma.” (Esa. 32:2) Ala aya mashiwi yalatukoselesha nga nshi! Bushe nga mwakwata amafya mulebako baeluda pa kuti bamwafwe? Baeluda kuti batukoselesha no kutwafwa ukushipikisha.

Kwena baeluda tabacita ifipesha amano. Bantunse abashapwililika, kabili Baibolo itila ‘bantu fye nga ifwe’ bene. (Imil. 14:15) Lelo amapepo batupepelako kuti yatwafwa nga nshi. (Yako. 5:14, 15) Munyinefwe umo ku Italy uwalwala ubulwele ubulenga imicincili ukunakuka (muscular dystrophy), alandile pa calenga ukuti ashipikishe pa myaka iingi. Atile: “Baeluda balintemwa nga nshi, balimbikako amano, kabili balampepula lyonse fye, ici calingafwa ukushipikisha.” Kanshi baeluda mu cilonganino mwaba ku bamwafwa ukushipikisha, pantu fya bupe ukufuma kuli Yehova.

Kwaliba na fimbi ifingatwafwa ukushipikisha. Cimo pali ifi kutwalilila ukuba abakosa mu fya kwa Lesa. Umfweni ificita ba John aba myaka 39, abalwala ubulwele bwa kansa. Intanshi batile: “Nshaleenekela ukulwala kansa pantu nali fye umulumendo.” Ilyo ba John balwele, ninshi umwana wabo umwaume ali fye na myaka itatu. Batile: “Umukashi wandi aishilekwata imilimo iingi, e walesakamana ine no mwana wesu, kabili e walentwala na ku cipatala.” Umuti balepeela ba John ku cipatala walelenga baleumfwa ukunaka sana no muselu-selu. Na cimbi icabipile ca kuti, ba wishi baba John nabo baishilelwala ubulwele ubushipola, kanshi balekabila aba kubasakamana.

Bushe ba John no lupwa lwabo bashipikiishe shani aya mafya? Ba John batile: “Nangu ca kuti nalenaka sana, naleesha na maka yandi yonse ukwafwa ulupwa lwandi ukutwalilila ukuba ulwa kosa mu fya kwa Lesa. Lyonse twaleya mu kulongana na mu kushimikila, twalekwata na mapepo ya lupwa nangu ca kuti limo caleyafya.” Ba John balishininkisha ukuti umuntu kuti ashipikisha amafya ayali yonse nga ca kuti atwalilila ukuba uwakosa mu fya kwa Lesa. Finshi ba John balandile pa kukoselesha abakwata amafya? Batile: “Kwena ubwafya nge lyo fye bwakuponena cilafya sana. Lelo apo Yehova alitutemwa, alatukosha. Yehova akamukosha, nge fyo ankosha.”

Ukwabula no kutwishika, Lesa akatwalilila ukutwafwa ukushipikisha amafya yonse nangu yakose shani. E ico tulepepa no kucetekela sana Yehova, lyonse tuleba pamo na ba bwananyina, nga tuli na mafya tuleebako baeluda mu cilonganino pantu kuti batwafwa, kabili tutwalilile ukuba abakosa mu fya kwa Lesa. Nga tulecita ifi twalandapo, ninshi twalyumfwikisha amashiwi Paulo alandile aya kuti, ‘Mulakabila ukushipikisha.’