1, 2. Finshi Yesu acitile pa bushiku bwa Nisan 14, mu 33 C.E. icungulo bushiku? (Moneni icikope icili pa muulu.)

ICUNGULO bushiku pa Nisani 14, mu 33 C.E., ninshi umweshi naubalika mu Yerusalemu, Yesu na batumwa bakwe baali pa ca Kucilila ilyo baleibukisha ifyo abena Israele balubwilwe mu buusha ninshi palipita ne myaka 1,500. Nomba ilyo Yesu aali na batumwa bakwe 11 aba cishinka atendeke icintu icaibela, icibukisho ca mfwa yakwe iyo ali no kufwa pali ubu bwine bushiku. *—Mat. 26:1, 2.

² Yesu alipepele kabili apeele umukate uushatutumuka ku batumwa bakwe no kubeba, ati: “Buuleni mulye.” Abulile na kapu umwali umwangashi, kabili alipepele, no kubeba ati: “Nwenimo bonse.” (Mat. 26:26, 27) Yesu tabapeele ifya kulya na fimbi, lelo aali ne fingi ifyakweba abasambi bakwe aba cishinka pali ici cungulo bushiku icacindama.

3. Fipusho nshi twalalandapo muli cino cipande?

³ Ifi e fyo Yesu atendeke Icibukisho ca mfwa yakwe, ico na kabili twita ukuti “Umulaalilo wa kwa Shikulu.” (1 Kor. 11:20) Nalimo abantu bamo kuti baipusha abati: Mulandu nshi twibukishisha  imfwa ya kwa Yesu? Bushe umukate no mwangashi fimininako finshi? Kuti twaipekanya shani pa kuti tukasangwe ku Cibukisho? Ni bani abafwile ukulyako ifimpashanya? Bushe Abena Kristu bomfwa shani pe subilo bakwata ilyo Amalembo yalandapo?

4. Bushe imfwa ya kwa Yesu yalenga tukwate ishuko nshi?

⁴ Apo tuli bana ba kwa Adamu, twalipyana ulubembu ne mfwa. (Rom. 5:12) Umuntu umubembu te kuti apeele Lesa icilubula pa bumi bwakwe nelyo ubwa bambi. (Amalu. 49:6-9) Ilyo Yesu afwile, alipile umutengo wa cilubula fye ceka ico Lesa asuminishe, umubili wakwe uwapwililika no mulopa uo asuumishe. Ilyo atwele umutengo wa cilubula kuli Lesa, Yesu alengele ukuti tulubulwe ku lubembu ne mfwa no kupeelwa umweo wa muyayaya.—Rom. 6:23; 1 Kor. 15:21, 22.

5. (a) Twaishiba shani ukuti Lesa na Kristu balitemwa abantunse? (b) Mulandu nshi tulingile ukusangilwa ku Cibukisho ca mfwa ya kwa Yesu?

⁵ Ifi Lesa apekenye icilubula cilangililo ca kuti alitemwa abantunse. (Yoh. 3:16) Filya Yesu na o aipeele ilambo cilangililo ca kuti alitutemwa. Ilyo Yesu ashilaisa pano isonde aali “uwaishibisha imilimo,” kabili alitemenwe sana “abana ba bantu”! (Amapi. 8:30, 31) Nga tuletasha pa fyo Lesa no Mwana wakwe bacita, cikalenga tukasangwe ku Cibukisho ca mfwa ya kwa Yesu, pa kuti tukakonke ifyo atweba ukuti: “Mulecita ici ku kunjibukisha.”—1 Kor. 11:23-25.

6. Bushe tufwile ukulamona shani umukate no mwangashi ifyo tubomfya pa Cibukisho?

⁶ Ilyo Yesu atendeke Icibukisho ca mfwa yakwe, mu cipesha amano tayalwile umukate no mwangashi ukuba umubili no mulopa wakwe. Lelo, alandile pa mukate ati: “Uyu mukate cimpashanya ca mubili wandi.” Pa kulanda pa mwangashi atile: “Uyu mwangashi cimpashanya ca ‘mulopa wandi uwa cipangano,’ uuli no kupongolwelwa pa mulandu wa bengi.” (Marko 14:22-24) Kanshi, twamona ukuti umukate no mwangashi fyaleimininako ifintu fimo nelyo fyali fye fimpashanya.

7. Umukate tubomfya pa Cibukisho, wimininako cinshi?

⁷ Pali cilya Cibukisho cacindama sana ico Yesu atendeke mu 33 C.E., abomfeshe umukate uushatutumuka uwashelepo ilyo balesefya Ica Kucilila. (Ukufu. 12:8) Limo limo Baibolo nga yalanda pa citutumushi ilosha ku cintu icikowesha abantu nelyo ulubembu. (Mat. 16:6, 11, 12; Luka 12:1) Kanshi, filya Yesu abomfeshe umukate umushali icitutumushi calilingile pantu waleimininako umubili wakwe umushali ulubembu. (Heb. 7:26) Uyu e mukate uo babomfya pa Cibukisho.

8. Umwangashi tubomfya pa Cibukisho, wimininako cinshi?

⁸ Umwangashi uo Yesu abomfeshe pa Nisan 14 mu 33 C.E. waiminineko umulopa wakwe, e fyo no mwangashi uo tubomfya pa Cibukisho wimininako. Pa ncende iyo baleita abati Golgota epo umulopa wakwe wasuumine pa “kuti [abantu abengi] bakabelelwe uluse pa membu.” (Mat. 26:28; 27:33) Apo umukate no mwangashi ifyo tubomfya pa Cibukusho fimininako ilambo lya mutengo ilya kwa Yesu ilyo apeele pa kulubula abantu abacumfwila kabili tulatasha pa fyo acita, kanshi tufwile ukuipekanya pa kuti tukasangweko ku Mulaalilo wa kwa Shikulu uubako cila mwaka.

9. (a) Mulandu nshi cacindamina ukubelenga Amalembo batantika mu nshita ya Cibukisho? (b) Bushe mumfwa shani ifi Yesu apeele ubumi bwakwe icilubula?

⁹ Nga tulebelenga Amalembo batantika aya mu nshita ya Cibukisho ayaba mu katabo  ka Ukubebeta Amalembo Cila Bushiku, kuti catwafwa ukulatontonkanya pa fyo Yesu alecita ilyo ashilafwa. Ne ci kuti catwafwa ukupekanya umutima wesu pa kuti tukasangwe ku Mulaalilo wa kwa Shikulu. * Nkashi umo alandile ukuti, “Tulafuluka ukusangwa ku Cibukisho, pantu cila mwaka cilaba fye icaibela. Ndebukisha ilyo batata bafwile, nalibaloleshe kabili nailwike ukuti icilubula calicindama icine cine. Nalishibe amalembo ayengi ne fyakuyalondolola! Lelo ilyo nali no bulanda sana pa mulandu wa mfwa ya batata, ukwishiba ifyo icilubula cikacita kwalinengele ukuba ne nsansa panono.” Ca cine, ilyo tulepekanya ukusangwa ku Cibukisho, tulingile ukutontonkanya pa fyo ilambo lya kwa Yesu lyatulubula ku lubembu ne mfwa.

10. Bushe ukuipekanya ukusangwa ku Cibukisho kukuma shani umulimo wesu uwa kubila imbila nsuma?

¹⁰ Ilyo tulepekanya ukusangwa ku Cibukisho tufwile no kutontonkanya pa fyo tukabombesha mu mulimo wa kubila, nalimo kuti twabombako bupainiya bwa kwafwilisha mu nshita ya Cibukisho. Ilyo tuleita abo tusambilila nabo Baibolo na bantu bambi ukwisasangwa ku Cibukisho, tukaba ne nsansa ukulashimikila abantu pali Lesa, no Mwana wakwe, kabili tukakwata amapaalo ayo Yehova akapeela bonse abamulenga ukusekelela kabili aba mulumbanya.—Amalu. 148:12, 13.

11. Bushe abena Korinti bamo balelya shani ifimpashanya mu musango uushalinga?

¹¹ Ilyo tuleipekanya ukusangwa ku Mulaalilo wa kwa Shikulu, tufwile ukutontonkanya pa mashiwi umutumwa Paulo alembele icilonganino ca Bena Kristu mu Korinti. (Belengeni 1 Abena Korinti 11:27-34.) Paulo alandile ukuti umuntu onse uwalya umukate no kunwa muli kapu mu musango uushilingile “akaba no mulandu ku mubili na ku mulopa wa kwa Shikulu,” Yesu Kristu. Kanshi uwasubwa pa kuti alyeko afwile ‘ukuimona nga nalinga ukulyako.’ Pantu “uulelya no kunwa ukwabula ukwishiba bwino bwino ailetelela ubupingushi.” Pa mulandu wa kuti abena Korinti balelya no kunwa mu musango uushalinga, abengi bali “abanaka kabili abalwalilila”, e lyo bambi na bo balyonawile bucibusa bwabo na  Lesa. Nalimo, bamo balelya no kunwa sana ilyo bashilaya ku Cibukisho nelyo pa Cibukisho pene ica kuti balifililwe ukuba na mano nelyo ukuba abalola. Abalya ifimpashanya mu musango uushalinga tabatwalilila ukuba ifibusa fya kwa Lesa.

12. (a) Bushe Paulo apashenye Icibukisho kuli cinshi, kabili asokele shani abalelyako? (b) Cinshi uulyako ifimpashanya afwile ukucita nga acita ulubembu ulukalamba?

¹² Paulo apashenye Icibukisho ku ca kulya ico umuntu alelya na bambi, kabili asokele abalelyako ukuti: “Te kuti mulenwena muli kapu ya kwa Yehova na muli kapu ya fibanda; te kuti mulelya “ifya kulya fya kwa Yehova” e lyo ne fya kulya fya fibanda.” (1 Kor. 10:16-21) Umuntu uulyako ifimpashanya lyonse pa Mulaalilo wa kwa Shikulu nga acita ulubembu ulukalamba, afwile ukwita abakumwafwa. (Belengeni Yakobo 5:14-16.) Uwasubwa nga ‘alanga ukuti nalapila,’ e lyo alyako ifimpashanya pa Cibukisho, ninshi talelanga ukuti nasuula ilambo lya kwa Yesu.—Luka 3:8.

13. Mulandu nshi cacindamina ukulapepela isubilo ilyo Lesa atupeela?

¹³ Ilyo tuleipekanya ukusangwa ku Cibukisho, tufwile ukutontonkanya sana pe subilo ilyo Lesa atupeela. Takuli umubomfi nangu umo uwa kwa Yehova no musambi uwa cishinka uwa Mwana wakwe uwingafwaya ukusaalula ilambo lya kwa Yesu pa kulyako ifimpashanya pa Cibukisho nga teshibe bwino bwino ukuti alisubwa no mupashi. Bushe umuntu kuti aishiba shani nga afwile ukulyako ifimpashanya nelyo iyo?

14. Bushe icipingano cipya cakuma shani abalyako ifimpashanya pa Cibukisho?

¹⁴ Bonse abalyako ifimpashanya pa Cibukisho balishininkisha ukuti baba mu cipangano cipya. Yesu alandile pa mwangashi ukuti: “Iyi kapu cipangano cipya pa mulandu wa mulopa wandi.” (1 Kor. 11:25) Lesa alandiile muli kasesema Yeremia ukuti, akapangana icipangano icipya icishakabe nge cipangano ce Funde ico apangene na bena Israele. (Belengeni Yeremia 31:31-34.) Lesa alipangana icipangano icipya na Israele wa kwa Lesa. (Gal. 6:15, 16) Ilambo lya kwa Yesu e lyalenga ukuti ici cipangano cibeko kabili umulopa wakwe e walenga ukuti cilebomba. (Luka 22:20) Yesu e Kawikishanya wa cipangano icipya, kabili abasubwa aba cishinka ababa muli ici cipangano bakapokelela icilambu ca ku muulu.—Heb. 8:6; 9:15.

15. Ni bani ababa mu cipangano ca Bufumu, kabili lishuko nshi bakakwata nga batwalilila ukuba aba cishinka?

¹⁵ Bonse abalingile ukulyako ifimpashanya pa Cibukisho balishiba ukuti baba mu cipangano ca Bufumu. (Belengeni Luka 12:32.) Bonse abasambi abasubwa aba kwa Yesu abatwalilile ukuba aba cishinka kuli ena, no kuculila pamo nankwe, bakateka na Yesu ku muulu. (Fil. 3:10) Apo abasubwa aba cishinka baba mu cipangano ca Bufumu, bakateka na Kristu mu Bufumu bwa ku muulu umuyayaya. (Ukus. 22:5) Aba abasubwa e balinga ukulyako ifimpashanya pa Mulaalilo wa kwa Shikulu.

16. Londololeni mu kwipifya umwalola amashiwi yaba pa Abena Roma 8:15-17.

¹⁶ Ni beka fye abo umupashi ushimikako ubunte ukuti bana ba kwa Lesa e bafwile ukulyako ifimpashanya pa Cibukisho. (Belengeni Abena Roma 8:15-17.) Paulo abomfeshe ishiwi lya ciAramaic ilya kuti “Abba,” ilipilibula ukuti “Mwe Tata!” Umwana kuti abomfya ili shiwi pa kulanda na bawishi, pantu cilangililo ca kuti balitemwana na bawishi kabili alibacindika. Bonse ‘abapokelela umupashi wa kuba abana,’ baba abana ba kwa Lesa aba ku mupashi. Umupashi wa  kwa Lesa ulashimika ubunte no mupashi wabo, no kulenga beshibe ukuti bana ba kwa Yehova abasubwa. Tababa abana ba kwa Lesa pa mulandu wa kuti fye tabatemwa ukwikala pe sonde. Balishininkisha ukuti bakateka pamo na Yesu mu Bufumu bwa ku muulu nga batwalilila ukuba aba cishinka ukufika na kumfwa. Muno nshiku, banono sana abashalapo pali ba 144,000 abasambi ba kwa Kristu, ‘abasubwa ku wa mushilo,’ Yehova. (1 Yoh. 2:20; Ukus. 14:1) Umupashi wa kwa Lesa ubalenga ukuti balemwita abati, “Abba, Tata!” Ala balipalwa pa kuba abana ba kwa Lesa!

17. Lisubilo nshi abasubwa bakwata, kabili balimona shani?

¹⁷ Nga muli Bena Kristu abasubwa, mufwile mulapepela sana isubilo lyenu ilya kuya ku muulu. Baibolo nga yalanda pa bo balaya ukuti “mukoopwa” kuli shibwinga wa ku muulu, Yesu Kristu, muleshiba ukuti ni mwe ilelandapo kabili mulafwaisha ukuyaba pamo na Kristu “shibwinga.” (2 Kor. 11:2; Yoh. 3:27-29; Ukus. 21:2, 9-14) Ilyo Lesa mu Cebo cakwe alanda ukuti alitemwa abana bakwe aba ku mupashi, muleshiba ukuti “Nine aleeba.” Ilyo Icebo ca kwa Yehova capeela abasubwa amafunde, umupashi wa mushilo ulamulenga ukumfwila kabili mulanda no kuti, “Nine yalelandapo.” Umupashi wa kwa Lesa no mupashi wenu pamo filashimika ubunte ukuti mwalikwata isubilo lya ku muulu.

18. Lisubilo nshi “impaanga shimbi” shakwata, kabili mumfwa shani pe subilo mwakwata?

¹⁸ Lelo nga ca kuti mwaba mwi “bumba ilikalamba” ilya “mpaanga shimbi,” Lesa alimupeela isubilo lya kwikala pe sonde. (Ukus. 7:9; Yoh. 10:16) Mulafwaya ukwikala umuyayaya muli Paradaise, kabili mulaba ne nsansa ilyo mwatontonkanya pa fikacitika pe sonde ifyo Baibolo yalandapo. Mulafwaisha ukwisaikala umutende na balupwa wenu na bantu bambi abalungama. Mulalolela inshita ilyo takwakabe insala, icipoowe, ukucula, ukulwala, ne mfwa. (Amalu. 37:10, 11, 29; 67:6; 72:7, 16; Esa. 33:24) Mulafwaisha ukwisamona abakabuushiwa ku bafwa no kwikala nabo umuyayaya pe sonde. (Yoh. 5:28, 29) Ala mufwile mulatasha pe subilo Yehova amupeela ilya kwikala umuyayaya pe sonde! Nangu ca kuti tamulyako ifimpashanya pa Cibukisho, mulasangwa ku Cibukisho pantu mulafwaya ukulanga ukuti mulatasha pe lambo lya cilubula ilya kwa Yesu Kristu.

19, 20. (a) Bushe isubilo ilyo Lesa amupeela kuti lyafikilishiwa shani? (b) Mulandu nshi mufwile ukusangilwa ku Mulaalilo wa kwa Shikulu?

¹⁹ Nangu isubilo lyenu lya kwikala pe sonde nelyo nga lya kuya ku muulu, kuti lyaba ilya cine cine nga ca kuti fye twaba ne citetekelo muli Yehova Lesa, muli Yesu Kristu, e lyo na mu cilubula. Nga twasangwa ku Cibukisho, tukakwata inshita ya kutontonkanya pe subilo twakwata na pa bucindami ubukalamba ubwa mfwa ya kwa Yesu Kristu. E ico mufwile ukuipekanya pa kuti mukabe pa bantu abengi abakasangwa ku Mulaalilo wa kwa Shikulu uukabako pali Cisano, pa 3 April, 2015, pa numa ya kuwa kwa kasuba pa mayanda ya Bufumu na pa fifulo fimbi icalo fye conse.

²⁰ Ukusangwa ku Cibukisho kuti kwalenga mwalatasha sana pe lambo ya kwa Yesu. Ukukutikisha ilyashi lya Cibukisho kuti kwalenga twalanga ukutemwa kubo twikala nabo pantu kuti twabashimikilako ifyo twasambilila pa fyo Yehova atutemwa na pa bufwayo bwakwe ku bantunse. (Mat. 22:34-40) Kanshi mufwile ukwesha na maka pa kuti mukasangwe ku Mulaailo wa kwa Shikulu.