Yehova wa Cishinka Kabili Alelela
Yehova wa Cishinka Kabili Alelela
“Imwe, mwe Yehova, muli basuma kabili mwali-iteyanya ukwelela; kabili mwalikwatisha icikuuku ku balilila kuli imwe.”—AMALU. 86:5.
KUTI MWALONDOLOLA SHANI?
Kuti twapashanya shani Yehova uwa cishinka?
Kuti twapashanya shani Yehova uwelela?
Mulandu nshi mulefwaila ukutwalilila ukulasambilila pa mibele ya kwa Yehova?
1, 2. (a) Mulandu nshi twatemenwa abanensu aba cishinka kabili abelela? (b) Fipusho nshi twalalandapo?
BUSHE cibusa wa cine cine kuti mwamulondolola shani? Nkashi uwe shina lya Ashley atile: “Cibusa wa cine cine ni ulya uwaiteyanya ukwafwa kabili nga walufyanya alelela.” Ifwe bonse tulatemwa abanensu ababa ne cishinka kabili abelela. Balalenga tuleumfwa abacingililwa kabili abatemwikwa.—Amapi. 17:17.
2 Yehova ni Cibusa wesu uwa cishinka kabili alelela. Aba nga filya kemba wa malumbo alondolwele ukuti: “Imwe, mwe Yehova, muli basuma kabili mwali-iteyanya ukwelela; kabili mwalikwatisha icikuuku ku balilila kuli imwe.” (Amalu. 86:5) Cipilibula cinshi ukuba uwa cishinka kabili uwelela? Bushe Yehova alanga shani iyi mibele iisuma? Bushe kuti twamupashanya shani? Ifyasuko fyalatwafwa ukutemwisha Cibusa wesu, Yehova. Fyalatwafwa no kukosha bucibusa bwesu na bamunyinefwe.—1 Yoh. 4:7, 8.
YEHOVA WA CISHINKA
3. Bushe umuntu uwa cishinka aba shani?
3 Umuntu uwa cishinka alatwalilila ukulambatila ku muntu uo atemwa. Alanga uku kutemwa pa kutwalilila ukwafwa umunankwe no kumutungilila na lintu ifintu fyafishe. Baibolo ilondolola Yehova ukuti ‘wa cishinka.’ Takwaba uwaba ne cishinka ukucila Yehova.—Ukus. 16:5.
4, 5. (a) Bushe Yehova alanga shani ukuti wa cishinka? (b) Bushe kuti twakoshiwa shani nga tuletontonkanya pa fyo Lesa aba uwa cishinka ku babomfi bakwe?
4 Bushe Yehova alanga shani ukuti wa cishinka? Talekelesha ababomfi bakwe aba cishinka. Umubomfi wakwe umo uo ashalekeleshe ni Mfumu Davidi, kabili Davidi alumbenye Yehova pa fyo ali uwa cishinka kuli ena. (Belengeni 2 Samwele 22:26.) Ilyo Davidi ali na mafya, Yehova alemutungulula, ukumucingilila, no kumupususha. (2 Sam. 22:1) Davidi alishibe ukuti bucishinka bwa kwa Yehova tabwali fye malanda kanwa. Mulandu nshi Yehova alangile ukuti wa cishinka kuli Davidi? Pantu Davidi na o ali “uwa cishinka.” Yehova alatasha sana ababomfi bakwe aba cishinka, kabili na o alaba ne cishinka kuli bena.—Amapi. 2:6-8.
5 Tulakoshiwa sana nga twatontonkanya pa fyo Yehova aba uwa cishinka ku babomfi bakwe. Munyinefwe umo uwe shina lya Reed atile: “Ndakoseleshiwa sana nga nabelenga pa fyo Yehova ayafwile Davidi ilyo ali na mafya. Na lintu Davidi alebutuka no kulaikala mu ncengo, Yehova alemusakamana. Ici cilansansamusha sana! Cilenga nacetekela ukuti nangu ningaba na mafya shani, nangu ifintu fingabipa shani, Yehova akatwalilila ukungafwa cikulu fye ndi wa cishinka kuli ena.” Ukwabula no kutwishika, na imwe e fyo mumfwa.—Rom. 8:38, 39.
6. Ni mwi mumbi umo Yehova alanga ukuti wa cishinka, kabili ababomfi bakwe banonkelamo shani?
6 Ni mwi mumbi umo Yehova alanga ukuti wa cishinka? Alakonka ifipope fyakwe. Atweba ukuti, ‘ukufika na ku bukote bobe naba fye cimo cine.’ (Esa. 46:4) Lyonse apingula ifintu ukulingana ne fipope fyakwe ifishaluka. (Mal. 3:6) Na kabili, Yehova alalanga ukuti wa cishinka pantu alafikilisha ifyo alaya. (Esa. 55:11) Kanshi, ababomfi ba kwa Yehova balanonkelamo muli bucishinka bwakwe. Banonkelamo shani? Nga tule-esha na maka ukulakonka ifipope fyakwe, tukacetekela ukuti akacita ifyo atulaya.—Esa. 48:17, 18.
MULEPASHANYA YEHOVA UWA CISHINKA
7. Kuti twapashanya shani Lesa uwa cishinka?
7 Kuti twapashanya shani Yehova uwa cishinka? Inshila imo, kula-afwako bambi abalepita mu mafya. (Amapi. 3:27) Ku ca kumwenako, bushe mwalishibako Umwina Kristu munenu uwafuupulwa, nalimo pa mulandu wa kuti alilwalilila, balupwa balamukaanya, nelyo alafilwa ukucita fimo ifyo alefwaya? Mulandu nshi te kuti muitendekeleko ukulanda “amashiwi ayasuma, amashiwi aya kusansamusha”? (Seka. 1:13) * Nga mulecita ifi ninshi mulelanga ukuti muli cibusa wa cishinka kabili uwa cine, cibusa ‘uulambatila ukucila munyina uo afyalwa nankwe.’—Amapi. 18:24.
8. Kuti twaba shani aba cishinka mu cupo?
8 Na kabili kuti twapashanya Yehova uwa cishinka pa kutwalilila ukuba aba cishinka ku bo twatemwa. Ku ca kumwenako, nga ca kutila twalyupa nelyo ukuupwa, twalishiba ukuti tufwile ukuba aba cishinka ku bena mwesu. (Amapi. 5:15-18) E ico, tatufwile ukucita icili conse icingalenga twacita ubucende. (Mat. 5:28) Na kabili, tulanga ukuti tuli ba cishinka kuli bamunyinefwe nga tatulelanda ifyabipa pali bena nelyo ukubabepesha ubufi, nga tulekaana ukukutika ku malyashi ya bufi kabili nga tatuletandanya ayo malyashi.—Amapi. 12:18.
9, 10. (a) Ni kuli nani maka maka uko tulingile ukuba aba cishinka? (b) Mulandu nshi limo cafisha ukumfwila amafunde ya kwa Yehova?
9 Ne cacindama sana ca kuti, tulafwaya ukutwalilila aba cishinka kuli Yehova. Kuti twacita shani ifyo? Tufwile ukwesha ukulamona ifintu nga filya Yehova afimona, e kutila, ukutemwa ifyo atemwa no kupata ifyo apata no kulacita ifintu ifingalenga asekelela. (Belengeni Amalumbo 97:10.) Nga tuletontonkanya sana no kulamona ifintu nga filya fine Yehova atontonkanya no kumona, tukalaumfwila sana amafunde yakwe.—Amalu. 119:104.
10 Kwena limo te kuti canguke ukukonka amafunde ya kwa Yehova. Limo tulingile ukwesha na maka pa kuti tutwalilile aba cishinka. Ku ca kumwenako, Abena Kristu abashimbe kuti batemwa ukuupa nelyo ukuupwa, lelo tabalasanga uwa kuupana nankwe uwalinga pa Bena Kristu banabo. (1 Kor. 7:39) Tutile, nkashi umushimbe alabomba nomba abo abomba nabo, abashili ba Nte balesha lyonse ukumufwaila uwa kuupana nankwe e lyo nalimo uyu nkashi alatalalilwa. Na lyo line, apingulapo ukukanaishishanya nelyo ukuupwa ku muntu uushibombela Lesa pantu alefwaya ukutwalilila uwa cishinka kuli Yehova. Ala tulatasha nga nshi Abena Kristu abesha na maka ukutwalilila aba cishinka ngo uyu nkashi. Ukwabula no kutwishika, Yehova akalambula bonse abatwalilila aba cishinka te mulandu na mafya.—Heb. 11:6.
YEHOVA ALELELA
11. Bushe umuntu uwelela aba shani?
11 Pa mibele iisuma iyo Yehova akwata paba no kwelela. Bushe umuntu uwelela aba shani? Ni ulya uubelela uluse abamukalifye. Ici tacilolele mu kuti umuntu uwelela bambi ninshi alatekelesha ifilubo nelyo alakaana ukuti tabamukalifye. Lelo, asalapo ukusuulako ku fyabipa ifyo bamucitile. Amalembo yatusambilisha ukuti Yehova ‘ali-iteyanya ukwelela’ abalapila ukufuma pa nshi ya mutima.—Amalu. 86:5.
12. (a) Bushe Yehova elela shani? (b) Bushe Petro aloseshe mwi ilyo atile imembu sha muntu kuti ‘shafuutwa’?
12 Bushe Yehova elela shani? Yehova nga aelela umuntu, alelela apakalamba nga nshi; alelela imembu shonse kabili alelela umupwilapo. (Esa. 55:7) Twaishiba shani ukuti Yehova alelela imembu shesu shonse? Moneni ifyo atweba pa Imilimo 3:19. (Belengeni.) Umutumwa Petro akoseleshe abo alelandako ‘ukulapila, no kwaluka.’ Umubembu nga alapila ukufuma pa nshi ya mutima, alomfwa ububi pa fyabipa ifyo alecita. Kabili afwaisha ukukanabwekeshapo ukucita ifyabipa ifyo alecita. (2 Kor. 7:10, 11) Na kabili, umuntu nga alapila icine cine, ‘alaluka’ no kuleka ifyabipa ifyo alecita kabili alatendeka ukucita ifilenga Lesa ukusekelela. Nga ca kuti abalekutika kuli Petro balilangile ukuti balilapiile icine cine, finshi fyali no kufumamo? Petro atile, imembu shabo shali no ‘kufuutwa.’ Kanshi, Yehova nga aelela imembu, alashifuuta shonse. Alelela imembu shonse fye.—Heb. 10:22; 1 Yoh. 1:7.
13. Bushe amashiwi ya kuti “nshakebukishe ne membu shabo” yalenga twacetekela cinshi?
13 Twaishiba shani ukuti Yehova alelela umupwilapo? Tusambilila pa fyo Yehova elela ku mashiwi aebele Yeremia mu kusesema ukulanda pa Bena Kristu basubwa. (Belengeni Yeremia 31:34.) Yehova atile: “Pantu nkelela ifilubo fyabo, nshakebukishe ne membu shabo.” Kanshi Yehova nga aelela, takatukandile pali isho membu, tashibukisha, alalabako umupwilapo.—Rom. 4:7, 8.
14. Kuti twasansamushiwa shani nga twatontonkanya pa fyo Yehova elela? Landeni pa cacitike.
14 Tulasansamuka nga twatontonkanya pa fyo Yehova elela. Ku ca kumwenako, natulande pali nkashi uwatamfiwepo uo twalaita ati Elaine. Ilyo papitile imyaka iingi, alibweshiwe. Ba Elaine batile: “Nangu ca kuti nalibweshiwe, nalemona kwati Yehova tanjelela, no kuti alitemenwe sana abantu bambi ukucila ine.” Lelo, ilyo ba Elaine babelengele no kutontonkanya pa fyo Baibolo ilondolola bwino ifyo Yehova elela, balisansamwike. Balandile no kuti: “Nailwike ukuti Yehova alintemwa kabili aliba ne cikuuku kuli ine.” Ne cabasansamwishe sana cishinka ca kuti: “Yehova nga atwelela, tatufwile ukutwalilila ukulaumfwa ububi pa membu twacitile.” * Ba Elaine batile: “Nshasumine ukuti Yehova kuti aelela imembu shonse isho nacitile, kabili naletontonkanya ukuti takanjelele, nkafwa fye ne membu shandi. Nalishiba ukuti pakapita inshita pa kuti nkasumine ukuti balinjelela, lelo nalitendeka ukumona ukutila kuti napalama kuli Yehova, no kumfwa ukuti alinjelela.” Ala Lesa tubombela, alitutemwa kabili alatwelela sana!—Amalu. 103:9.
MULEPASHANYA YEHOVA UWELELA
15. Kuti twapashanya shani ifyo Yehova elela?
15 Kuti twapashanya Yehova ifyo elela nga tule-elelana lyonse ilyo cakabilwa. (Belengeni Luka 17:3, 4.) Muleibukisha ukuti ilyo Yehova aelela, alalaba ku membu twacitile pantu tashibukisha pa kuti akatukandilepo. Na ifwe kuti twaelela bambi no kulaba ku membu shabo nga twaleka ukutontonkanyapo kabili tatuleshilandapo.
16. (a) Bushe nga twaelela bambi ninshi tuletekelesha ifyabipa? Londololeni. (b) Pa kuti Lesa atwelele, finshi tufwile ukucita?
16 Nga twaelela bambi te kuti ninshi natutekelesha ifilubo bacitile nelyo ukuti tulebasuminisha ukulacita ifyabipa. Awe iyo. Lelo calola mu kuti twasalapo ukukanasunga icikonko ku mukoshi. Na kuba, pa kuti Lesa atwelele, tufwile ukulaelela bambi nga filya Yehova elela. (Mat. 6:14, 15) Pantu na kuba, icilenga Yehova ukutwelela ni co alebukisha ukuti “tuli lukungu.” (Amalu. 103:14) Kanshi tufwile ukulalabako ku filubo fya bambi, ukubelela ukufuma pa nshi ya mutima.—Efes. 4:32; Kol. 3:13.
17. Cinshi cingatwafwa ukwelela Umwina Kristu munensu nga atukalifya?
17 Kwena te lyonse canguka ukwelela bambi. Na Bena Kristu bamo abasubwa mu nshita ya batumwa calebakosela ukuwikishanya. (Fil. 4:2) Nga ca kuti Umwina Kristu munensu atukalifya, cinshi tufwile ukucita? Baleni tontonkanyeni pali Yobo. Alikalipe sana ilyo ifibusa fyakwe Elifasi, Bildadi na Sofari bamubepeshe ubufi. (Yobo 10:1; 19:2) Na mu kulekelesha, Yehova alikalipile aba balebepesha Yobo ubufi. Lesa abebele ukuya kuli Yobo no kutuula ilambo pa membu shabo. (Yobo 42:7-9) Lelo Yehova aebele na Yobo ukucita icintu cimo. Cinshi ico cine? Amwebele ukupepelako balya banankwe abalemubepesha ubufi. Yobo alicitile ifyo Yehova amwebele kabili alimupaalile nga nshi pa kubabelela uluse. (Belengeni Yobo 42:10, 12, 16, 17.) Cinshi tulesambililako? Ukupepelako abatulufyenye ukufuma pa nshi ya mutima kuti kwatwafwa ukulabako ku filubo fyabo.
TWALILILENI UKULAISHIBILAPO IFINGI PA MIBELE YA KWA YEHOVA
18, 19. Kuti twatwalilila shani ukutemwa imibele iisuma iya kwa Yehova?
18 Natutemwa ukuti natusambilila pa mibele na imbi iisuma iya kwa Yehova. Natusambilila ukuti taifinya, taba na kapaatulula, ni kapekape, tapampamina fye pa cintu cimo, wa cishinka, kabili alelela. Kwena, twasambililako fye ifinono. Tukaba ne nsansa sha kusambilila ifingi pali Yehova ku ciyayaya conse. (Luk. Mil. 3:11) Tulesuminisha ku fyalandile umutumwa Paulo uwatile: “Iye amapaalo ubwingi ayafuma kuli Lesa! Yangu ifyo akwatisha amano! We fintu ubwingi ifyo aishibisha!” Na ifwe kuti twalanda ifi fine pa mibele ya kwa Lesa pamo ngo kutemwa e lyo na pa mibele 6 iyo twasambililapo.—Rom. 11:33.
19 E ico bonse natutwalilile ukutemwa sana imibele iisuma iya kwa Yehova. Kuti twacita ifi nga twaishiba imibele yakwe, ukulaitontonkanyapo, no kulaba ne iyi ine mibele. (Efes. 5:1) Nga twacita ifi, tukomfwa nga filya uwaimbile amalumbo aumfwile uwatile: “Ukupalama kuli Lesa kusuma kuli ine.”—Amalu. 73:28.
[Amafutunoti]
^ para. 7 Kuti mwasanga ifyebo na fimbi ifingamwafwa mu Ulupungu lwa kwa Kalinda ulwa January 15, 1995 mu cipande citila, “Bushe Walikoseleshapo Uuli Onse pa Kati Apa?” no lwa April 1, 1995 mu cipande citila “Ni Shani Fintu Twingacincimushanya ku Kutemwa na ku Kubombe Milimo Isuma?”
^ para. 14 Moneni paragrafu 10 mu cipandwa 26 mu citabo citila Palameni Kuli Yehova.
[Ifipusho]
[Icikope pe bula 19]
“Kwaba icibusa icilambatila ukucila munonko mwafyalwa nankwe.” —Amapi. 18:24 (Moneni paragrafu 7)
[Icikope pe bula 19]
‘Muleitemenwa ukubelelana uluse.’—Efes. 4:32 (Moneni paragrafu 16)
[Icikope pe bula 21]
Tulepepelako abatulufyenye ukufuma pa nshi ya mutima (Moneni paragrafu 17)
