‘Kuti Nacita Shani Pa Kuti Ndeshimikila?’

Mu calo conse twalikwata bamunyinefwe ne nkashi aba cishinka ababombako umulimo wa kushimikila nangu ca kuti balilwala amalwele ayakalamba. Natulande pali ba Dalia abekala mu musumba ukalamba uwa Vilnius mu calo ca Lithuania.

Ba Dalia bali ne myaka ukucila 30. Ukutula fye apo bafyalilwe, balalwala stroko. Ubu bulwele bwalilenga balemana kabili tabalanda ifyaumfwika, ica kuti ba pa ng’anda fye e bomfya ifyo balanda. Ba Dalia bekela na banyina ba Galina. Nangu ca kuti ba Dalia balacula sana no kusakamikwa, baliba ne nsansa. Cinshi calenga ukuti babe ne nsansa?

Ba Galina balondolola abati: “Mu 1999 umufyala wandi Apolonija Inte ya kwa Yehova alishile mu kututandalila. Twamwene ukuti alishibe sana Baibolo kabili Dalia atampile ukumwipusha ifipusho ifingi. Tapakokwele Dalia atampile ukusambilila Baibolo. Limo limo nalesangwapo pa kuti ndelondolola ifyo Dalia alelanda. Nalimwene ukuti alitemenwe sana ifyo balesambilila. Na ine wine nalitendeke ukusambilila Baibolo.”

Ilyo ba Dalia batendeke ukumfwikisha ifyo balesambilila mu Baibolo, kwali icintu cimo icalebacusha sana ica kuti basukile baipusha ba Apolonija abati: “Bushe umuntu uwalwala ubulebe nga ine kuti ashimikila shani?” (Mat. 28:19, 20) Ba Apolonija babakoseleshe ati: “Wilasakamana Yehova akakwafwa.” Ca cine Yehova alafwa.

Nomba bushe ba Dalia bashimikila shani? Balashimikila mu nshila ishalekanalekana. Ba nkashi mu cilonganino balabafwa ukulemba amakalata umo balemba ifyo balefwaya ukushimikila abantu pa fyaba mu Baibolo. Ica kubalilapo ba Dalia baleba ba nkashi ifyo balefwaya ukulanda. Lyena ba nkashi balalemba ifyo balanda. Na kabili inshila imbi iyo ba Dalia babomfya pa kushimikila kutumina abantu ifyebo pa foni. E lyo nga nabuca bwino, ba nkashi balabasenda mu kushimikila pa kuti balelandako na bantu abo bakumanya.

Ba Dalia na banyina balitwalilila ukusambilila icine. Bonse babili bali-ipeele, kabili babatishiwe mu November 2004. Mu September 2008 ibumba lya bamunyinefwe abalanda ici Polish lyalipangilwe mu Vilnius. Apo bakabila ba mbila nsuma muli ili bumba balicepele, ba Dalia na banyina baileilunda kuli ili ibumba. Ba Dalia batila: “Imyeshi imo ndasakamana nga nshile mu mulimo. Lelo nga napepa kuli Yehova, tapakokola bamunyinane balesa twaya nabo mu mulimo.” Bushe ba Dalia bomfwa shani pa bwafya bakwata? Batila: “Ubulwele bwalyonaula umubili wandi lelo tabwaonaula amaka ya kutontonkanya. Nalitemwa sana ifi nakwata amaka yakweba abantu pali Yehova!”