Nomba Kwakulaba Ifipande mu Cingeleshi Icayanguka

TULI ne nsansa ukumwishibisha ukuti ukutendekela na ino magazini, ifipande mu Ulupungu lwa kwa Kalinda ulwa ciNgeleshi fyakulafuma pabili. Magazini imo ine yakulalembwa na mu ciNgeleshi icayanguka kabili yakulafumina pamo ne yo tukwata lyonse. Intanshi, iyi magazini ya ciNgeleshi cayanguka ikalafuma cila mweshi pa mwaka fye umo. Muli iyi magazini, ifipande ifyakulalembwa mu ciNgeleshi cayanguka, fipande fya kusambililamo, e lyo ne fipande fimo fimo ukulingana ne ncende ikalashalamo. Tatuletwishika ukuti ici cikaafwa baNte abengi ukumfwikisha Icebo ca kwa Lesa. Mulandu nshi?

Bamunyinefwe abengi mu fyalo pamo nga Fiji, Ghana, Kenya, Liberia, Nigeria, Papua New Guinea, na Solomon Islands, balanda iciNgeleshi. Lelo nangu ca kutila bamunyinefwe muli ifi fyalo balalanda ne ndimi shimbi isha mu fyalo fyabo, ilingi babomfya iciNgeleshi ku kulongana na lintu baleshimikila. Na lyo line, iciNgeleshi babomfya calyanguka ukucila iciba mu mpapulo shesu. E lyo kabili kwaliba na bantu ba kwa Yehova bambi abakuukila mu fyalo umo balingile ukulanshanya na bambi mu ciNgeleshi nangu ca kuti tabacishiba sana. Na kuba, ilingi takuba ukulongana uko babomfya indimi shabo.

Ifipande ifyo tusambilila cila mulungu pe Sambililo lya Ulupungu lwa kwa Kalinda, e fyo umusha wa cishinka abomfya sana pa kutupeela ica kulya ca ku mupashi pa nshita yalinga. E ico, pa kwafwa bonse abasangwa ku kulongana ukumfwikisha sana ifyo tulesambilila, magazini ya mu ciNgeleshi cayanguka yakulakwata amasentensi ayepi na mashiwi ayayanguka. Inkupo ya iyi magazini ikaibela. Utumitwe, amaparagrafu, ifipusho fya kupitulukamo, ne fikope mu fipande fya kusambililamo, fikalaba fimo fine ne fya muli magazini ya lyonse. Kanshi nampo umuntu akwete magazini mu ciNgeleshi ilembelwamo lyonse nelyo iya mu ciNgeleshi cayanguka, cakula-anguka kuli bonse ukukonkamo bwino bwino no kwasukapo pa Ulupungu lwa kwa Kalinda. Pa kuti mumone ubupusano buli pa ciNgeleshi cibomfiwa lyonse na pa ciNgeleshi cayanguka, moneni ifyebo fili pe samba ififumine mu paragrafu 2, mu cipande ca kusambililamo ica kubalilapo muli ino magazini.

Tule-enekela ukuti ifipande fya mu ciNgeleshi cayanguka fikafwa abengi abapepa kuli Yehova ukuti: “Nengeni ukwiluka, pa kuti nsambilile amafunde yenu.” (Amalu. 119:73) Tatuletwishika ukuti abashaishiba sana iciNgeleshi, e lyo na bacaice abalanda iciNgeleshi bakalapekanya bwino Isambililo lya Ulupungu lwa kwa Kalinda ilya cila mulungu. Tuletasha Lesa ukuti pa mulandu wa ‘kutemwa aba bwananyina bonse,’ alebomfya “umusha wa cishinka kabili uwashilimuka” ku kupekanya ifya kulya fya ku mupashi ifingi nga nshi.—1 Pet. 2:17; Mat. 24:45.

Ibumba Litungulula Ilya Nte sha kwa Yehova