Pokeleleni Umupashi wa kwa Lesa, Te wa Calo Iyo
Pokeleleni Umupashi wa kwa Lesa, Te wa Calo Iyo
“Ifwe tatwapokelele umupashi uwa ici calo, lelo twapokelele umupashi uwafuma kuli Lesa, pa kuti twishibe ifintu ifyo twapeelwa fye kuli Lesa.”—1 KOR. 2:12.
1, 2. (a) Bulwi nshi ubo Abena Kristu balwa? (b) Mepusho nshi twalalandapo?
ABENA KRISTU ba cine baba pa bulwi! Umulwani wesu alikwata amaka, ni ncenjeshi, kabili alikosa ku bulwi. Alikwata icanso icimwafwa sana ico abomfya pa kusonga abengi ukucita ifyo afwaya. Lelo tatufwile ukumona kwati te kuti tumucimfye. (Esa. 41:10) Twalikwata ica kutucingilila icakosa kabili ico ashingacimfya.
2 Ubulwi bwesu bwa ku mupashi. Umulwani wesu ni Satana Kaseebanya, ne canso icikalamba ico abomfya “mupashi uwa ici calo.” (1 Kor. 2:12) Umupashi wa kwa Lesa e utucingilila ilyo Satana atusansa. Pa kuti tucimfye ubu bulwi no kutwalilila ukuba ifibusa fya kwa Lesa, tufwile ukulomba umupashi wa kwa Lesa e lyo no kukwata ifisabo fya uko. (Gal. 5:22, 23) Lelo umupashi wa calo cinshi, kabili usonga shani abantu? Kuti twaishiba shani nga ca kuti umupashi wa calo uletutungulula? Kabili finshi twingasambilila kuli Yesu pa fyo twingapokelela umupashi wa kwa Lesa na pa fyo twingakaana umupashi wa calo?
Mulandu Nshi Umupashi wa Calo Wabela fye Mpanga Yonse?
3. Umupashi wa calo cinshi?
3 Umupashi wa cino calo wafuma kuli Satana, “kateka wa pano calo,” kabili ulalwisha umupashi wa mushilo uwa Lesa. (Yoh. 12:31; 14:30; 1 Yoh. 5:19) Uyu mupashi maka ayaba fye mpanga yonse ayasonga abantu ukucita ifyabipa, ifipusana no kufwaya kwa kwa Lesa.
4, 5. Bushe umupashi wafuma kuli Satana waisaba shani mpanga yonse?
4 Cinshi calenga umupashi uwafuma kuli Satana ukuba fye mpanga yonse? Ica kubalilapo, Satana abepele Efa mwi bala lya Edeni. Alengele asumina ukuti nga aleka ukutungululwa na Lesa, kuti aikala bwino. (Ukute. 3:13) Ubu bwali bufi icine cine! (Yoh. 8:44) Lyena, abomfeshe umwanakashi pa kulenga Adamu ukupondokela Yehova. Ukupondoka kwa kwa Adamu kwalenga abantu ukuba mu lubembu, kabili balasongwa no mupashi wa kwa Satana uwa bucipondoka.—Belengeni Abena Efese 2:1-3.
5 Satana asongele na bamalaika abengi, ababa nomba ifibanda. (Ukus. 12:3, 4) Aba bamalaika bapondokele Lesa ilyo Ilyeshi lya mu nshiku sha kwa Noa lishilaisa. Abo bamalaika basumine ukuti bakaba bwino sana nga basha ififulo fyabo ifyo bapeelwe mu muulu no kuyacita ifya lunkumbwa ifishali ifya cifyalilwa kuli bena. (Yuda 6) Satana nomba abombela pamo ne fi fibanda mu ‘kulufya aba pano isonde bonse.’ (Ukus. 12:9) Ku ca bulanda, abengi tabaishiba ifyo ifibanda fisonga abantu.—2 Kor. 4:4.
Bushe Umupashi wa Calo Ulamutungulula?
6. Ni lilali fye umupashi wa calo wingatutungulula?
6 Abengi tabaishiba ukuti Satana alasonga abantu, lelo Abena Kristu bena balishiba. (2 Kor. 2:11) Na kuba, umupashi wa calo te kuti ututungulule kano fye nga twausuminisha fwe bene. Natulande pa fipusho fine ifyalatwafwa ukuibebeta nga ca kuti tutungululwa no mupashi wa kwa Lesa nelyo umupashi wa calo.
7. Cinshi cimo ico Satana acita pa kuti atufumye kuli Yehova?
7Bushe ifya kuleseshamo icitendwe ifyo nsala filanga ukuti naba shani? (Belengeni Yakobo 3:14-18.) Satana afwaya twatemwa ulukaakala pa kuti atufumye kuli Lesa. Satana Kaseebanya alishiba ukuti Yehova alipata uwatemwa ulukaakala. (Amalu. 11:5) E mulandu wine, Satana abomfesha impapulo, amafilimu, inyimbo, ifyangalo fya pa kompyuta. Fimo pali ifi filalenga abaleangala ukutemwa ubulalelale no lukaakala, pantu filakusha ulunkumbwa lwabipa muli bena. Satana ena tasakamana nga ca kuti pa nshita imo ine natutemwa ifyalungama e lyo ne fyabipa ifyo aleta mu calo.—Amalu. 97:10.
8, 9. Mepusho nshi tulingile ukuyipusha pa fya kuleseshamo icitendwe?
8 Lelo umupashi wa kwa Lesa wena ulalenga abo uletungulula ukuba abasanguluka, aba mutende, kabili aba luse. Kanshi kuti cawama ukuyipusha fwe bene ukuti, ‘Bushe kuleseshamo icitendwe ifyo nsala filalenga mbe ne mibele isuma?’ Amano yafuma ku muulu ‘te ya bumbimunda.’ Abatungululwa no mupashi wa kwa Lesa tabeba fye abanabo ukuti bafwile ukuba abasanguluka no kuba no mutende e lyo bena mu bumfisolo baletamba ifya bulalelale no lukaakala.
9 Yehova afwaya tulepepa fye ena eka. Lelo Satana afwaya tulemupepako nangu fye panono nga filya alefwaya Yesu acite. (Luka 4:7, 8) Nalimo kuti twayipusha ukuti: ‘Bushe ifya kuleseshamo icitendwe ifyo nsala filalenga ndepepa fye Lesa eka? Bushe ifyo nsala filalenga cilenkosela nelyo cileanguka ukukaana umupashi wa calo? Bushe mfwile ukusala fimbi ifya kuleseshamo icitendwe?’
10, 11. (a) Bushe umupashi wa calo ulenga abantu ukumona shani ukukwata ifyuma? (b) Icebo ca kwa Lesa icapuutwamo no mupashi citukoselesha ukumona shani ifyuma?
10Bushe imona shani ifikwatwa? (Belengeni Luka 18:24-30.) Umupashi wa calo ulalenga twaba no “lunkumbwa lwa menso,” pantu ulatukoselesha ukuba no bufunushi e lyo no kutemwa ifyuma. (1 Yoh. 2:16) Walenga abengi ukufwaisha ukuba ne fyuma. (1 Tim. 6:9, 10) Uyu mupashi ulenga tulemona kwati ukukwata ifyuma ifingi e kwingalenga twacingililwa. (Amapi. 18:11) Lelo nga ca kuti ukutemwisha indalama kwalenga twaleka ukutemwa Lesa, ninshi Satana acimfya. Tufwile ukuyipusha ukuti, ‘Bushe nabika sana amano ku kunonka ifyuma?’
11 Icebo ca kwa Lesa icalembelwe ukubomfya umupashi cena citukoselesha ukubombesha pa kuti ifwe no lupwa lwesu tulekwata ifyo tukabila mu bumi, te kutemwisha indalama. (1 Tim. 5:8) Umupashi wa kwa Lesa ulafwa abaupokelela ukuba bakapekape nga Yehova, te kulapeelwa fye. Balabika sana amano ku bantu ukucila ku fintu fimbi, kabili balatemwa ukupeelako abanabo ifyo bakwete. (Amapi. 3:27, 28) Kabili tabaleka ukutemwa indalama kwalenga bebika amano ku kupepa Lesa.
12, 13. Ukupusanako no mupashi wa calo, bushe umupashi wa kwa Lesa ulenga twaba ne mibele nshi iisuma?
12Bushe imibele yandi ilanga ukuti ntungululwa na mupashi nshi? (Belengeni Abena Kolose 3:8-10, 13.) Umupashi wa calo ulatunka abantu ukuba ne mibele ya lubembu. (Gal. 5:19-21) Ilyo twishiba umupashi uututungulula, te lintu ifintu fili bwino, lelo ni lintu pali ubwafya pamo nga lintu munyinefwe nelyo nkashi tatupooseleko amano na lintu atukalifye nelyo ukutubembukila. Ne fyo tucita mu mayanda mu mwesu kuti fyalanga umupashi uututungulula. Kanshi kuti cawama ukuibebeta. Yipusheni amuti, ‘Mu myeshi 6 iyapita, bushe imibele yandi yalipalana sana ne ya kwa Kristu nelyo bushe nalibwelela ku milandile ne myendele yabipa iyo nakwete kale?’
13 Umupashi wa kwa Lesa kuti watwafwa ‘ukufuula ubuntu bwa kale pamo ne micitile ya buko,’ no kufwala “ubuntu bupya.” Ico cikalenga tukabe no kutemwa sana ne cikuuku. Tukalaelelana nangu ca kuti pali umulandu wine wine uwa kuilishanishishapo. Nga twatunganya fye ukuti umo natulufyanya, tatwakulaba ne “cipyu no bukali no kootoka no musaalula pamo no bubi bonse.” Lelo twakulaesha na maka ukuba ne “mitima ya nkumbu.”—Efes. 4:31, 32.
14. Bushe abengi pano calo bamona shani Icebo ca kwa Lesa?
14Bushe nalicindika no kutemwa amafunde ya mu Baibolo? (Belengeni Amapinda 3:5, 6.) Umupashi wa calo ulenga abantu ukukanakonka Icebo ca kwa Lesa. Abatungululwa no yu mupashi tababika mano ku fyo Baibolo ilanda ifyo bamona ati tafyayanguka ukukonka. Lelo basalapo ukukonka intambi na mano ya buntunse. (2 Tim. 4:3, 4) Bamo balisuula fye ne fyaba mu Cebo ca kwa Lesa fyonse. Aba musango yu balatwishika Baibolo nga yafuma kuli Lesa nelyo nga tulaikabila mu bumi. Kanshi baba ni ba mano kuikwatila. Balalenga amafunde yalanda pa bulalelale, no kuulungana kwa baume beka beka na banakashi beka beka, e lyo no kulekana yalamoneka kwati tayalolamo. Basambilisha ukuti “ubusuma bubi no bubi abati busuma.” (Isa. 5:20) Bushe uyu mupashi walitukuma na ifwe? Bushe tushintilila pa mano yesu pamo ne fyo twaishiba ilyo twakwata amafya? Nelyo bushe tulesha ukukonka ifyo Baibolo yalanda?
15. Ukucila ukulashintilila pa mano yesu, cinshi tufwile ukucita?
15 Umupashi wa kwa Lesa ulalenga tulecindika Baibolo. Nga kemba wa malumbo, tumona icebo ca kwa Lesa nge nyali ku makasa yesu, kabili ngo lubuuto mu nshila shesu. (Amalu. 119:105) Lelo ukucila ukucetekela amano yesu, tufwile ukushintilila pa Cebo ca kwa Lesa pantu cikatwafwa ukulailuka icisuma ne cibi. Tatusambilila fye ukucindika Baibolo, lelo tulasambilila no kutemwa amafunde ya kwa Lesa.—Amalu. 119:97.
Sambilileniko Kuli Yesu
16. Cinshi cifwaikwa pa ‘kulatontonkanya nge fyo Kristu aletontonkanya’?
16 Pa kupokelela umupashi wa kwa Lesa tufwile ‘ukulatontonkanya nge fyo Yesu atontonkanya.’ (1 Kor. 2:16) Pa kuba no “mutima umo wine uo Kristu Yesu akwete,” kano twaishiba ifyo aletontonkanya ne fyo alecita, e lyo no kumupashanya. (Rom. 15:5; 1 Pet. 2:21) Moneni ifyo twingamupashanya.
17, 18. (a) Cinshi tusambilila kuli Yesu pa lwe pepo? (b) Mulandu nshi tufwile ukutwalilila ‘ukulomba’?
17Mulelomba umupashi wa kwa Lesa. Ilyo Yesu ali mupepi no kupita mu fya kwesha, alilombele umupashi kuli Lesa pa kuti umwafwe. (Luka 22:40, 41) Na ifwe tufwile ukulalomba umupashi wa mushilo kuli Lesa. Yehova alapeela umupashi apa fye kuli bonse abamulomba mu citetekelo. (Luka 11:13) Yesu atile: “Mulelomba, kabili mukapeelwa; mulefwaya, kabili mukasanga; mulekonkonsha, kabili bakamwiswila. Pantu onse uulomba balamupeela, na onse uufwaya alasanga, na onse uukonkonsha balamwiswila.”—Mat. 7:7, 8.
18 Nga mulefwaya umupashi wa kwa Yehova ukulamwafwa, te kwesha ukuleka bwangu ukulomba. Kuti twakabila ukulapepa libili libili e lyo no kupepa pa nshita iitaliko. Ilyo Yehova talayasuka amapepo, limo alafwaya abalelomba balanga ukuti balefwaisha sana ico balelomba no kuti nabakwata icitetekelo icine cine. *
19. Cinshi Yesu alecita lyonse, kabili mulandu nshi tufwile ukumupashanishisha?
19Muleumfwila Yehova no mutima onse. Yesu lyonse alecita ifyaletemuna Wishi. Kwaliko inshita ilyo ifyo Yesu alefwaya ukucita fyapusene ne fyo Wishi alefwaya. Na lyo line, aebele Wishi ukuti: “Ukufwaya kwenu e ko kucitwe, te kwandi iyo.” (Luka 22:42) Yipusheni amuti, ‘Bushe ndomfwila Lesa na lintu cafishe?’ Ukumfwila Lesa kulafwaikwa pa kuba no mweo. Apo e Kabumba wesu, kabili e Ntulo ya mweo wesu e lyo e utupeela ne fyo tukabila mu bumi, tufwile ukulamumfwila muli fyonse. (Amalu. 95:6, 7) Kanshi pa kuti fye Lesa aletupaala, tufwile ukulamumfwila muli fyonse.
20. Finshi Yesu alecita ilyo ali pano calo, kabili kuti twamupashanya shani?
20Ishibeni Baibolo bwino bwino. Ilyo Yesu alekaana amatunko ya kwa Satana, ayambwile Amalembo. (Luka 4:1-13) Ilyo alelanshanya na ba fya mapepo abalemusuusha, Yesu alelanda ifyaba mu Cebo ca kwa Lesa. (Mat. 15:3-6) Ilyo Yesu ali pano isonde, alishibe sana amafunde ya kwa Lesa kabili aleyafikilisha. (Mat. 5:17) Na ifwe bene tufwile ukutwalilila ukusambilila Icebo ca kwa Lesa icikosha icitetekelo cesu. (Fil. 4:8, 9) Fwe bengi tacanguka ukusanga inshita ya kukwata isambililo lya pa lwesu ne lya lupwa. Ukucila ukulolela ukuti tukwate inshita, tufwile ukulubula inshita.—Efes. 5:15-17.
21. Finshi “umusha wa cishinka” ateyanya ifingatwafwa ukwishiba Icebo ca kwa Lesa bwino bwino?
21 “Umusha wa cishinka kabili uwashilimuka” aliteyanya ukuti tulekwata inshita ya kuisambilisha fwe bene ne nshita ya Mapepo ya Lupwa. (Mat. 24:45) Bushe mulacite fyo? Pa kuti muletontonkanya nga Kristu, kuti cawama mwasala ifipande ifilanda pa fyo Yesu alesambilisha no kulafisambililapo pa Mapepo ya Lupwa na pe sambililo lya pa lwenu. Kuti mwabomfya Icisontelelo ca Mpapulo sha Watch Tower pa kusanga ifyebo ifilanda pa fyo mulefwaya ukusambililapo. Ku ca kumwenako, ukufuma mu 2008 ukufika mu 2010, mu Ulupungu lwa kwa Kalinda, ulwa bantu bonse mwali ifipande 12 ifyakwete umutwe wa kuti “Ifyo Tusambilila Kuli Yesu.” Kuti mulesambililamo muli ifi fipande. Ifipusho fyabamo filatwafwa ukwishiba no kumfwikisha ifyaba mu Cebo ca kwa Lesa. Bushe te kuti ciwame mwalasambilila ifyebo fya musango yu pa Mapepo ya Lupwa?
Kuti Twacimfya Icalo
22, 23. Cinshi tufwile ukucita pa kucimfya icalo?
22 Pa kuti tuletungululwa no mupashi wa kwa Lesa, tufwile ukukaana umupashi wa calo. Lelo tacayanguka uku-ukaana. Tufwile ukulwisha na maka. (Yuda 3) Na lyo line, kuti twacimfya! Yesu aebele abasambi bakwe ukuti: “Pano calo mulacula, lelo shipeni! Ine nincimfya icalo.”—Yoh. 16:33.
23 Na ifwe bene kuti twacimfya ici calo nga ca kutila twakaana umupashi wa ciko no kwesha na maka ukukwata umupashi wa kwa Lesa. Cine fye, “Lesa nga ali kuli ifwe, nani engatulwisha?” (Rom. 8:31) Nga twapokelela umupashi wa kwa Lesa no kulakonka ifyo atweba mu Baibolo, tukekala mu mutelelwe, kabili tukaba ne nsansa no mutende, kabili tukekala umuyayaya mwi sonde lipya ilili mupepi.
[Futunoti]
^ para. 18 Moneni icitabo citila Bushe Cinshi Baibolo Isambilisha?, pa mabula 170-173 apali ifyebo na fimbi.
Bushe Muleibukisha?
• Mulandu nshi umupashi wa calo wabela fye mpanga yonse?
• Fipusho nshi fine ifyo tufwile ukuyipusha?
• Fintu nshi fitatu ifyo tusambilila kuli Yesu pa lwa kupokelela umupashi wa mushilo?
[Ifipusho]
[Icikope pe bula 8]
Bushe bamalaika bamo basangwike shani ifibanda?
[Icikope pe bula 10]
Satana abomfya umupashi wa calo ku kutungulula abantu, lelo ifwe kuti twalubukako ku kusonga kwa uko
