Amepusho Ukufuma ku Babelenga

Pa Ukutendeka 6:3, tubelengapo ukuti: “Te kuti ntwalilile fye ukutekanishisha umuntu, pantu wena muntu fye. E ico inshiku alaikala myaka fye 120.” Bushe aya mashiwi yalolele mu kuti Yehova apimiine abantu ukulaikala fye imyaka 120, kabili bushe Noa apoosele imyaka yonse iyi ukushimikila fye pa kwisa kwa Lyeshi?

Icasuko kuli ici cipusho conse ni awe.

Ilyo kushilaba Ilyeshi abantu abengi baleikala imyaka iingi. Noa ali ne myaka 600 ilyo Ilyeshi lyaishile, kabili imyaka yonse pamo iyo ali no mweo yali 950. (Ukute. 7:6; 9:29) Bambi abafyelwe pa numa ya Lyeshi balikele ukucila pa myaka 120. Ku ca kumwenako, Arpakishadi afwile ilyo ali ne myaka 438 e lyo Shela afwile ne myaka 433. (Ukute. 11:10-15) Lelo mu nshita ya kwa Mose, abantu baleikala imyaka 70 nangu 80. (Amalu. 90:10) Kanshi amashiwi yaba pa Ukutendeka 6:3 tayalola mu kuti abantu bali no kulaikala fye imyaka 120.

Bushe ninshi amashiwi ya muli ili lembo ni Lesa e wale-eba Noa ukuti asoke abantu pa bonaushi bwali no kwisa nga papita imyaka 120? Awe. Pa miku iingi, Lesa alelanda na Noa. Icikomo 13 ica ili buuku citila: “Lesa atile kuli Noa: ‘Nimona ukuti inshita naifika iya konaula abantunse bonse, pantu pe sonde napafula ubunkalwe.’” Mu myaka yakonkelepo, Noa alipwishishe ukukuula icibwato, na kabili “Yehova atile kuli Noa: ‘Ingila mu cibwato, iwe na bonse aba mu ng’anda yobe.’” (Ukute. 6:13-15; 7:1-3) Kabili kwali ne nshita shimbi ilyo Yehova  ale-eba Noa pa fintu fimo.—Ukute. 8:15; 9:1, 8, 17.

Lelo, ifyo tubelenga pa Ukutendeka 6:3 fyalipusana; tapalumbulwa Noa kabili ici cikomo tacilanda ukuti Lesa ale-eba Noa. Kanshi kuti twatila Lesa alelanda pa bufwayo bwakwe nangu ico apangile ukucita. (Linganyeniko Ukutendeka 8:21.) Calicindama ukwishiba ukuti mu malyashi yalecitika akale sana ilyo na Adamu talabumbwa, tulasangamo amashiwi pamo nga: “Lesa atile.” (Ukute. 1:6, 9, 14, 20, 24) Te kuti tutwishike no kutwishika ukuti Yehova talelanda ku muntu uwali pano isonde, pantu na kuba, ninshi talabumba umuntu.

Kanshi nacilinga, ukulanda ukuti Ukutendeka 6:3 kulanda pa bufwayo bwa kwa Lesa ubwa konaula abantu babipa abali pe sonde ilya nshita. Yehova apingwilepo ukucita ifyo mu myaka 120, nangu ca kuti Noa ali talaishiba ukuti e fyo cikaba. Nomba mulandu nshi Lesa apimiine inshita? Mulandu nshi uwa kulalolela imyaka yonse iyo?

Umutumwa Petro atweba ifyalengele. Atila: “Mu nshiku sha kwa Noa, . . . Lesa atekele umutima ilyo icibwato calepangwa, umo abantu abanono fye abaali 8 bapusukiile ku menshi.” (1 Pet. 3:20) Kanshi, ilyo Lesa alefwaya ukucita ico apangile ukucita pa numa ya myaka 120, kwali fimo ifyalekabilwa ukucitwa. Ilyo papitile imyaka 20, Noa no mukashi wakwe batendeke ukukwata abana. (Ukute. 5:32; 7:6) Abana bakwete batatu balikulile kabili balyupile no kuupa, basuka ‘bafika na bantu 8.’ Lyena bali no kukuula icibwato, icali no kubasendela inshita pa kucipwisha pantu cali no kuba icikulu, lelo abalekuula bali fye lupwa ulunono ulwa kwa Noa. Kanshi ukutekanya kwa kwa Lesa pa myaka 120 kwalengele ifi fyonse ukucitika no kupekanya umwa kupusukila ifya mweo, no kulenga abantu ba citetekelo 8 ‘bapusuke ku menshi.’

Baibolo tailanda mu kulungatika umwaka Yehova aebele Noa ukuti kukaba Ilyeshi. Na kabili, apo abana bakwe balifyelwe, bakula, no kuupa baupa, nakalimo ilya nshita ninshi kushele fye imyaka 40 nangu 50 pa kuti Ilyeshi lise. Lyena Yehova aebele Noa ati: “Nimona ukuti inshita naifika iya konaula abantunse bonse.” Kabili alandile no kuti Noa akuule icibwato icikalamba kabili emo akengile no lupwa lwakwe. (Ukute. 6:13-18) Muli iyi myaka yonse, Noa taishibikwe fye ukuti mulungami lelo ‘aleshimikila abantu pa fyalungama.’ Alelanda ubukombe bwa kusoka abantu, ukubeba pa fyo Lesa aiminine pa konaula abalecita ifyabipa pali ilya nshita. Noa taishibe umwaka ico cali no kucitika, lelo alishibe ukuti ukucitika kwena cali no kucitika. Kabili mwalishiba ukuti calicitike.—2 Pet. 2:5.