Bushe Mulamona Ukuti Yehova ni Shinwe?

ILYO umusambi umo aebele Yesu ukuti, “Mwe Shikulu, tusambilisheni ifya kupepa,” Yesu amwebele ukutila: “Lyonse ilyo mulepepa, muletila, ‘Mwe Shifwe, ishina lyenu libe ilya mushilo.’” (Luka 11:1, 2) Ilyo Yesu alelanda pali Yehova, afwaya nga abomfeshe amalumbo ya mucinshi pamo nga “Uwa Maka Yonse,” ‘Kasambilisha Uwapulamo,’ “Kabumba,” “Uwa Nshiku ne Nshiku,” nelyo “Imfumu ya muyayaya.” (Ukute. 49:25; Esa. 30:20; 40:28; Dan. 7:9; 1 Tim. 1:17) Lelo Yesu asalilepo ukubomfya ishiwi lya kuti “Shifwe.” Mulandu nshi? Nalimo ni co afwaya ukuti ilyo tulepepa ku Wapulamo mu bubumbo bonse, tuleicefya nga filya umwana umunono aicefya nga alelanda na wishi.

Nangu cibe fyo, abantu bamo balafilwa ukusumina ukuti Lesa kuti aba Shibo. E fyo cali ku Mwina Kristu we shina lya Atsuko. * Atile, “Pa myaka iingi ukutula apo nabatishiwilwe, nalifililwe ukupalama kuli Yehova no kulalanda na ena mwi pepo kwati ndelanda na Batata.” Ukulanda pa calengele ukuti afilwe ukupalama kuli Yehova, atile, “Nshibukisha ilyo batata banangilepo ukutemwa.”

Muli shino nshiku sha kulekelesha, abafyashi balafilwa ukutemwa abana babo nga fintu cifwile ukuba. (2 Tim. 3:1, 3) Kanshi te kuti tupape no kupapa nga twaumfwa bamo balanda nge fyalandile Atsuko. Lelo tatufwile ukusakamana pantu twalikwata imilandu iingi iingalenga tulemona Yehova ukuti ni Shifwe uwatutemwa.

Yehova ni Kapekape

Nga tulefwaya ukulamona Yehova ukutila ni Shifwe, tufwile ukumwishiba bwino. Yesu atile, “Takwaba uwaishiba bwino Umwana kano Wishi, kabili takwaba nangu umo uwaishiba bwino Wishi kano Umwana, e lyo na onse uo Umwana afwaya ukumusokolwela.” (Mat. 11:27) Icikalamba icingatwafwa ukulamona Yehova ukuti ni Shifwe kulatontonkanya pa fyo Yesu asokolola Lesa wa cine. Cinshi ico Yesu asokolwele pali Wishi?

Pa kulanda pali Yehova ukuti e Ntulo ya bumi bwakwe, Yesu atile: “Naba no mweo pa mulandu wa kwa Tata.” (Yoh. 6:57) Na ifwe bene twaba no mweo pa mulandu wa kwa Shifwe. (Amalu. 36:9; Imil. 17:28) Cinshi calengele ukuti Yehova apeeleko bambi umweo? Bushe te pa mulandu wa kuti alibatemwa? Kanshi na ifwe tufwile ukutemwa Shifwe wa ku muulu pali ubu bupe atupeela.

Inshila iikalamba iyo Lesa alangilamo ukutemwa kwakwe ku bantunse ni pa kupeela Yesu ukuba ilambo lya cilubula. Icilubula calenga ukuti abantunse ababembu bapalame sana kuli Yehova ukupitila mu Mwana wakwe. (Rom. 5:12; 1 Yoh. 4:9, 10) Kabili apo Shifwe wa ku muulu alafikilisha amalayo yakwe, tatutwishika ukuti bonse abamutemwa no kumumfwila, ku ntanshi bakalubuka no ‘kuba abana ba kwa Lesa.’—Rom. 8:21.

Na kabili Shifwe wesu uwa ku muulu alalenga ‘akasuba ukutubalikila’ cila bushiku. (Mat. 5:45) Te lingi tutontonkanyapo ukuti calicindama ukupepa ukutila akasuba kabalike. Lelo tulakakabila sana akasuba kabili nga katula tulomfwa bwino! E lyo kabili, Shifwe e Kapekape wapulamo, pantu ena aleshiba ifyo tulekabila na lintu fye tatulamulomba. E ico kanshi, tufwile ukulakwatako inshita ya kumona ifyo Shifwe wa ku muulu asakamana ifibumbwa fyakwe e lyo no kumutasha pali ico.—Mat. 6:8, 26.

Shifwe ‘Alatucingilila Cikuuku Cikuuku’

Ukusesema kwa kwa Esaya kwakoseleshe abantu ba kwa Lesa aba ku kale ukuti: “Impili  shikasela no tupili tukatelententa, lelo bucibusa bwandi tabwakafume pali iwe ne cipangano candi ica mutende tacakatelentente, e fyo asosa Yehova uutucingilila cikuuku cikuuku.” (Esa. 54:10, The Bible in Living English) Ipepo Yesu apepele pa bushiku bwa kulekeleshako pano calo lilanga ukuti cine cine Yehova ‘alacingilila cikuuku cikuuku.’ Yesu apepeeleko abasambi bakwe, ukuti: “Bena bali muli ici calo kabili ine ndeisa kuli imwe. Mwe Tata wa mushilo, bacingilileni pa mulandu we shina lyenu.” (Yoh. 17:11, 14) Yehova alisakamene abakonshi ba kwa Yesu kabili alibacingilile.

Cimo ico Lesa acita muno nshiku pa kutucingilila ku fiteyo fya kwa Satana, kutupekanishisha ifya kulya fya ku mupashi ifyo tukabila ukupitila mu “musha wa cishinka kabili uwashilimuka.” (Mat. 24:45) Ukulakonka ifyo umusha apekanya ifitukosha muli bukapepa kulafwaikwa pa kuti ‘tufwale ifya bulwi fyonse ifya kwa Lesa.’ Ku ca kumwenako, tontonkanyeni pa “nkwela iikalamba iya citetekelo,” iyo ‘tushimishako imifwi yonse iya mulilo iya mubifi.’ (Efes. 6:11, 16) Icitetekelo cesu cilatucingilila ku fingonaula bucibusa bwesu na Lesa kabili e cilanga ukuti twalishiba ukutila Shifwe alikwata amaka ya kutucingilila.

Kuti twaishiba ifingi pa fyaba Shifwe wa ku muulu na pa cikuuku cakwe nga twamona bwino bwino ifyo Umwana wa kwa Lesa alecita ilyo aali pano isonde. Moneni ifyo ilembo lya kwa Marko 10:13-16 lilanda. Pali ili lembo bayambula amashiwi ayo Yesu alandile ilyo alelanda ku basambi bakwe ukutila: “Lekeni abana banono bese kuli ine.” Ilyo abana banono baishile kuli ena, Yesu alibekete cikuuku cikuuku kabili alibapaalile. Abana bafwile balitemenwe nga nshi! Kabili apo Yesu atile: “Uwamona ine, ninshi amona na Tata,” twalishiba ukuti Lesa wa cine alafwaya ifwe ukuya kuli ena.—Yoh. 14:9.

Yehova Lesa e Ntulo ya kutemwa ukushipwa. E wapulamo mu kutupayanishisha ifyo tukabila kabili e utucingilila, e lyo alafwaya twapalama sana kuli ena. (Yako. 4:8) Kanshi ukwabula no kutwishika Yehova e Shifwe umusuma nga nshi!

Tulanonkelamo Sana!

Tulanonkelamo sana nga twacetekela Yehova ukuti ni Shifwe uwaba no kutemwa kabili uwa cikuuku. (Amapi. 3:5, 6) Yesu alinonkelemo mu kucetekela Wishi no mutima onse. Kristu aebele abasambi bakwe ukuti, “nshaba neka iyo, lelo Tata uwantumine aba na ine.” (Yoh. 8:16) Yesu lyonse aleshintilila pa kwafwa kwa kwa Yehova. Ku ca kumwenako, ilyo alebatishiwa, Wishi alimwebele amashiwi ya kumukoselesha aya kuti: “Uyu e Mwana wandi, uwatemwikwa, uo nsekelamo.” (Mat. 3:15-17) Na lintu aali mupepi no kufwa, Yesu abilikishe ukuti: “Mwe Tata, mu minwe yenu e mo natuula umweo wandi.” (Luka 23:46) Na pali iyi ine nshita, Yesu alicetekele sana Wishi.

Na ifwe bene e fyo tufwile ukucita. Apo Yehova aba na ifwe, cinshi twingatiina? (Amalu. 118:6) Ba Atsuko, abo tulandilepo kale, batemenwe ukushintilila pa maka yabo abene nga baba na mafya. Lelo batampile ukusambilila pa fyo Yesu ali na pa mulimo alebomba, kabili ilyo balesambilila pali Yesu babikile sana amano ku kumona ifyo Yesu atemwanene nga nshi na Wishi wa ku muulu. Cinshi cafuminemo? Ba Atsuko batile: “Nalisambilile umo calola ukukwata Tata e lyo no kushintilila pali ena.” Basosele no kuti: “Naleumfwa uwacingililwa sana kabili nali ne nsansa. Kanshi tatufwile ukulasakamikwa pa cili conse.”

Fisuma nshi fimbi ifyo tukwata nga tulemona Yehova ukuti ni Shifwe? Abana mu cifyalilwa fye balatemwa abafyashi babo kabili balafwaya no kulacita ifya kubatemuna. Pa mulandu wa kuti Umwana wa kwa Lesa alitemenwe Wishi, ‘lyonse alecita ifintu ifisuma ifya kutemuna Wishi.’ (Yoh. 8:29) Na ifwe bene, ukutemwa Shifwe wa mu muulu kuti kwalenga twaba aba mano no ‘kulamulumbanya.’—Mat. 11:25; Yoh. 5:19.

Shifwe ‘Alekata Ukuboko Kwesu Ukwa ku Kulyo’

Shifwe wa ku muulu alatupeela na “kaafwa,” e kutila umupashi wa mushilo. Yesu atile, ‘ukamutungulula mu cine conse.’ (Yoh. 14:15-17; 16:12, 13) Umupashi wa mushilo uwa kwa Lesa  kuti watwafwa ukwishiba bwino Shifwe. Kuti watwafwa ukuwisha “ifyaba nga malinga ayakosa,” e kutila ifyaba mu mitima yesu e lyo na matontonkanyo yalubana, ne ci kuti calenga ‘twanasha amatontonkanyo yonse pa kuti yanakile Kristu.’ (2 Kor. 10:4, 5) E ico kanshi, lekeni tulepepa kuli Yehova pa kuti aletupeela “kaafwa” uo alaya ukutupeela, kabili ilyo tulepepa twilatwishika ukuti ‘Shifwe wa mu muulu akapeela umupashi wa mushilo ku bamulomba.’ (Luka 11:13) Na kabili calicindama ukulapepa ukuti umupashi wa mushilo uletwafwa ukupalama sana kuli Yehova.

Umwana umunono alomfwa ukuti nacingililwa kabili taba na mwenso nga ca kuti bawishi nabamwikata pa kuboko ilyo baleenda. Nga ca kutila mu cine cine mumona Yehova ukuti ni Shinwe, ninshi mulingile ukucetekela aya mashiwi ya kusansamusha ayatila: “Ine, ne Yehova Lesa obe, ndeikata ukuboko kobe ukwa ku kulyo, ndekweba ati, ‘Witiina. Ine nkakwafwa.’” (Esa. 41:13) Kuti mwakwata ishuko lya ‘kulaenda’ na Lesa ku ciyayaya. (Mika 6:8) Nga mwatwalilila ukulacita ukufwaya kwa kwa Lesa, pa mulandu wa kuti mumona Yehova ukuti ni Shinwe, mukamona ukuti alimutemwa, mukaba ne nsansa, kabili mukalaumfwa ukuti mwalicingililwa.

[Futunoti]