Mulandu Nshi Mufwile Ukuipeelela Kuli Yehova?

“Buno bushiku Lesa wandi uo mombela acituma malaika wakwe.”—IMIL. 27:23.

1. Finshi abalefwaya ukubatishiwa babalilapo ukucita, kabili ici cilenga twaipusha amepusho nshi?

“PA MULANDU we lambo lya kwa Yesu Kristu, bushe namulapila ku membu shenu no kuipeela ku kucita ukufwaya kwa kwa Yehova?” Ici e cipusho cimo pa mepusho yabili ayo bepusha abaleya ku kubatishiwa pa numa ye lyashi lya lubatisho. Mulandu nshi Abena Kristu balingile ukuipeelela kuli Yehova? Bushe ukuipeela kuli Lesa kutunonsha shani? Mulandu nshi Lesa ashingapokelela umuntu uufwaya ukumupepa ukwabula ukuipeela kuli ena? Pa kumfwikisha ifyasuko, kano twabala twaishiba umwalola ukuipeela.

2. Bushe ukuipeela kuli Yehova e kutila shani?

² Bushe ukuipeela kuli Lesa e kutila shani? Moneni ifyo umutumwa Paulo alandile pa kwampana kwakwe na Lesa. Ilyo ali na bambi mu bwato ubwali mupepi no kubunda, aitile Yehova ati “Lesa wandi uo mombela.” (Belengeni Imilimo 27:22-24.) Abena Kristu ba cine bonse ba kwa Yehova. Lelo, icalo “calaala mu maka ya mubifi.” (1 Yoh. 5:19) Abena Kristu baba aba kwa Yehova ilyo baipeela kuli ena mwi pepo, na o asumina ukuti bakwe. Uko kuipeela kwaba mulapo wa muntu pa lwakwe. Icikonkapo kubatishiwa mu menshi.

3. Bushe ulubatisho lwa kwa Yesu lwali cilangililo ca cinshi, kabili bushe abasambi bakwe kuti bacita shani pa kuti bakonke ici cilangililo?

³ Yesu alitubikile icilangililo ilyo asalilepo ukucita ukufwaya kwa kwa Lesa. Apo afyalilwe mu luko lwa bena Israele ulwaipeele kale kuli Lesa, na o wine ali uwaipeela. Na lyo line, ukupitila mu kubatishiwa, acitile fimo ifyacila pa fyalefwaikwa mu Mafunde. Icebo ca kwa Lesa cilanga ukuti asosele ati: “Moneni! Naisa . . . ku kucita ukufwaya kwenu, mwe Lesa.” (Heb. 10:7; Luka 3:21) Kanshi ulubatisho lwa kwa Yesu lwali cilangililo ca kuti naipeela kuli Lesa ku kucita ukufwaya kwa kwa Wishi. E fyo abasambi bakwe nabo bacita ilyo baipeela ukuti babatishiwe. Lelo kuli bena ilyo babatishiwa mu menshi, balanga abalemonako ukuti bali-ipeela kuli Lesa mwi pepo.

 Ifyo Ukuipeela Kutunonsha

4. Cinshi bucibusa bwali pali Davidi na Yonatani bulangilila pa lwa kulayana?

⁴ Kuli fwe Bena Kristu, ukuipeela kuli Lesa te bulayo fye, cintu ico tufwile ukucindamika sana. Lelo, bushe ukuipeela kutunonsha shani? Pa kulangilila, natulande pa fyo abantu banonkelamo nga nababika sana amano kuli bucibusa bwabo. Pa kuti munonkelemo mu kukwata icibusa, mufwile ukuipekanya ukucita ififwaikwa pa kuti mube cibusa. Mufwile ukwishiba ukuti mulingile ukulacita fimo ku kulanga ukuti mwalibika amano ku munenu. Bucibusa bumo ubusuma sana ubo Baibolo yalandapo ni bulya ubwa kwa Davidi na Yonatani. Bapangene ne cipangano pa mulandu wa kuti balitemwanene. (Belengeni 1 Samwele 17:57; 18:1, 3.) Nangu ca kuti bucibusa umo abantu balayana umusango yo tabwaseeka, bucibusa ubwingi bulawama ilyo ifibusa baleumfwa ukuti bafwile ukulacitilana fimo.—Amapi. 17:17; 18:24.

5. Bushe umusha alecita shani pa kuti atwalilile ukwikala na shikulu wakwe umusuma?

⁵ Ifunde ilyo Lesa apeele abena Israele lilondolola bucibusa na bumbi umo abantu bacitile ne fipangano. Nga ca kuti umusha alefwaya ukwikalilila na shikulu wakwe umusuma pa mulandu wa kuti aleyumfwa uwacingililwa, kuti bacita icipangano nankwe icibelelela. Ifunde litila: “Ngo musha akosapo ukusosa ati, ‘Nalitemwa shikulu wandi icine cine, no mukashi wandi pamo na bana bandi; nshilefwaya ukufuma no kuba umuntungwa,’ e lyo shikulu wakwe akamupalamike kuli Lesa wa cine kabili akamupalamike na ku ciibi nelyo ku luceshi lwa pa mwinshi; kabili shikulu wakwe akamutule ukutwi ku ca kutulilako, na o akaba umusha wakwe umuyayaya.”—Ukufu. 21:5, 6.

6, 7. (a) Bushe abantu bamwenamo shani mu fipangano? (b) Bushe ici cilanga cinshi pali bucibusa bwesu na Yehova?

⁶ Mu cupo namo abaupana bakabila ukukakatila sana ku fyo balayana. Mu cupo, umuntu acita icipangano ku muntu munankwe, te ku cupo iyo. Nga ca kuti umwaume no mwanakashi bekala fye pamo ukwabula ukuupana, tabacingililwa, na bana babo bene tabacingililwa. Lelo ku mwaume no mwanakashi abalayana no kuupana mu mucinshi, kulaba umulandu wacindama uwa mu Baibolo uulenga bale-esha na maka ukupwisha amafya yabo bwino bwino.—Mat. 19:5, 6; 1 Kor. 13:7, 8; Heb. 13:4.

⁷ Mu nshita sha mu Baibolo, abantu balemona ukuti cisuma ukucita ifipangano ilyo balecita ifya makwebo nangu ilyo balelemba abantu incito. (Mat. 20:1, 2, 8) E fyo caba na lelo. Ku ca kumwenako fye, cilatuwamina nga ca kuti ilyo tatulaingila mu fya makwebo na umo nangu ilyo tatulatampa incito twalembeshanya ifipangano. Kanshi, nga ca kuti ukulayana kulalenga abantu balemwenamo muli bucibusa, mu cupo, e lyo na mu fya ncito, ninshi ukuipeela kuli Yehova kwena kuti kwalenga mwamwenamo sana muli bucibusa bwenu na ena! Natulande nomba pa fyo abantu ku kale balemwenamo mu kuipeela kuli Yehova Lesa ne co balingile ukubika sana amano ku kuipeela kwabo.

Ifyo Abena Israele Banonkelemo mu Kuipeela Kuli Lesa

8. Bushe ukuipeela kwa bena Israele kuli Lesa kwalolele mwi?

⁸ Uluko lwa Israele lwaipeele kuli Yehova ilyo lwalapile kuli Lesa. Yehova abalonganike pa lupili lwa Sinai, e lyo abebele ati: “Nga mwakulaumfwa kwi shiwi lyandi kabili nga mwakulasunga icipangano candi, e lyo mukaba nge cipe candi ica mutengo pa bantu na bantu bonse.” Awe abantu bonse ba-asukile pamo no kutila: “Fyonse ifyo Yehova asosele twakulacita.” (Ukufu. 19:4-8) Mu kuipeela kwa bena Israele mwasanshishe ifingi, te kulaya fye iyo. Ukuipeela kwabo kwalolele mu kuti bali ba kwa Yehova, na Yehova alebasunga nge “cipe [cakwe] ica mutengo.”

9. Bushe abena Israele banonkelemo shani mu kuipeela kuli Lesa?

 ⁹ Abena Israele balinonkelemo nga nshi mu kuba abantu ba kwa Yehova. Yehova ali uwa cishinka kuli bena kabili alebasakamana filya fine fye umufyashi asakamana umwana uo atemwa. Aebele abena Israele ati: “Bushe umwanakashi kuti alaba umwana wakwe uonka ica kuti afilwa ukumfwila uluse umwana uwafuma mwi fumo lyakwe? Kwena aba banakashi kuti balaba, lelo ine nshakakulabe.” (Esa. 49:15) Yehova alibapeele Amafunde ya kubatungulula, bakasesema ba kubakoselesha, kabili alebacingilila ukubomfya bamalaika. Kemba wa malumbo umo alembele ati: “Asosa icebo cakwe kuli Yakobo, ifipope fyakwe no bupingushi bwakwe kuli Israele. Tabala acita ifyo ku luko lumbi.” (Amalu. 147:19, 20; belengeni Amalumbo 34:7, 19; 48:14.) Filya fine Yehova asakamene uluko lwakwe ku kale, e fyo asakamana na baipeela kuli ena pali lelo.

Umulandu Tufwile Ukuipeelela Kuli Lesa

10, 11. Bushe ilyo tufyalwa, tulaba mu lupwa lwa kwa Lesa? Londololeni.

¹⁰ Ilyo bamo baletontonkanya pa kuipeela kwa Bena Kristu kuli Lesa na pa lubatisho, kuti balatontonkanya abati, ‘Cinshi teti ndepepela fye Lesa ukwabula ukuipeela kuli ena?’ Kuti twaishiba umulandu ilyo twatontonkanya pa fyo twaba kuli Lesa. Ibukisheni ukuti pali ifwe bonse tapali uufyalilwa mu lupwa lwa kwa Lesa, ne calenga lubembu lwa kwa Adamu. (Rom. 3:23; 5:12) Kanshi ukuipeela kuli Lesa kulafwaikwa sana pa kuti atupokelele mu lupwa lwakwe. Natumone umulandu cabela ifyo.

¹¹ Tapali nangu umo pali ifwe uwakwata umufyashi uwingamupeela umweo wa muyayaya nga filya Lesa alefwaya cibe. (1 Tim. 6:19) Ilyo tufyalwa tatuba abana ba kwa Lesa pantu lintu Adamu na Efa babembwike, abantunse bonse balitalwike kuli Shibo uwa kutemwa kabili Kabumba. (Linganyeniko Amalango 32:5.) Ukufuma lilya, abantunse tababa mu lupwa lwa kwa Yehova, balitaluka kuli Lesa.

12. (a) Bushe abantunse abashapwililika kuti baba shani mu lupwa lwa kwa Lesa? (b) Finshi tufwile ukucita ilyo tatulabatishiwa?

¹² Lelo, ifwe umo umo kuti twalomba Lesa ukuti atupokelele mu lupwa lwakwe ulwa babomfi abo apokelela. * Bushe ico kuti cacitika apo ifwe tuli babembu? Umutumwa Paulo alembele ati: “Twabwelele kuli Lesa mu mfwa ya Mwana wakwe ilyo twali abalwani.” (Rom. 5:10) Ilyo tubatishiwa, tulomba kampingu musuma kuli Lesa pa kuti atupokelele. (1 Pet. 3:21) Lelo, kwaliba ifyo tufwile ukucita ilyo tatulabatishiwa. Tufwile ukwishiba Lesa, ukumutetekela, ukulapila, no kwalula imibele yesu. (Yoh. 17:3; Imil. 3:19; Heb. 11:6) Lelo kwaba na cimbi ico tufwile ukucita ilyo Lesa talatupokelela mu lupwa lwakwe. Cinshi ico cine?

13. Mulandu nshi umuntu afwile ukucitila umulapo wa kuipeela kuli Lesa pa kuti abe mu lupwa lwa bakapepa Bakwe?

¹³ Ilyo umuntu uwataluka kuli Lesa talaba mu lupwa lwa babomfi ba kwa Lesa abapokelelwa, afwile atala alaya ubulayo bwacindama kuli Yehova. Pa kuti tumfwikishe umulandu cabela ifi, natutontonkanye pa mwaume uo na bantu bacindika, uwaumfwila umwana wa nshiwa uluse kabili alefwaya amusende ukuti abe mu lupwa lwakwe. Uyu mwaume bamwishiba ukuti muntu musuma. Na lyo line, ilyo talasenda uyu mwana wa nshiwa ukuti abe mu lupwa lwakwe, kuti afwaya uyu mwana ukulaya ubulayo. E ico kuti atila, “Ilyo nshilakusenda ukuti ube ngo mwana wandi, ndefwaya ukwishiba nga ukantemwa no kuncindika filya wingacindika umufyashi obe.” Uyu mwana nga alaya ukuti e fyo  akacita, e lyo engamupokelela ukuba mu lupwa lwakwe. Ca mano ico, bushe te ifyo? E fyo na Yehova acita. Mu lupwa lwakwe, apokelela fye abaitemenwa ukucita umulapo wa kuipeela kuli ena. Baibolo isosa ukuti: “Ituuleni kuli ena: nge lambo lya mweo, abaipeela kabili abalinga ukuti apokelele.”—Rom. 12:1, The New English Bible.

Cilangililo ca Kutemwa ne Citetekelo

14. Cinshi twingasosela ukuti ukuipeela cilangililo ca kutemwa?

¹⁴ Ukucita umulapo wa kuipeela kuli Lesa cilangililo ca kuti twalitemwa Yehova no mutima wesu onse. Kwaba kwati kucita mulapo wa pa bwinga. Shibwinga Umwina Kristu alanga ukuti alitemwa nabwinga wakwe ukupitila mu kulapa ukuti akaba uwa cishinka kuli ena nangu cafye shani. Talaya fye ukuti akalacita fimo lelo ubulayo bwakwe bwa kuti akaba uwa cishinka ku muntu. Shibwinga Umwina Kristu aleshiba ukuti teti asende nabwinga nga ca kuti talapile umulapo wa cupo. E fyo caba na kuli ifwe. Teti tuipakishe ubusuma bwaba mu kuba mu lupwa lwa kwa Yehova ukwabula ukulapa umulapo wa kuipeela. Kanshi tulaipeela kuli Lesa te mulandu no kuba ababembu, pantu tufwaya ukuba abakwe kabili tusalapo ukuba aba cishinka kuli ena, nangu cafye shani.—Mat. 22:37.

15. Mulandu nshi twingasosela ukuti ukuipeela kulanga ukuti tuli ba citetekelo?

¹⁵ Ilyo twaipeela kuli Lesa, tulanga icitetekelo cesu. Mulandu nshi twasosela ifyo? Icitetekelo cesu muli Yehova cilenga tucetekele ukuti ukupalama kuli Lesa kusuma kuli ifwe. (Amalu. 73:28) Twalishiba ukuti te lyonse cikanguka ukulaenda na Lesa ilyo tuleikala mu “nkulo iyapondama kabili iyapotama,” lelo twalicetekela ubulayo bwa kwa Lesa ubwa kuti akulatwafwa muli fyonse ifyo tucita. (Fil. 2:15; 4:13) Twalishiba ukuti tatwapwililika, lelo tatutwishika ukuti Yehova akulatubelela uluse nga ca kuti twalufyanya. (Belengeni Amalumbo 103:13, 14; Rom. 7:21-25.) Twatetekela ukuti Yehova akatulambula pa mupampamina wesu uwa kutwalilila ukuba aba kaele.—Yobo 27:5.

Ukuipeela Kuli Lesa Kulaleta Insansa

16, 17. Mulandu nshi ukuipeela kuli Yehova kuletela insansa?

¹⁶ Ukuipeela kuli Yehova kulaleta insansa icine cine pantu tuitemenwa fye fwe bene. Yesu alandile icishinka cacindama ilyo atile: “Mwaba insansa ishingi mu kupeela ukucila ishaba mu kupokelela.” (Imil. 20:35) Yesu ali-imwenene insansa shaba mu kupeela ilyo aishile mu kupyunga pe sonde. Inshita shimo, taletuusha, talelya, nangu ukuipakisha fimo pa kuti fye afwe bambi ukusanga inshila ya ku mweo. (Yoh. 4:34) Yesu aleumfwa bwino ukulenga umutima wa kwa Wishi ukusekelela. Atile: “Ncita ifya kumusekesha.”—Yoh. 8:29; Amapi. 27:11.

¹⁷ Kanshi Yesu alelangilila abasambi bakwe imikalile ileta insansa ilyo atile: “Umuntu nga  alefwaya ukunkonka, aikaane umwine.” (Mat. 16:24) Nga tulecite fyo tulapalama sana kuli Yehova. Takwaba umbi uo twingaituula mu minwe yakwe uwingatusakamana ukucila pali Lesa.

18. Mulandu nshi ukuipeela kuli Yehova no kulacita ukufwaya kwakwe kuletela insansa ukucila ukuipeela ku cintu cimbi nangu ku muntu uuli onse?

¹⁸ Ukuipeela kuli Yehova e lyo no kulacita ififwaikwa ku baipeela, e kutila ukulacita ukufwaya kwakwe, kulaleta sana insansa ukucila ukuipeela ku cintu cimbi nangu ku muntu uuli onse. Ku ca kumwenako, abantu abengi bapoosa ubumi bwabo bonse ku kufwaya ifyuma ukwabula no kusanga insansa shine shine. Lelo abaipeela kuli Yehova balasanga insansa sha muyayaya. (Mat. 6:24) ‘Ukubombela pamo na Lesa’ mucinshi uubaletela insansa. Nomba, te ku mulimo baipeela, lelo baipeela kuli Lesa uubatasha pa kuipeelesha kwabo. (1 Kor. 3:9) Takwaba umbi uwingabatasha nge fyo Lesa abatasha. Aba cishinka kuli ena akababwesesha na ku bwaice pa kuti bakatwalilile ukunonkelamo umuyayaya mu fyo asakamana abantu bakwe.—Yobo 33:25; belengeni AbaHebere 6:10.

19. Lishuko nshi abaipeela kuli Yehova bakwata?

¹⁹ Ukupeela ubumi bwenu kuli Yehova kulalenga mwapalama sana kuli ena. Baibolo itila: “Palameni kuli Lesa, na o akapalama kuli imwe.” (Yako. 4:8; Amalu. 25:14) Mu cipande cikonkelepo, tuli no kulanda pa mulandu tushifwile ukutwishikila pa kuipeela kuli Yehova.

[Futunoti]

Kuti Mwa-asuka Shani?

• Bushe ukuipeela kuli Lesa calola mwi?

• Bushe ukuipeela kuli Lesa kutunonsha shani?

• Mulandu nshi Abena Kristu balingile ukuipeelela kuli Yehova?

[Amepusho]

[Icikope pe bula 6]

Ukuipeela kuli Lesa no kulacita ukufwaya kwa kwa Lesa kulaleta insansa ishibelelela