Mulesakamana Bamunyinenwe ne Nkashi Abakoma Amatwi!

MUNO nshiku abantu ba kwa Lesa baba lupwa ulukalamba ulwatendeke kale sana na bantu ba kwa Lesa abaliko kale. Pali aba bantu paba Samwele, Davidi, Samsone, Rahabu, Mose, Abrahamu, Sara, Noah, na Abele. Pa bantu ba kwa Lesa paba na bankomamatwi abengi. Ku ca kumwenako, ababalilepo ukuba Inte sha kwa Yehova mu calo ca Mongolia bali ni bankomamatwi babili abaupana. Kabili icalengele icilye ca European Court of Human Rights cisuminishe Inte sha kwa Yehova ukulalongana no kushimikila mu Russia, ni bukaele bwa Bena Kristu banensu abakoma amatwi aba mu Russia.

Muno nshiku, “umusha wa cishinka kabili uwashilimuka” alifumya impapulo mu ndimi sha bankomamatwi kabili aliteyanya ifilonganino mu ndimi sha ba nkomamatwi ukubikako fye no kulongana kukalamba e lyo no kulongana kwa citungu. (Mat. 24:45) Bankomamatwi balinonkelamo sana muli uku kupekanya. * Lelo, bushe mwalyesha ukwelenganya ifyo calekosela bankomamatwi ukusambilila pali Lesa wa cine no kulunduluka ukwabula amapekanyo ya musango uyu? Bushe mwalitala amutontonkanya pa fyo mwingafwa bankomamatwi abo mwikala nabo mu ncende imo ine?

Ifyo Cali Kale

Nga mwaipwishe bankomamatwi abakalamba ifyo cali pa kuti beshibe Lesa, kuti bamweba ifyo baumfwile ilyo baishibe ukuti Lesa alikwata ishina. Kuti bamulondolwela bwino sana ifyo ukwishiba fye ishina lya kwa Lesa kwalengele baaluke ne fyo kwalengele babe ifibusa fya kwa Lesa pa myaka iingi ilyo ama vidio na ma DVD ayalenga basambilile ifyashika ifya mu Baibolo tayalabako. Kuti bamweba ifyo cali ilyo balesangwa ku kulongana ukwabula aba kubapilibwila mu lulimi lwa bankomamatwi. Pali ilya nshita umo aleikala mupepi nabo e lyo alelemba ifishinka pa kuti abafwe ukwishiba ifyo kalanda alelanda. Ifi fine e fyo munyinefwe umo nkomamatwi asambilile Baibolo pa myaka 7 ilyo uwa kupilibwila mu lulimi lwa bankomamatwi ashilamoneka.

Ba Nte abakalamba bankomamatwi balebukisha ifyo balepitamo nga baleshimikila capamo na ba mu cilonganino ku bantu abomfwa. Ku kuboko kumo balelangisha ipepala apo balembele ifya kulanshanya na bo balesanga pa mayanda e lyo ku kuboko kumbi e ko baleikatila Ulupungu lwa kwa Kalinda na Loleni! ifyo baleshalika. Caleafya ukutungulula isambililo ku muntu umbi uwakoma amatwi pantu balebomfya impapulo umwalembelwe ifintu ifyo bonse bashaleishiba na bwino bwino. Bakasabankanya abakalamba bankomamatwi bafwile balebukisha ifyo balebipilwa ilyo bambi balefilwa ukwishiba ifyo balelandapo ica kutila te kuti batwalilile no kushimikilako umuntu pa fya kwa Lesa. Kabili balishiba ne fyo cumfwika nga ca kuti umuntu alitemwa Yehova nga nshi nomba teshibe bwino bwino ifya kucita. Mulandu nshi twasosela ifi? Baletwishika pantu tabaleshininkisha ukuti ifyo baishiba pa lyashi limo fya cine.

Lelo te mulandu ne fi fipindami, bamunyinefwe ne nkanshi abakoma amatwi balitwalilila ukuba aba kaele. (Yobo 2:3) Balitekenye ilyo balelolela Yehova. (Amalu. 37:7) Pali nomba alibapaala nga nshi ukucila ifyo abengi pali bena bale-enekela.

Ku ca kumwenako, moneni ifyo munyinefwe uwakoma amatwi uwaupa kabili uwakwata na bana alebombesha. Lyonse aletungulula isambililo lya lupwa ninshi na mavidio ya lulimi lwa bankomamatwi tayalabako. Umwana wakwe  umo ebukisha ukuti: “Tacaleangukila batata ukutungulula isambililo lya lupwa pantu kwali fye amabuuku ayapulintwa kabili eyo balebomfya pa kutusambilisha. Ilingi line tabaleumfwikisha ifyo balebelenga. Apo twali abaice, na ifwe bene twalelenga isambililo lya-afishako. Nga balondolwela ifintu mumbi, twalebebelapo fye ukuti ifyo balelondolola te fyo. Nomba te mulandu ne fi fyonse, baletungulula isambililo lya lupwa lyonse. Balemona ukuti ukutusambilishako fimo pali Yehova kwalicindeme nga nshi ukucila ifyo balebipilwa limo limo pa mulandu wa kukanaumfwikisha iciNgeleshi.”

Ica kumwenako cimbi ca ba Richard abekala ku Brooklyn, mu New York, ku America. Munyinefwe Richard uuli ne myaka ukucila pali 70, ni mpofu kabili ni nkomamatwi. Lyonse ba Richard tabapuswa ku kulongana. Pa kuya ku kulongana, banina ishitima e lyo balependa ifitesheni pa kuti beshibe apa kwikilila. Umwaka umo mu mpepo, kwalibipile sana ica kuti bamunyinefwe bapingwilepo ukuti takwabe ukulongana. Aba mu cilonganino bonse balibeshibishe lelo katwishi icalengele ukuti balabe ukwishibisha ba Richard. Ilyo bamunyinefwe bailwike icacitike, batampile ukufwaya ba Richard, kabili babasangile nabeminina pa Ng’anda ya Bufumu balelolela ukuti ifiibi fiisulwe. Ilyo babepwishe umulandu bapulile muli cilya cipuupu ca mu mpepo, batile: “Nalitemwa Yehova.”

Bushe Kuti Mwabafwa Shani?

Bushe uko mwikala kwaliba bankomamatwi? Bushe teti musambilile ululimi lwa bankomamatwi pa kuti mulebashimikilako imbila nsuma? Ilingi line, bankomamatwi balaba ne cikuuku kabili balatekanya pa kusambilisha bambi ululimi lwabo. Nga mwakumenye bankomamatwi ilyo muleshimikila nangu pa nshita fye imbi, bushe kuti mwacita shani? Mule-esha ukulanshanya nabo. Mulebalangilila ifyo mulelanda ukubomfya amaboko yenu, ukulemba nangu ukulenga ifikope, nelyo fyonse ifi twalandapo. Nangu ni lintu uyo muntu alanda ukuti talefwaya ukusambilila icine, mufwile ukwebako nkomamatwi Nte nangu uwaishiba ululimi lwa bankomamatwi pali uyo muntu. Nalimo nkomamatwi kuti aumfwa bwino ukukutika ku mbila nsuma nga ca kuti bamushimikile mu lulimi lwa bankomamatwi.

Tutile mulasambilila ululimi lwa bankomamatwi e lyo mwaba na mu cilonganino umo babomfya ulo lulimi. Bushe kuti mwacita shani pa kuti mwishibe bwino ulu lulimi no kulaumfwikisha ifyo balelanda? Nangu cingati mu cilonganino kuti mwaba bakasabankanya bambi abalanda, kuti cawama sana nga mulelanshanya nabo ukubomfya ululimi lwa bankomamatwi. Ukucita ifyo kukamwafwa ukulatontonkanishisha muli ulo lwine lulimi. Limo limo kuti mwatunkwa ukulalanda pantu e camwangukila. Lelo, pa kusambilila ululimi ululi lonse, mufwile ukulaibikilishako pa kuti mulwishibe bwino.

Ukulaibikilishako ukubomfya ululimi lwa bankomamatwi kulanga ukuti mwalitemwa bamunyinefwe ne nkashi abakoma amatwi kabili mwalibacindika. Tala elenganyeni ifyo bankomamatwi bomfwa ububi cila bushiku pa mulandu wa kukanaumfwa ifyo bambi balelanda ilyo bali ku sukulu nelyo ku ncito. Munyinefwe umo uwakoma amatwi atile: “Lyonse fye abantu  nsangwa nabo ni balya balanda. Ilingi line ndatalalilwa, mona kwati tapali uumbikileko amano. Ndomfwa ububi, limo no kumfwa fye icifukushi. Te kuti nondolole ifyo ng’umfwa inshita shimo.” Ku kulongana kwesu e ko bamunyinefwe ne nkashi abakoma amatwi bafwile ukulaipakisha ukusangwa, e ko bafwile ukulasambilila pali Lesa no kulaipakisha ukulanshanya ne fibusa.—Yoh. 13:34, 35.

E lyo kwaliba na mabumba ya bamunyinefwe ne nkashi bankomamatwi ayaba mu filonganino fya bamunyinefwe abalanda. Ilyo kuli ukulongana, kulaba ababapilibwila. Pa kuti bomfwe bwino bwino ifyo balesambilila, bamunyinefwe ne nkashi abakoma amatwi bekala ku ntanshi mu Ng’anda ya Bufumu. Ici cilenga balemona uulelanda no ulebapilibwila ukwabula icili conse ica kubapumfyanya. Nge fyo caba mu filonganino fyonse umwaba amabumba ya musango yu, aba mu cilonganino balabelela bwangu kabili tabapumfyanishiwa. Ifi fine e fyo ciba na ku kulongana kukalamba na ku kulongana kwa citungu ukusangwa bamunyinefwe ne nkashi abakoma amatwi. Abapilibwila mu ndimi sha bankomamatwi balinga ukutasha sana pantu balabombesha, ukupilibwila abakoma amatwi mu lulimi lulya lwine balanda na banabo.

Tutile mwaba mu cilonganino umwaba ibumba lya bamunyinefwe ne nkashi abakoma amatwi. Bushe kuti mwacita shani pa kulanga aba ba bwananyina ukuti mwalibatemwa? Mulebetako ku mwenu. Nga cingacitika, kuti mwasambililako ifya kulanda ifintu fimo fimo. Mwilabataluka pa mulandu fye wa kutila teti mulanshanye nabo. Nga mulesangako inshila ya kulanshanishishamo na bena no kulanga ukuti mwalibatemwa, tamwakalabe inshita shisuma isho mukalaipakisha na bena. (1 Yoh. 4:8) Fingi ifyo twingasambilila kuli bamunyinefwe ne nkashi abakoma amatwi. Balashimika amalyashi ayasuma, baleshiba ifingi, kabili na bo baliba ne mipulwe. Munyinefwe umo uo abafyashi bakwe bonse bakoma amatwi atile: “Ukutula fye apo nafyalilwa, nsangwa sana na bankomamatwi, kabili balinsambilisha ifingi nga nshi ifyo shingabweseshapo. Kuti twasambilila ifingi nga nshi kuli bamunyinefwe ne nkashi abakoma amatwi.”

Yehova alitemwa ababa ne cishinka kuli ena, ukubikako fye na bankomamatwi. Icitetekelo cabo no kushipikisha filenga icilonganino ca kwa Yehova ukuwaminako. E ico, shi natulesakamana nga nshi bamunyinefwe ne nkashi bankomamatwi!

[Futunoti]

[Icikope pe bula 31]

Bankomamatwi kuti batemwa imbila ya Bufumu nga ca kuti babashimikila mu lulimi lwa bacibulu

[Ifikope pe bula 32]

Ku kulongana kwesu e ko bamunyinefwe ne nkashi abakoma amatwi bafwile ukukoseleshiwa ilyo balesambilila ifya kwa Lesa