Bushe Mucita Shani pa Kwishiba Lesa?

Bamo kuti batwishika nampo nga Lesa alafwaya abantu ukumwishiba. Nga ca kuti alafwaya abantu ukumwishiba, bushe aisokolola shani?

JOHN CALVIN uwatendeke icalici lya baProtestanti mu 1500 alilandile bwino sana ilyo atile abantu te kuti beshibe Lesa ku maka yabo, kano Lesa umwine aisokolola kuli bena. Na lyo line, bamo balatwishika nampo nga Lesa alafwaya ukuti abantu bamwishibe. Nomba nga ca kutila alafwaya abantu ukumwishiba, bushe aisokolola shani?

Lyonse Yehova “Kabumba” nga acita ifintu, kulaba umulandu acitile fyo. Na kabili apo ni “Lesa Wa maka yonse,” alikwata amaka ya kucita fyonse ifyo afwaya. (Lukala Milandu 12:1; Ukufuma 6:3) Kuti twacetekela ukuti lyonse fye alasokolola ifyo afwaya ukucita ku bantunse, pantu kasesema wakwe Amose alembele ukuti: “Pantu Shikulu Yehova tacita kantu, kano abala asokolwele ca nkama cakwe ku babomfi bakwe bakasesema.” Twamona pano ilembo lyalanda ukuti Lesa alisokolwele ifyo afwaya ukucita ku babomfi bakwe epela, nelyo ku bantu abamutemenwe icine cine. Bushe ifi te fyo cifwile ukuba. Ni bani imwe mwebako inkama shenu? Bushe mweba uuli onse nelyo mwebako fye abanenu abo mwacetekela sana?—Amose 3:7; Esaya 40:13, 25, 26.

Caliwama ukuti Lesa apeela amano no kwishiba ku bantu abaicefya kabili abamutiina. Lelo nga tulefwaya ukuti tunonkelemo mu mano no kwishiba uko Lesa apeela tatufwile fye ukupelela pa kulamutiina. Baibolo itukonkomesha ukuba abaicefya ilyo tulesambilila Icebo ca kwa Lesa, itila: ‘Pokelela ifyebo fyandi, na mafunde yandi uyabike, peepeko kutwi kobe ku mano, no kwalwilo mutima obe ku mucetekanya; lilila ku kwiluka, sanswile shiwi lyobe ku mucetekanya, fisokote nga silfere.’—Amapinda 2:1-4.

Umuntu uwaicefya, uubika sana amano ku kucita ifili mwi lembo lili pa muulu, ukwabula no kutwishika akeshiba Lesa. Ibuuku lya Amapinda litwalilila ukusosa ukuti: “Yehova e upeela amano, mu kanwa kakwe e mufumo kwishiba no mucetekanya.” Ca cine abafwaya icine no mutima wabo onse ‘bakeluka ifyalungama ne fya bupingushi ne fyatambalala, inshila yonse iisuma.’—Amapinda 2:6-9.

Ukufwaya Ukwishiba Icine

Icitabo ca The Encyclopedia of Religion citila: “Abantu mu bumi bwabo balafwaisha ukwishiba ubupusano pa cintu icabako ne cishabako, icakwata amaka ne cishakwata amaka, ica cine ne ca bufi, icasanguluka ne cakowela, kabili balafwaya fye no kwishiba icilungeme ne cishilungeme pa fintu ifishaishibikwa bwino.” Pa mulandu wa kufwaya ukwishiba ifintu fyalekanalekana, abantu balifwayafwaya icine pa nshita ntali. Bafika fye na kukufwaya ukwishiba Yehova ou kemba wa malumbo aitile ukuti “Lesa wa cishinka” kabili bacili balesambililapo na fimbi pa cine.—Amalumbo 31:5.

 Ishina Yehova lipilibula “Uulenga Ukuba.” (Ukutendeka 2:4) Kanshi ubupilibulo bwe shina lya kwa Lesa bulosha ku fyo aba Kabumba na ku kufwaya kwakwe. E ico ukwishiba ishina lya kwa Yehova no kulibomfya e kulangisha ukuti tuli bakapepa bakwe aba cine. Yesu alishibe bwino ico cishinka, ilyo alelanda kuli Lesa pa basambi bakwe, apepele ukuti: “Nalilenga beshibe ishina lyenu kabili nkalilenga lishibikwe, pa kuti ukutemwa uko mwantemenweko kube muli bene, na ine mbe muli bene.”—Yohane 17:26.

Ilyo Yosefe umuHebere wa ku kale bamwebele ukushimbula iciloto, ashintilile pa maka ya kwa Lesa kabili alandile ukwabula ukutwishika ukutila: “Bushe te ya kwa Lesa imishimbwile?”—Ukutendeka 40:8; 41:15, 16.

Kabili pa numa ya myaka iingi, Nebukadnesari Imfumu iya ku Babiloni na o alotele iciloto ico abaume bakwe aba mano bafililwe ukushimbula. Kasesema Daniele atile ku mfumu: “Kuli Lesa mu muulu uusokolole fya nkama, kabili alenge mfumu Nebukadnesari ukwishibe cikesaba ku nshiku sha kulekelesha.”—Daniele 2:28.

Ifya kumwenako fya kwa Yosefe na Daniele fyalanga ukuti Lesa apeela amano no kwishiba ku babomfi bakwe epela. Ca cine pa kuti Lesa atupaale tufwile ukuleka ukusumina mu fyo twasuminemo kale. E fyo abaYuda aba mu mwanda wa myaka uwa kubalilapo abasangwike Abena Kristu bacitile. Apo ukutula fye na ku bwaice babasambilishe ukucindika no kulaumfwila amafunde ayapangilwe na baYuda, balingile ukwaluka pa kupokelela Yesu uwali Mesia, uwaishile mu kufikilisha Ifunde lya kwa Mose ilyali “icinshingwa ca fintu fisuma ifikesa.” (AbaHebere 10:1; Mateo 5:17; Luka 24:44, 45) “Ifunde lya kwa Kristu” e lyali ilyacindama sana ukucila Ifunde lya kwa Mose. Kabili e lyali no kupyana Ifunde lya kwa Mose.—Abena Galatia 6:2; Abena Roma 13:10; Yakobo 2:8.

Ifwe bonse ilyo twafyalwa tatwishiba Lesa. Pa mulandu wa kupyana ulubembu ku bafyashi besu aba kubalilapo, tufyalwa abalwani ba kwa Lesa, abashaba na kwishiba kwine kwine ukwa bufwayo bwakwe. Na kabili twalipyana no mutima wa kufutika. (Yeremia 17:9; Abena Efese 2:12; 4:18; Abena Kolose 1:21) Pa kuti tube ifibusa fya kwa Lesa, tufwile ukulatontonkanya nge fyo Lesa atontonkanya, lelo ukucite fyo takwayanguka.

Nalimo kuti cayafya ukuleka ukucita ifyo twasuminemo ifya mu mipepele ya bufi, sana sana nga ca kuti twafisambilile ilyo twali abaice. Lelo bushe cisuma ukutwalilila ukucita ifyalubana? Awe nakalya! Kuti cawama  ukwaluka mu fyo tumona ifyo fintu pa kuti tube ifibusa fya kwa Lesa.

Ifyo Mwingeshiba abo Lesa Alebomfya Ukusambilisha Abantu Bakwe

Bushe ni bani bengatwafwa ukumfwikisha Icebo ica kwa Lesa no kulacita ifyo cilanda? Mu Israele wa ku kale, Lesa apeele umulimo wa kutungulula ulu luko ku bantu abacetekelwa kabili aba cishinka. Pali lelo Kristu Umutwe wa Cilonganino ca Bwina Kristu, na o wine alatungulula abalefwaya icine. Alabatungulula no kulabacingilila ukubomfya abakonshi bakwe aba cishinka kabili abacetekelwa. (Mateo 24:45-47; Abena Kolose 1:18) Lelo bushe kuti mwaishiba shani abo Lesa alebomfya ukusambilisha abantu bakwe?

Abakonshi ba kwa Yesu Kristu aba cine balesha na maka ukuba ne mibele iyo Yesu akwete ilyo ali pe sonde mu buntu. Muli cino calo umo ububifi buleya bulefulilako, calyanguka ukwishiba abakonshi ba kwa Yesu pantu baba ne mibele isuma iyo Lesa afwaya. (Moneni umukululo uli pe bula 6.) Bushe abo mupepa nabo nelyo abapepa na abo mwikala nabo baliba ne yo mibele? Kuti cawama sana nga mwabomfya Baibolo pa kufwaya ukwishiba abasambi ba kwa Yesu aba cine.

Mukwai tulemukoselesha mwe babelenga uno magazini wesu ukulasambilila Baibolo. Umwaka wafumineko, abantu ukucila pali 6 milioni mu fyalo 235 e balesambilila Baibolo ne Nte sha kwa Yehova. Ukunonka amano no kwishiba Lesa takupwa, kulaleta insansa, kabili ukucite fyo kulafumamo ifisuma. Mukwai tuleti tendekeni ukusambilila Baibolo, mukeshiba ifingi nga nshi, kabili ukwabula no kutwishika kuti twaishiba Lesa!

[Akabokoshi pe bula 6]

ABACITE FINTU UKULINGANA NE FYO LESA AFWAYA . . .

tabafwile ukuba mu mapolitiki.—Esaya 2:4.

balaba ne mibele iisuma lintu bacita ukufwaya kwa kwa Lesa.—Mateo 7:13-23.

bafwile ukutemwana.—Yohane 13:35; 1 Yohane 4:20.

bafwile ukulaumfwana mu fyo balelanda konse uko bali.—Mika 2:12.

tabakonka imibele yalubana iyo abantu bekala nabo bakwata.—Yohane 17:16.

balashimikila icine no kupanga abasambi.—Mateo 24:14; 28:19, 20.

balalongana pamo pa kuti balekoseleshanya.—AbaHebere 10:25.

balikatana na bamunyinabo mwi sonde lyonse ilyo balumbanya Lesa.—Ukusokolola 7:9, 10.

[Ifikope pe bula 7]

Kuti mwaishiba Lesa ngo muntu umo umo, ngo lupwa, e lyo nge cilonganino