Ukupepa Ukwingamuletela Ubusuma

UWAIMBILE amalumbo Asafi atile, “ukupalama kuli Lesa e cawama kuli ine.” Pa nshita imo, atontonkenye ukutila kuti cawama ukupashanya abantu abashabikile amano kuli Lesa pa kuti aleikala imikalile ya kucibondola. Lelo Asafi aishiletontonkanya pa busuma bwaba mu kupalama kuli Lesa kabili amwene ukuti e cali icawama kuli ena. (Amalumbo 73:2, 3, 12, 28) Bushe ukupepa kwa cine kwaliwama kuli imwe pali lelo? Kuti kwamunonsha shani?

Ukupepa Lesa wa cine kulalenga mwalatontonkanya pa fintu ifyacindama ukucila ukulafwaya fye imikalile ya kuisekesha. Pa mulandu wa fyo twabumbwa na “Lesa wa kutemwa,” abantu ababika sana amano ku kucita fye ifyo balefwaya te kuti bakwate insansa (2 Abena Korinti 13:11) Yesu asambilishe icishinka cacindama pa fyo abantu baba ilyo atile: “Mwaba insansa ishingi mu kupeela ukucila ishaba mu kupokelela.” (Imilimo 20:35) E mulandu wine tumfwila bwino ukucitila abanensu na balupwa lwesu ifisuma. Lelo insansa shine shine shifuma mu kucite fyo Lesa afwaya. E walinga ukutemwa ukucila uuli onse. Abantu abengi sana aba nkulilo shalekanalekana, ababomba imilimo iyalekanalekana kabili abekala imikalile yalekanalekana basanga ukuti ukupepa Lesa ilyo balecita ifyo afwaya kulaleta insansa icine cine.—1 Yohane 5:3.

Ukupepa kwa Cine Kulalenga Mwaishiba ico Mwabela Pano Calo

Na kabili ukupepa kwa cine kuti kwamunonsha pantu kulalenga mwaishiba ico mwabela pano calo. Bushe mwalimona ukuti ilingi line umuntu nga ali na cimo icacindama ico alecita alaba ne nsansa? Abantu abengi balikwata ifyo bafwaya ukucita mu bumi, napamo ifikumine ulupwa lwabo, ifibusa, amakwebo, nelyo ukwangala. Ilingi line, ifi fintu tafibaletela insansa pa mulandu wa kuti ifya mankumanya filaponena abantu. (Lukala Milandu 9:11) Nomba, ukupepa kwa cine kuti kwamwafwa ukusanga icintu icacindama sana mu mikalile, icingalenga mwatwalilila ukuba ne nsansa na lintu ifintu fimbi taficitike nga fintu mwalefwaya.

Ukupepa kwa cine kusanshamo ukwishiba Yehova no kumubombela mu cishinka. Abapepa icine balapalama sana kuli Lesa. (Lukala Milandu 12:13; Yohane 4:23; Yakobo 4:8) Napamo kuti camukosela ukwelenganya ukutila kuti mwaishiba bwino sana Lesa ica kuti aba cibusa wenu. Nomba nga mwatontonkanya pa malyashi ya fyo abomba na bantu no kutontonkanya pa fyo abumba, ukwabula no kutwishika mukeshiba ifyo imibele yakwe yaba. (Abena Roma 1:20) Na kabili, nga mulebelenga Icebo ca kwa Lesa, mukeshiba ico atubumbila, ico Lesa asuminishisha ukucula, ifyo akapwisha ukucula, kabili ne cacilapo ukuwama, napamo mukeshiba ifyo na imwe mwingabombako umulimo wacindama sana uo Lesa afwaya ukubombwa. (Esaya 43:10; 1 Abena Korinti 3:9) Ukwishiba ifi fintu kuti kwamulenga mwalafwaya ukutwalilila ukuba aba mweo!

Ukupepa kwa Cine Kulalenga Mwaba Abantu Abasuma

Ukupepa kwa cine kuti kwamunonsha pantu kuti kwamwafwa ukuba abantu abasuma. Ilyo mulepepa mu cine, mukaba ne mibele iilenga muleumfwana bwino na bantu bambi. Mukasambilila kuli Lesa na ku Mwana wakwe ukuba abafumacumi, ukuba aba mutembo pa kulanda, kabili no kuba abacetekelwa. (Abena Efese 4:20–5:5) Nga mwaishiba Lesa bwino sana ica kuti mwamutemwa no kumutemwa, mukalafwaisha ukumupashanya. Baibolo itila: “Mube abapashanya Lesa, nga abana batemwikwa, kabili mule-enda mu kutemwa.”—Abena Efese 5:1, 2.

Bushe te kuti ciwame ukuba pamo na bantu ababa no kutemwa ngo kwa kwa Lesa? Icawama  ca kuti, ukupepa Lesa wa cine te mulimo uo mwingabomba mweka. Kulenga muleyampana na bantu abatemwa icalungama ne cisuma. Kwena, napamo te kuti mutemwe ukulaya ku calici ku kupepela pamo na bantu bambi. Lelo, nga fintu tumwene mu cipande cifumineko, ubwafya ubwaba mu macalici ayengi te kutila ni co yaliteyanishiwa, lelo ni co tayateyanishiwa mu musango usuma na ku bufwayo ubusuma. Imipepele iingi iyateyanishiwa yaiminina pa kucita ifintu ifishili fya buKristu. Abantu ba kwa Yehova baliteyanishiwa na Yehova umwine ku mifwaile isuma. Baibolo itila: “Lesa, ni Lesa wa muyano, te wa cimfulumfulu iyo.” (1 Abena Korinti 14:33) Nga filya fine abantu abengi basanga, na imwe mukasanga ukuti ukwampana ne bumba lya Bena Kristu abateyanishiwa bwino, kukalenga mwaba abantu abasuma.

Ukupepa kwa Cine Kulalenga Mwaba ne Subilo

Amalembo ya Mushilo yatulanga ukuti Lesa aleteyanya bakapepa ba cine ukuti bakesepusuka impela ya buno bwikashi no kupyana isonde lipya “umukekala ubulungami.” (2 Petro 3:13; Ukusokolola 7:9-17) Kanshi ukupepa ukusuma kulalenga mwaba ne subilo, kabili isubilo lyalicindama sana pa kuba ne nsansa. Bamo benekela ukuti inshita yabo iya ku ntanshi ikawama nga ca kuti imitekele yawama, amakwebo nga yaenda bwino, nelyo nga bapoka indalama ishingi ilyo bakaleka incito. Nomba finono fye pali ifi ifingalenga umo ukuba ne subilo line line ilya kuti ifintu fikawama ku ntanshi. Lelo, umutumwa Paulo alembele ukuti: “Twasubila muli Lesa wa mweo.”—1 Timote 4:10.

Nga mwabebeta bwino sana, abapepa icine kuti mwabasanga. Muli cino calo umo abantu bashaikatana, ukutemwa e lyo no kwikatana kulenga Inte sha kwa Yehova ukuba abaibela. Bafuma mu nko shonse ne fikulilo ifyalekanalekana; na lyo line, balikatana pantu balitemwana kabili balitemwa na Yehova. (Yohane 13:35) Balemulaalika ukuti mukaimwene mwe bene ifyo bena basanga. Asafi alembele ukuti: “Ukupalama kuli Lesa e cawama kuli ine.”—Amalumbo 73:28.

[Icikope pe bula 7]

Kuti mwaba cibusa wa kwa Lesa