Amepusho Ukufuma ku Babelenga

Bushe abantu bakalabembuka no kufwa pa numa ya bwesho bwa kupelako ubukabako pa mpela ya Myaka Ikana Limo?

Amalembo yabili ayaba mwi buuku lya Ukusokolola yalatwafwa ukwasuka ici cipusho. Yatila: “Imfwa ne Nshiishi fyapooselwe muli bemba wa mulilo. Iyi ni mfwa ya cibili, bemba wa mulilo.” (Ukusokolola 20:14) “Akafuuta ifilamba fyonse ku menso yabo, ne mfwa tayakabeko kabili iyo, nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.”—Ukusokolola 21:4.

Moneni ilyo ifyo aya malembo yabili yalondolola fikacitika. “Imfwa ne Nshiishi” bakafipoosa muli bemba wa mulilo pa numa ya kupingula abakapusuka pa Armagedone, abakabuuka ku bafwa, na bonse abakafyalwa pa numa ya Armagedone. Bakabapingula ukulingana ne ‘fikalembwa mu fimfungwa,’ e kuti ukulingana ne fyo Yehova akafwaya abantu ukulakonka muli ilya Myaka Ikana Limo. (Ukusokolola 20:12, 13) Umutumwa Yohane alimwene icimonwa na cimbi, icaba mu Ukusokolola icipandwa 21, icikafikilishiwa ilyo Yesu Kristu akalateka Imyaka Ikana Limo. Lelo ukufikilishiwa kwa kulekelesha kukabako pa mpela ya Bushiku bwa Bupingushi ubukalepa imyaka ikana limo. Lyena Yehova akekala pamo na bantunse ica kuti takwakabe ndubulwila pa kati kabo na Lesa, pantu Yesu akaba nabwesesha Ubufumu kuli Wishi. Mu mampalanya, Yehova akekala na “bantunse” ku ciyayaya. Ubulayo bwa kuti “imfwa tayakabeko” bukafikilishiwa ilyo abantunse bakapwililika pantu umutengo we lambo lya cilubula ilya kwa Kristu ukabomfiwa mu kukumanina.—Ukusokolola 21:3, 4.

E ico, imfwa ilandilwepo muli aya malembo ni ilya twapyana kuli Adamu, kabili ilambo lya cilubula ilya kwa Yesu likafumyapo iyi mfwa. (Abena Roma 5:12-21) Ilyo iyi mfwa ikafumishiwapo, abantunse bakaba abapwililika nga filya Adamu ali ilyo bamupangile fye. Adamu ali uwapwililika, lelo ici tacalepilibula ukuti teti afwe. Yehova aebele Adamu ukukanalya ku “muti wa kulengo kwishibo busuma no bubi” kabili atile: “Mu bushiku walyako ukufwa ukafwa.” (Ukutendeka 2:17) Iyi yali ni mfwa pa mulandu wa kubembukila Lesa ku mufulo. Pa numa ya bwesho bwa kupelako ubukabako pa mpela ya Imyaka Ikana Limo, abantunse bakalaisalila ifyo abene balefwaya ukucita nge fyo caba pali ino nshita. (Ukusokolola 20:7-10) Bakatwalilila ukulapingulapo nampo nga balefwaya ukulabombela Yehova nelyo iyo. Kanshi teti tutile takwakabe umuntu uukapondokela Lesa, nge fyo Adamu acitile.

Apo takwakabe imfwa ne Nshiishi pa numa ya bwesho bwa kupelako, cinshi cikalacitika ku bantu abakalasalapo ukupondokela Lesa? Pali ilya nshita, takwakabe imfwa nga ino yabako pa mulandu wa lubembu twapyana kuli Adamu. Kabili Inshiishi umwaba abakwata isubilo lya kubuuka, tayakabeko. Na lyo line, Yehova kuti aonaula bacipondoka no kubapoosa muli bemba wa mulilo, e kuti ukubatana ishuko lya kubuuka. Imfwa ya bacipondoka ikaba nga ilya iya kwa Adamu na Efa, imfwa ya cibili, iyapusana ne mfwa twapyana kuli Adamu.

Lelo, takwaba icilanga ukuti ica musango yo cikacitika. Abakacimfya ubwesho bwa kupelako bakapusanako na Adamu mu nshila imo iyacindama pantu bakaba nabeshiwa bwino bwino. Kanshi kuti twasubila ukuti pa bwesho bwa kupelako abantu bakaba nabeshiwa bwino bwino pantu Yehova alishiba ukuceceta abantu bwino. Kuti twasubila ukuti ubwesho bwa kupelako bukafumyapo bonse abakabomfya bubi bubi amaka aya kuisalila ico balefwaya. Kanshi nangu ca kuti abakacimfya ubwesho bwa kupelako limbi kuti bapondokela Lesa ica kuti abonaula no kubonaula, nalimo ica musango yo te kuti cicitike.

[Icikope pe bula 31]

Pa numa ya bwesho bwa kupelako, ni mu nshila nshi abantu bakaba nga filya Adamu ali?