“Tufwile Ukunakila Lesa Nga Kateeka Ukucila Ukunakila Abantu”

‘Yehova E Pusukilo Lyandi’

ABANTU ba kwa Yehova balekabila ukupingulapo ico bali no kucita. Bushe bali no kumfwila kateka wabipa uwa mu Egupti wa ku kale? Nelyo bushe bali no kumfwila Yehova Lesa pa kufuma muli cilya calo umo bali abasha, no kuya ku Calo Calaiwe?

Lesa atumine Ifinkunka 10 pa calo ca Egupti pantu Farao umumankonso alikeene ukuleka abantu ba kwa Yehova ukuya. Ukutuma Ifinkunka 10 kwalangishe amaka ya kwa Yehova! Imilungu ya bena Egupti tayacitilepo nangu cimo ku kulesha ifinkunka ukucitika.

Ilyo Farao aebelwe ukuleka abantu ba kwa Lesa ukuya, kutumfya kutumfya atile: “Nani Yehova, uo [ng’umfwe NW] ishiwi lyakwe ku kuleka Israele aye? Yehova nshimwishibe; kabili na Israele nshakamuleke aye iyo.” (Ukufuma 5:2.) Icafuminemo ca kuti: (1) amenshi yasangwike umulopa, kwali (2) ifyula, (3) bamung’wing’wi (4) balunshi, (5) icikuko pa fitekwa, (6) ifipute pa bantu ne nama, (7) inkuba ne mfula ya citalawe, (8) makanta, (9) imfifi, na (10) imfwa ya mabeli ya bena Egupti ukusanshako no mwana mwaume wa kwa Farao. Ici calengele Farao aleke abaHebere ukuya, kabili alibacincishe ukufuma mu Egupti!—Ukufuma 12:31, 32.

Abena Israele abaume, na banakashi, na bana, pamo pene na cintobentobe mukalamba abali mupepi na mamilioni yatatu, balyendeshe ukufuma mu Egupti. (Ukufuma 12:37, 38) Nangu cali fyo, mu kwangufyanya fye Farao no mulalo wakwe uwakwatishe amaka atendeke ukubakonka. Camoneke kwati abena Israele tabakwete kwakulola pantu bali mu matololo yakatama, e lyo ku ntanshi kwali Bemba wa Kashika, na ku numa kwali imilalo ya kwa Farao. Lelo, Mose aebele abantu ukuti: “Mwitiina, iminineni ndi, no kumono kupususha kwa kwa Yehova.”—Ukufuma 14:8-14.

Mu cipesha mano Yehova apaatwile amenshi ya Bemba Wakashika pa kuti abena Israele bengapita. Lelo ilyo abena Egupti basupile abena Israele muli Bemba Wakashika, Lesa abweseshe amenshi. ‘Amaceleta ya kwa Farao, no mulalo wakwe, [Yehova] afipoosele muli bemba.’ (Ukufuma 14:26-28; 15:4) Ukukanacindika Yehova kwalengele Farao wa filumba ukufwa imfwa yabipisha.

Pali Bemba Wakashika, Yehova ailangishe ukube “mpalume ku bulwi.” (Ukufuma 15:3 NW) Baibolo ilanda ukuti “abena Israele bamwene ukuboko kukalamba uko Yehova acitiileko ku bena Egupti, na bantu batiinine Yehova, kabili batetekele Yehova.” (Ukufuma 14:31; Amalumbo 136:10-15) Balitashishe Yehova ukufuma pa nshi ya mutima kabili abaume baimbile na Mose ulwimbo lwa kucimfya e lyo Miriamu nkashi yakwe atungulwile abanakashi mu kucinda. *

Yehova Acili Alepususha

Ababomfi ba kwa Yehova aba muno nshiku kuti basambililako fimo ifingakosha icitetekelo cabo ku fyo Lesa abomfeshe amaka pa kupususha abantu bakwe. Cimo ico twasambilako ca kuti Yehova alikwata amaka ayashipelela kabili kuti ayafwa abantu bakwe bwino bwino. Mu lwimbo lwa kucimfya, Mose na bena Israele baimbile no kwanga ukuti: “Ukwa kulyo kwenu, mwe Yehova, kukankaala ku maka, ukwa kulyo kwenu, mwe Yehova, kufwantaula abalwani.”—Ukufuma 15:6.

Cimbi ico twasambililako ca kuti Uwa maka yonse alafwaisha ukucingilila abantu bakwe. Abena Israele baimbile abati: “Ukukosa kwandi kabili ukulumba kwandi ni Yehova, kabili aisabe  pusukilo lyandi; uyu ni Lesa wandi, ndemutootela.” Na kabili isambililo limbi lya kuti takwaba nangu umo uwingakanya ifyo Yehova Lesa alefwaya. Mu lwimbo lwa kucimfya, abantu ba kwa Yehova abo apuswishe baimbile abati: “Pa milungu pali uyani uwaba nga imwe, mwe Yehova? Nani uwaba nga imwe, umukankaala ku mushilo, uwa kutiinwa ku milimo ya lulumbi, uucite fipesha amano.”—Ukufuma 15:2, 11.

Nga fintu Farao wa ku Egupti wa ku kale acitile, bakateka ba lelo balapakasa abantu ba kwa Yehova. Bakateka ba filumba kuti ‘basose fyebo fya misuula pa Wapulamo, no kupomponta abashila ba Wapulamo.’ (Daniele 7:25; 11:36) Lelo Yehova alaya abantu bakwe ukuti: “Icilwilo conse icafulilwa iwe tacakashuke; no lulimi lonse ulwaimina iwe mu kupingula ukalufulunganya. Ici e cikwatwa ca babomfi ba kwa Yehova.”—Esaya 54:17.

Abalwisha Lesa tabakatunguluke, nga fintu fye Farao ne milalo yakwe bashatungulwike. Ifyo Yehova apokolola abantu bakwe, pamo nga filya acitile pa kufuma mu Egupti, filangilila ukuti cisuma ukukonka icipope ico abakonshi ba kwa Yesu balandile icitila: “Tufwile ukunakila Lesa nga kateeka ukucila ukunakila abantu.”—Imilimo 5:29.

[Amafutunoti]

[Akabokoshi ne Cikope pe bula 9]

BUSHE MWALISHIBE?

● Yehova alengele umwela wakosa ukupuupa ubushiku bonse pa kuti Abena Israele bengabuuka Bemba Wakashika pa mushili uwauma.—Ukufuma 14:21, 22.

● Pa kuti Abena Israele abali impendwa iikalamba bengapita pali Bemba Wakashika pali kalya kene akashita akanono balekabila apa kupita apa kulile amakilomita 1.5 mu bufumo nelyo fye ukucilapo.

[Ifikope pe bula 9]

Imilungu ya bena Egupti iya bufi yalifililwe ukulesha Ifinkunka 10 ifyafumine kuli Yehova

[Abatusuminishe]

All three figurines: Photograph taken by courtesy of the British Museum