“Nasangile Bucibusa, Ukutemwa, no Kusakamana”

“MULI ici e mo bonse bakeshibilo kuti muli basambi bandi, nga mwaba no kutemwana.” (Yohane 13:35) Umwabela aya mashiwi ya kwa Yesu, ukutemwa kwaishileba ica kwishibikilwako ica ba bwananyina ba kubalilapo aba Bwina Kristu. Ilyo Tertullian alembele ifyalelanda abaishibe Abena Kristu ilyo palipita ne myaka 100 no kucilapo apo Yesu afwilile, asosele ukuti baleti: ‘Moneni ifyo batemwana ne fyo baiteyanya ukufwila umo no munankwe.’

Bushe ukutemwa kwa musango yo kuti kwasangwa na nomba mu calo? Ee. Ku ca kumwenako, tontonkanyeni pali kalata yapokelelwe kwi ofeshi linono ilya Nte sha kwa Yehova mu Brazil. Umwanakashi walembele kalata, ishina lyakwe Marília, atile:

“Ilyo naleikala mu Villa Mercedes, ku Argentina, bamayo, Inte ya kwa Yehova, baishilelwala osteoarthritis, iyabalengele ukuba no bulebe ukufuma mu musana ukufika ku makasa. Imyeshi 8 iya kubalilapo mu kulwala kwabo, baNte mu Villa Mercedes e balebasakamana mu citemwishi. Balecita fyonse, ukuwamya mu ng’anda no kubepikila ifya kulya. Na pa nshita bali mu cipatala, paleba umuntu wa kubalinda lyonse, akasuba no bushiku.

“Ine na Bamayo ino nshita twalibwelela ku Brazil, uko bacili baleundapwa ubulwele bwabo na lelo. BaNte abo twikala na bo muli iyi ncende pali lelo baleesha apapela amaka yabo ukwafwilisha Bamayo ukupola.”

Pa mpela ya uyu kalata, Marília atila: “Mukwai ine te kuti mbepe ubufi, nshili Nte, lelo naishilesanga bucibusa, ukutemwa, no kusakamana mu kati ka Nte.”

Cine cine, kucili abantu ne lelo line ababomba ifintu mu kutemwa kwa Bwina Kristu ukwa cine cine. Pa kucite ci, balanga ifyo ifyasambilishe Yesu fyakwata amaka ya kukuma ubumi bwesu.