Bushe Muleibukisha?

Bushe mwali-ipakisha ukubelenga bamagazini bafumine nomba line aba Ulupungu lwa kwa Kalinda? Cisuma moneni nga kuti mwa-asuka amepusho yakonkapo:

• Ni nshila nshi shimo isho Ruti ali ica kumwenako cawama?

Aali ca kumwenako mu kutemwa Yehova, mu kutemwa kwa cishinka kuli Naomi, na mu kubombesha kwakwe kabili uwaicefya. E mulandu wine kanshi abantu balemwitila ati “mwanakashi wa cishinka.” (Ruti 3:11)—4/15, amabula 23-6.

• Twaishiba shani ukuti Yehova alasakamana abantu yaweyawe?

Aebele abena Israele abasungilwe mu bukatu mu Egupti, ukukanasunga abapiina buluku buluku. (Ukufuma 22:21-24) Yesu, uwalepashanya Wishi, alitemenwe abantu yaweyawe, kabili asalile abatumwa pa baume abali “abashasambilila kabili abantu yaweyawe.” (Imilimo 4:13; Mateo 9:36) Kuti twapashanya Lesa nga tuleangwa abantu bambi, pamo nga bacaice.—4/15, amabula 28-31.

• Mulandu nshi twingasuminina ukuti Yehova alamona ifyo tucita?

Baibolo ilangilila ukuti Yehova alamona ifyo abantu bacita. Alimwene lambo lyapeele Abele, kabili alamona ‘amalambo yesu aya kulumbanya, icisabo ca milomo.’ (AbaHebere 13:15) Yehova alishibe ukuti Enoke alipilikite pa kuti amusekeshe ukupitila mu kwikala ubumi bwasanguluka kabili ubwatambalala. Kabili Lesa alimwene mukamfwilwa uushali umwina Israele uwa ku Sarefati uwalepeelako Eliya utwa kulya akwete. Yehova alamona ne milimo ya citetekelo iyo tubomba.—5/1, amabula 28-31.

• Mulandu nshi twingalandila ukuti pa numa ya Pentekoste 33 C.E., abaYuda baleba Abena Kristu balekabila ukuipeela abene kuli Lesa?

Mu 1513 B.C.E., abena Israele ba ku kale baishileba bacibusa baipeela aba kwa Yehova. (Ukufuma 19:3-8) Ukufuma lilya, abaYuda balefyalilwa muli lulya luko lwaipeela mu cipingo ce Funde. Lelo Yehova afumishepo icipingo ce Funde ukupitila mu mfwa ya kwa Kristu mu 33 C.E. (Abena Kolose 2:14) Pa numa, abaYuda abalefwaya ukubombela Lesa mu nshila yapokelelwa balekabila ukuipeela kuli wene no kubatishiwa mwi shina lya kwa Yesu Kristu.—5/15, amabula 30-1.

• Bushe ukooca icushi ce fungo kwaba lubali lwa kupepa kwa cine lelo?

Ukubomfya icushi ce fungo kwali lubali lwa kupepa kwa cine mu Israele wa pa kale. (Ukufuma 30:37, 38; Ubwina Lebi 16:12, 13) Lelo icipingo ce Funde, pamo no kooca ice fungo, fyapwile ilyo Kristu afwile. Abena Kristu kuti basalapo abene nga balefwaya ukubomfya icushi ce fungo mu fishili fya mapepo, lelo tafyaba lubali lwa kupepa kwa cine pali lelo. Tufwile ukulangulukilako bambi pa kuti tatubapunwishe.—6/1, amabula 28-30.

• Lyashi nshi ilya nomba line ilyalengele abengi ukutontonkanyapo sana pali bucine bwa kubako kwa kwa Yesu pe sonde?

Paba ifingi ifyalandwa pa kabokoshi kashulilwe mu Israele. Cimoneka kwati e ko kali mu nshita ya kubangilila iya buKristu kabili paba ne fyalembwapo ifitila: “Yakobo, mwana Yosefe, munyina kwa Yesu.” Bamo balemona ici ukuba “ubushininkisho bwa kale sana ubwa kuti Yesu e ko ali ubushili bwa mu Baibolo lelo ubwafuma ku fyashulwa” pa kubapo kwa kwa Yesu.—6/15, amabula 3-4.

• Bushe umuntu asambilila shani ukutemwa?

Uko abantunse babalilapo ukusambilila ukutemwa ni ku cilangililo ca bafyashi babo no kukansha babakansha. Nga ca kuti umukashi no mulume batemwana no kucindikana, na bana bene kuti basambilila ukutemwa. (Abena Efese 5:28; Tito 2:4) Nangu line umuntu tafuma mu ng’anda umwaba ukutemwana, kuti asambilila ukutemwa nga apokelela ubutungulushi bwa kwa Shifwe Yehova, ukupitila mu kwafwiwa no mupashi wa mushilo, no kunonkelamo ukufuma mu kutungililwa kwa bumunyina bwa Bwina Kristu.—7/1, amabula 4-7.

• Bushe Eusebius aali nani, kabili finshi twingasambilila ku bumi bwakwe?

Eusebius aali muntu walelemba ilyashi, uwapwishishe ukulemba ifitabo 10 ifyaleti History of the Christian Church mu 324 C.E. Nangula asumine ukuti Tata aliko ilyo Umwana talabako, Eusebius apokelele imimwene imbi pa cilye cali mu Nicaea. Cimoneka kwati asuulileko fye ku fifwaikwa ku bakonshi ba kwa Yesu ifya ‘kukanaba aba pano calo.’ (Yohane 17:16)—7/15, amabula 29-31.

• Bushe Yehova alyalula ifipimo fyakwe pa kuupa impali?

Iyo, Yehova taaluka mu fyo amona ukuupa impali. (Malaki 3:6) Ukuteyanya kwa kwa Lesa ku muntu wa kubalilapo kwali ‘kulambatila ku mukashi wakwe’ no kuba umubili umo nankwe. (Ukutendeka 2:24) Yesu atile nga kwaba ukulekana apabula ubucende no kuupa umbi ninshi uwacite co acito bucende. (Mateo 19:4-6, 9) Ukusuminisha kwa kwa Yehova ukwa kuupe mpali kwapwile ilyo icilonganino ca Bwina Kristu capangilwe.—8/1, ibula 28.