Umulalilo wa kwa Shikulu Walimukuma Icine Cine

BUSHE Umulalilo wa kwa Shikulu walikwata ubupilibulo bubelelela kuli imwe? Pa kuti twishibe, natutale tumone ifyo Yesu Kristu umwine alandile pa bupilibulo bwa ici cintu caibela.

Pa cungulo bushiku ca Nisani 14, 33 C.E., Yesu alongene na batumwa bakwe 12 mu muputule wa pa muulu mu Yerusalemu ku kusefya Ica Kucilila ca pa mwaka. Pa numa ya kupwisha ukulya Ica Kucilila, Yuda shikamfutu afumine mu muputule no kuyashitisha Yesu. (Yohane 13:21, 26-30) Yesu atendeke “umulaalilo wa kwa Shikulu,” na batumwa 11 abashelepo. (1 Abena Korinti 11:20) Kabili bawita ati Icibukisho, pantu Yesu aebele abakonshi bakwe ati: “Mulecite ci ku kunjibukisha.” Ici e cintu fye ceka Abena Kristu baebwa ukwibukisha.—1 Abena Korinti 11:24.

Mu fifulo ifingi, abantu balakuulako fimo ifya kwibukishishako nelyo ukukwatako ubushiku bumo ubwaibela ubwa kwibukishishapo, umuntu nelyo ifyacitike ifikulu. Yesu wena atampile umulalilo wa cibukisho—umulalilo uwali no kubomba nge ca kwibukishishako, ukwaafwa abasambi ukulaibukisha ifyacitike ifyabakumine icine cine pali bulya bushiku bwatenseshe icalo. Ku nkulo shaleisa, uyu mulalilo wali no kucinkulako abalemonako ulwa bupilibulo bwa maka ubwa fyo Yesu acitile bulya bushiku, no kucilisha ifimpashanya abomfeshe. Fimpashanya nshi Yesu abomfeshe, kabili cinshi fipilibula? Natubebete ico Baibolo yalanda pa lwa cacitike pali bulya bushiku mu 33 C.E.

Ifimpashanya Fyashila

“Abuulile umukate, atootela, aumokaula, no kubapeela, ati: ‘Uyu [uleimininako] mubili wandi uulepeelwa pa mulandu wenu. Mulecite ici ku kunjibukisha.’”—Luka 22:19.

Ilyo Yesu abuulile umukate no kusosa ati, “uyu uleimininako umubili wandi,” aloseshe mu kuti umukate ushatutumuka wali cimpashanya ca mubili wakwe uushali na lubembu, uo apeele “pa mulandu wa bumi bwa ba pano calo.” (Yohane 6:51) Nelyo ca kuti amabupilibulo ya Baibolo yamo yatila “uyu [mu ciGriki, es·tinʹ] mubili wandi,” Thayer’s Greek-English Lexicon of the New Testament itila ili shiwi ilingi line lipilibula “ukwimininako, ukupilibula.” Cilenga uulebelenga ukutontonkanya pa kwimininako, nelyo icipashanishiwe.—Mateo 26:26.

Cimo cine na ku lukombo. Yesu atile: “Ulu  lukombo [lulepilibule] cipingo cipya ica pa mulopa wandi, uuleitililwa pa mulandu wenu.”—Luka 22:20.

Mu fyalembele Mateo, Yesu alandile pa lukombo ati: “Lwene lulepilibulo ‘mulopa wandi uwa cipingo,’ uulesuumina pa mulandu wa bengi ku kulekelelwa imembu.” (Mateo 26:28) Yesu abomfeshe umwangashi mu lukombo nge ca kwimininako, nelyo icimpashanya, ca mulopa wakwe. Umulopa wakwe uwasuumiwa waali no kuba e citendekelo ca “cipingo cipya” ica basambi basubwa no mupashi, abaali no kuteka pamo nankwe nge shamfumu kabili bashimapepo mu muulu.—Yeremia 31:31-33; Yohane 14:2, 3; 2 Abena Korinti 5:5; Ukusokolola 1:5, 6; 5:9, 10; 20:4, 6.

Umwangashi wali mu lukombo kabili wabombele nge ca kucinkulako ca kuti umulopa wasuumiwa uwa kwa Yesu e waali no kuba cishinte ca “kulekelelwa imembu,” ne ci caali no kulenga abalelya no kunwako ukwitwa ku bumi bwa ku muulu nge mpyani shinankwe isha kwa Kristu. Cili icalinga kanshi ukuti, abo baitwa ku muulu—aba kupenda fye—e bengalyako fye beka umukate no kunwako umwangashi pa Cibukisho.—Luka 12:32; Abena Efese 1:13, 14; AbaHebere 9:22; 1 Petro 1:3, 4.

Lelo, ni shani pa lwa bakonshi ba kwa Yesu abashaba mu cipingo cipya? Aba ni “mpaanga shimbi” isha kwa Shikulu, abafuluka ukwisaipakisha ubumi bwa ciyayaya mu paradise wa pe sonde, te kuteeka na Kristu mu muulu iyo. (Yohane 10:16; Luka 23:43; Ukusokolola 21:3, 4) Nge “bumba likalamba” ilya Bena Kristu ba busumino “[abalebombela Lesa] umulimo washila akasuba no bushiku,” balatemwa ishuko bakwata lya kuba aba kutambako pa Mulalilo wa kwa Shikulu. Ifyebo ne ncitilo shabo kuti twatila fitila: “Ipusukilo lyesu lyafuma kuli Lesa wesu, uwaikala pa cipuna ca bufumu, na ku Mwana wa mpaanga.”—Ukusokolola 7:9, 10, 14, 15.

Bushe Kusefya Imiku Inga?

“Mulecite ici ku kunjibukisha.”—Luka 22:19.

Bushe miku inga Icibukisho cifwile ukubako pa kuti twibukishe imfwa ya kwa Kristu? Yesu talandile mu kulungatika. Nangu cibe fyo, apantu atendeke Umulalilo wa kwa Shikulu pa Nisani 14, icungulo cimo cine ilyo kwali Ica Kucilila, ico abena Israele balesefya pa mwaka, cilemoneka ukuti Yesu alefwaya Icibukisho na co ukulacitwa pa mwaka. Ilintu abena Israele balesefya ukulubuka kwabo ku busha bwa mu Egupti cila mwaka, Abena Kristu bena bebukisha ukulubuka kwabo ku lubembu ne mfwa cila mwaka.—Ukufuma 12:11, 17; Abena Roma 5:20, 21.

Ukusefya ici ca kucitika cacindama cila mwaka te ceni iyo. Ku ca kumwenako, tontonkanyeni pa lyo abaupana basefya ubushiku baupene nelyo ilyo icalo cibukisha ifintu fyacindama mu fyacitika mu calo cabo. Ukusefya kwa kwibukisha kucitika umuku fye umo cila mwaka pa bushiku bulya bwine ico cintu cacitike. Icaisawama ca kuti, myaka iingi pa numa ya mfwa ya kwa Kristu, abengi abaletila Bena Kristu baleitwa ati ba Quartodeciman, icalola mu kuti “Aba Bushiku Bwalenga 14” pantu baleibukisha imfwa yakwa Yesu umuku umo cila mwaka, pa Nisani 14.

Uwa-anguka Lelo Uwaisulamo Ubupilibulo

Umutumwa Paulo alondolwele ukuti ukusefya Umulalilo wa kwa Shikulu kwali no kulenga  abasambi “ukubile mfwa ya kwa Shikulu.” (1 Abena Korinti 11:26) E ico, uku kusefya kwali no kutontomesha pa lubali lwacindamisha ulo Yesu abombele pa mfwa yakwe ku kufishapo ubufwayo bwa kwa Lesa.

Pa kuba uwa busumino ukufika na ku mfwa yakwe, Yesu Kristu alangile apabuuta kuti Yehova Lesa wa mano kabili ni Kabumba wa citemwishi na Mulopwe umulungami. Ukupusana no kutunga kwa kwa Satana e lyo ne fyacitile Adamu, Yesu ashinine ukuti abantu kuti batwalilila aba busumino kuli Lesa, nelyo pali ne cilebatitikisha.—Yobo 2:4, 5.

Umulalilo wa kwa Shikulu na kabili ulatwafwa ukwibukisha mu kutasha ukutemwa kwa kuipeelesha ukwa kwa Yesu. Te mulandu na mesho yatapata, Yesu atwalilile uwa cumfwila umupwilapo kuli Wishi. Ici e calengele ukuti alinge ukupeela ubumi bwakwe ubwapwililika ku kufiimba pa lubembu lwakulishe ulwa kwa Adamu. Nge fyo Yesu umwine alondolwele, aishile ku “kupeelo mweo wakwe icilubula ku kukabulamo abengi.” (Mateo 20:28) Icafumamo ca kuti, bonse abatetekela Yesu kuti balekelelwa imembu shabo no kupokelela ubumi bwa muyayaya nge fyali ubufwayo bwa kwa Yehova ku bantunse pa kabala ntanshi.—Abena Roma 5:6, 8, 12, 18, 19; 6:23; 1 Timote 2:5, 6. *

Ifi fyonse na kabili filekosha icishinka ca kupaka kwa busuma bwa kwa Yehova ne cikuuku cakwe ica bupe fye ica kupayanishisha abantunse ipusukilo. Baibolo itila: “Kuli ici e ko ukutemwa kwa kwa Lesa kwamonekele muli ifwe, pantu Lesa atumine Umwana wakwe uwafyalwa eka ukwisa pano calo ukuti tube no bumi muli wene. Uku e kutemwa, te mu kuti ni fwe twatemenwe Lesa, lelo ni mu kuti wene e watutemenwe no kutuma Umwana wakwe ku kuba ilambo lya kukonsolwela imembu shesu.”—1 Yohane 4:9, 10.

Ala ukusefya Icibukisho kulasungusha cine cine! Kwaba fye ukwa-anguka ica kuti kuti kwacitwa ukuli konse fye mu calo te mulandu no kupusana kwa mibele, lelo ico kwimininako citwalilila ukuba ica kutucinkulako cabamo ubupilibulo pa nshita yalepa.

Ifyo Wamukuma

Imfwa ya bulilambo iya kwa Shikulwifwe Yesu Kristu yapuswile bonse babili wene na Wishi,  Yehova apakalamba. Apo Yesu aali uwapwililika, taali na kufwa imfwa yapyanwa iyo bonse tufwako. (Abena Roma 5:12; AbaHebere 7:26) Afwaya, nga aikalilile fye pe na pe. Takwali nangu umo uwali no kupoka umweo wakwe nangu fye ni ku maka ukwabula umwine ukusuminisha ici. Atile: “Takuli uwaupoka kuli ine, lelo ndeutuula ne mwine.”—Yohane 10:18.

Na lyo line, Yesu mu kuitemenwa atuulile umweo wakwe uwapwililika nge lambo pa “kuti mu mfwa yakwe onaule uukwete amaka ya kulenga imfwa, e kutila, Kaseebanya; no kuti alubule bonse abateekelwe mu busha ubumi bwabo bonse pa mulandu wa kutiine mfwa.” (AbaHebere 2:14, 15) Ukutemwa kwa kwa Kristu ukwa kuipeelesha na kabili kwamonekele mu musango wa mfwa aitemenwe ukufwa. Alishibe bwino nga nshi umusango aali no kuculilamo no kufwa.—Mateo 17:22; 20:17-19.

Icibukisho cilatucinkulako na pa kutemwa kwapulishamo ukwabala akulangishiwa na Shifwe uwa mu muulu, Yehova. Apo “wa citemwishi nga nshi kabili wa luse,” Yehova alilungulwike cibi, pa kuumfwa no kumona ifyo Yesu “apaapeete no kulomba pamo no kukuuta kukalamba ne filamba” mwi bala lya Getsemane, ilyo balemufopaula bubi bubi, ukumupopela bunkalwe bunkalwe, ne mfwa ya kufwa panono panono, iya kulenga ukushikitika. (Yakobo 5:11; AbaHebere 5:7; Yohane 3:16; 1 Yohane 4:7, 8) Ukutontonkanyapo fye na lelo line, pa numa ya myaka iingi, cilakalifya imitima ya bengi.

Tala elenganyeni pa kuipeelesha kwapulamo ukwa kwa Yehova Lesa na Yesu Kristu pa mulandu wa ifwe fwe babembu! (Abena Roma 3:23) Cila bushiku, tulacululuka pa kuba ababembu na pa kukanapwililika. Lelo, nga twatetekela ilambo lya cilubula ilya kwa Yesu, kuti twapaapaatila Lesa ukutulekelela imembu shesu. (1 Yohane 2:1, 2) Ici citulenga ukukanaba na mwenso pa kulanda na Lesa no kuba na kampingu uwasanguluka. (AbaHebere 4:14-16; 9:13, 14) Icacila na po, kuti twasubila ukwikala mu paradise wa pe sonde pe na pe. (Yohane 17:3; Ukusokolola 21:3, 4) Ifi twalandapo na mapaalo yambi ayengi yaisabako pa mulandu wa kuipeelesha kwakulisha ukwa kwa Yesu.

Ifyo Twingatasha pa Mulalilo wa kwa Shikulu

Umulalilo wa kwa Shikulu ukwabula no kutwishika waba cilangililo ca “cikuuku ca bupe fye ica kwa Lesa icacilamo pali imwe.” Kabili ukupayanya kwa kwa Yehova Lesa ukwe lambo lya cilubula—ukwacitike pa mulandu wa kutemwa kwa kuipeelesha ukwa kwa Yesu–cine cine “ca bupe cakwe icishingalondololwa.” (2 Abena Korinti 9:14, 15) Bushe ubu busuma Lesa atucitila ukupitila muli Yesu Kristu tabumulenga ukufwaisha ukumutasha nga nshi?

Tulesubila ukuti e fyo bumulenga ukuyumfwa. E ico, tulemulaalika ukwisabungana pamo ne Nte sha kwa Yehova pa kusefya Icibukisho ca mfwa ya kwa Yesu. Uno mwaka Icibukisho cikabako pali Citatu, pa April 16, pa numa ya kuwa kwa kasuba. Inte sha kwa Yehova ishaba ku cifulo mwikalila bakaba aba nsansa ukumwishibisha inshita ne cifulo ukukabela ici ca kucitika cacindamisha.

[Futunoti]

[Akabokoshi ne Fikope pe bula 6]

“UYU MUBILI WANDI” NELYO “UYU ULEIMININAKO UMUBILI WANDI” NI CILI KWI ICILUNGEME?

Ilyo Yesu atile, “nine mwinshi” no kuti, “nine mwangashi wine wine,” takwali uwatontonkenye ukuti e waali iciibi ca cine cine nelyo umwangashi wa cine cine. (Yohane 10:7; 15:1) E cimo cine na lintu Baibolo wa Cibemba uwa mu 1956 ayambula Yesu ngo ulelanda ati: “Ulukombo ulu e cipingo cipya,” tatutontonkanya ukuti lulya lukombo lwine lwali e cipingo cipya. E cimo na pa, ilyo atile umukate ‘wali’ mubili wakwe, te ca kutwishika no kutwishika ukuti umukate walepilibula, nelyo waiminineko, umubili wakwe. E co Baibolo yapilibulwa na Charles B. Williams ilandila ati: “Uyu uleimininako umubili wandi.”—Luka 22:19, 20.

[Icikope pe bula 5]

Umukate ushatutumuka no mwangashi fimpashanya fyalinga ifya mubili wapwililika uwa kwa Yesu no mulopa wakwe uwasuumine

[Icikope pe bula 7]

Icibukisho citucinkulako pa kutemwa kwapulamo uko Yehova Lesa na Yesu Kristu balangile