Ifipusho Ukufuma ku Babelenga

Cinshi Baibolo isosela ukuti umuntu afwile ukukuuta nga bamupatikisha ukulaala nankwe?

Abashacendwapo cine cine te kuti bomfwikishe ifyo ubumi bwa muntu bwingafulunganishiwa. Ici cintu cilatiinya sana abacendwa ica kuti kuti cababombomanika ubumi bwabo bonse. * Umukashana Umwina Kristu uwasanshilwe kuli mwikata kama imyaka iingi iyapitapo alondolola ati: “Teti nande umwenso wabipisha nakwete bulya bushiku nelyo ukubombomana nali no kucimfya ukutule lyo.” Kanshi e mulandu abengi bashatemenwa no kutontonkanya pali ili lyashi lya kutiinya. Lelo, icintiinya ca kucendwa ca cine cine muli cino calo cibifi.

Baibolo taipita na mu mbali ukulanda pa milandu iya kulaala no muntu ku maka ne ya abo baeseshe fye ukucite fyo. (Ukutendeka 19:4-11; 34:1-7; 2 Samwele 13:1-14) Lelo ilapeela no kufunda pa fyo umuntu afwile ukucita ilyo alepana ukucendwa. Ico Ifunde lyalanda pali uyu mulandu cisangwa pa Amalango 22:23-27. Ili funde lilanda pa fintu fibili. Ica kubalilapo, umwaume asangile umukashana mu musumba no kulaala nankwe. Na lyo line, umwanakashi takuutile mutuule. E ico, balepingulwa ukuti alibembwike “pa mulandu wa kuti takuutile pa kuba mu mushi.” Nga alikuutile, abantu abaali mupepi pambi nga bali na maka ya kumutuula. Ica cibili, umwaume asangile umukashana mu mpanga, mulya mwine ‘alimunashishe  no kulaala nankwe.’ Pa kuipokololako, umwanakashi “alikuutile, lelo takwali uwa kumutuula.” Ukupusanako no mwanakashi mu mulandu wa kubalilapo, uyu mwanakashi ukwabula ukutwishika tasumine ukumulaala ku maka. Alitukwite ukukaana, ukupunda mutuule, lelo balimucimfishe. Ukukuuta kwakwe kwalangilile ukuti taitemenwe ukucendwa; tali no kupeelwa umulandu wa lubembu.

Nangu ca kuti Abena Kristu lelo tabakonka Amafunde ya kwa Mose, ifishinte fyalumbulwamo filabatungulula. Ubulondoloshi buli pa muulu bwakomaila pa bucindami bwa kukaana no kukuuta mutuule. Ukukuuta ilyo bamupatikisha ukulaala na imwe kucili kumonwa nge nshila isuma. Incenshi imo iicincintila imisoka yatile: “Umwanakashi nga asanswa, icibombelo cakwe icishaiwamina ica kulwishishako umulwani cicili lishiwi lyakwe.” Ukukuuta kwa mwanakashi nalimo kuti kwalenga bambi ukubutukilako, abengamupokolola, nelyo kuti pambi kwatiinya uumusanshile no kulenga abutuka. Umukashana Umwina Kristu uwasanshilwe kuli mwikata kama atile: “Nalikuutile na maka yandi yonse, kabili alindekele. Ilyo ampaleme na kabili, nalikuutile no kubutuka. Kale naletontonkanya libili libili nati, ‘Bushe ukukuuta kuti kwanjafwa shani ilyo umwaume umukulu anjikata uwiminine fye pa kundaala?’ Lelo nalisambilila ukuti kulafwa!”

Nangula ifintu fyabipa ica kuti umwanakashi acimfiwa kabili acendwa, ukutukuta kwakwe ukukaana no kukuuta mutuule tafiya mu menshi. Lelo, cilangilila ukuti alitukwite apo engapesha ukukaanya uwamusanshile. (Amalango 22:26) Te mulandu no kuponenwa no bu bwafya, kuti atwalilila ukuba na kampingu wasanguluka, uwacindikwa lyonse, no kushininwa ukuti ali uwasanguluka mu menso ya kwa Lesa. Ici cintu ca kulengo mwenso nalimo kuti camulenga ukupelenganishiwa, lelo ukwishiba ukuti alibombeshe apo e ngapesha ukukaanya uwa musanshile kukamwafwa sana ukupuupuutuka panono panono.

Mu kuumfwikisha Amalango 22:23-27 ifyo yabomba, tufwile ukwishiba ukuti ubu bulondoloshi ubwipi tabulanda pa mibele yonse iingacitika. Ku ca kumwenako, tabulanda pa mibele iya kuti umwanakashi uusanshilwe teti akuute pantu ni cibulu, nafwe cipupu, nelyo amaka nayapwa ku mwenso nelyo ku maka bamulesha ukukuuta pa kumubika ukuboko pa kanwa nelyo ukumukakapo. Lelo, apo Yehova alalingulula imilandu yonse, pamo na matontonkanyo, abomba no mucetekanya no bulungi mu milandu ya musango yo, pantu “imibele yakwe yonse bupingushi.” (Amalango 32:4) Aleshiba fyonse ifyacitike ne fyo abapatikishiwe ukubalaala balwishishe ukukaanya uwabasanshile. E ico, abo baleele ku maka abashali na maka ya kukuuta lelo kwena ababombeshe ukufika apo bengapesha muli iyi mibele kuti balekela imilandu mu maboko ya kwa Yehova.—Amalumbo 55:22; 1 Petro 5:7.

Nangu cibe fyo, abanakashi bamo Abena Kristu abasanshilwe no kucendwa balashikitika lyonse kwati ba mulandu. Ilyo baibukisha, bayumfwa ukuti kanshi nga balicitile na fimbi ku kucincintila icacitike. Lelo, ukucila ukuipeela umulandu, abapatikishiwe ukubalaala kuti bapepa kuli Yehova, ukumulomba ukubafwa, kabili ukucetekela uluse lwakwe ulwafulisha.—Ukufuma 34:6; Amalumbo 86:5.

E ico, abanakashi Abena Kristu abo pali nomba balecushiwa no kupelenganishiwa kwafumine mu kusansa kwa kwa mwikata kama kuti bacetekela ukuti Yehova alomfwikisha sana ukushikitika balepitamo. Icebo ca kwa Lesa cabalaya aciti: “Yehova aba mupepi na ku baputuke misana, kabili abafunshike mitima alabapususha.” (Amalumbo 34:18) Ukwishiba ukuti abasumina banabo mu cilonganino ca Bwina Kristu balabomfwikisha sana kabili balabatungilila mu cikuuku na ko kuti kwabafwa ukucimfya ukushikitika kwabo. (Yobo 29:12; 1 Abena Tesalonika 5:14) Kabinge, ukubombesha kwabo kwine ukwa bacendelwe ukwa kutontonkanya fye pa fisuma kukabafwa ukuba no “mutende wa kwa Lesa uwacila amatontonkanyo yonse.”—Abena Filipi 4:6-9.

[Futunoti]