Ifipusho Ukufuma ku Babelenga

Bushe ukulingana na Malembo calilinga Umwina Kristu ukwikata Baibolo no kulapa ukuti alesose cine mu cilye?

Umuntu umo umo afwile ukuipingwila pali ci. (Abena Galatia 6:5) Lelo, Baibolo tayakanya ukulapa umulapo wa kusose cine mu cilye.

Ukulapa umulapo ukufuma fye na ku kale kwaliseeka. Ku ca kumwenako, ku kale abaGriki baleimya ukuboko mu muulu nelyo ukwikata ku cipailo ilyo balelapa umulapo. icitabo ca Cyclopedia of Biblical, Theological, and Ecclesiastical Literature, ica kwa John McClintock na James Strong, Volume VII, ibula 260 cisosa ati: Ilyo umwina Roma alelapa imilapo, aleikata ilibwe mu minwe yakwe no kulapa ati: “Nga nabepa ku mumbo, ilyo alelinda umusumba ne linga, shi [lesa] Jupiter afumye pali ine ubusuma bonse, ifyo nalacita ili libwe.”

Ukucita ifya musango yo kwalelangilila ukulemenena kwa bantu ukwa kwishiba ukuti kwaba lesa waba na maka ya kumona abantunse kabili uo balubululako. Ukutula fye ku kale, bakapepa ba cine aba kwa Yehova balishibe ukuti alishibe ifyo basosele no kucita. (Amapinda 5:21; 15:3) Balelapa imilapo kwati bali pa cinso ca kwa Lesa, nelyo wena ukuba nga kambone. Ku ca kumwenako, ici e cacitile Boasi, Davidi, Solomone, na Sidekia. (Ruti 3:13; 2 Samwele 3:35; 1 Ishamfumu 2:23, 24; Yeremia 38:16) Bakapepa ba kwa Lesa wa cine na kabili balesumisha bambi abalelenga balape milapo. E fyo cali kuli Abrahamu na Yesu Kristu.—Ukutendeka 21:22-24; Mateo 26:63, 64.

Umuntu uwalelapa kuli Yehova inshita shimo alecita icishibilo. Abramu (Abrahamu) aebele imfumu ya Sodomu ati: “Ndetumpwilo kuboko kwandi kuli Yehova Lesa Uwapulamo, Kelenganya wa muulu na pano isonde.” (Ukutendeka 14:22) Malaika walelanda kuli kasesema Daniele “[aletumpwila] ukwa kulyo no kwa kuso ku muulu no kulapa Uwa mweo wa muyayaya.” (Daniele 12:7) Lesa na o mu mampalanya casoswo kuti alemya ukuboko kwakwe pa kulapa.—Amalango 32:40; Esaya 62:8.

Amalembo tayalesha ukulapa. Lelo, Umwina Kristu tafwile ukulapa pa kuti akoshe conse ico alelanda. Yesu asosele ati: “Lekeni fye icebo cenu Ee cibe Ee, na Iyo cibe Iyo.” (Mateo 5:33-37) Umusambi Yakobo alandile cimo cine. Ilyo asosele ati “mwilapa,” alesoka pa lwa kukanalapa icilapelape. (Yakobo 5:12) Yesu na Yakobo tabasosele ukuti cibi ukulapa pa kulanda icine mu cilye.

Nomba, nga ca kuti Umwina Kristu bamulomba mu cilye ukulapa ukuti ifyo alalanda fya cine? Nalimo kuti alapa nga alefwaya. Nga te ifyo, nalimo kuti bamweba ukupeela ubushininkisho bwa kupyana pa kulapa ukuti talebepa.—Abena Galatia 1:20.

Lintu ukulubulwisha mu cilye ca milandu kulesanshamo ukwimya ukuboko nelyo ukwikata Baibolo pa kulapa, Umwina Kristu nalimo kuti asala ukucite fyo fine. Kuti nalimo aibukisha ifya kumwenako fya mu Malembo ifya kucita icishibilo pa kulapa. Ku Mwina Kristu, icacindamisha ukucila pa kucita icishibilo ilyo alelapa ca kuti ebukisha ukuti alelapa pa menso ya kwa Lesa ukulanda icine. Ukulapa kwa musango yo kukalamba. Nga ca kuti Umwina Kristu ayumfwa ukuti kuti ayasuka icipusho bamwipusha mu fintu fya musango yo, lyena afwile ukwibukisha ukuti nalapa ukulanda icine, ico na kabushe Umwina Kristu afwaya ukusosa inshita yonse.