Alilambulwa pa Mukoosha Wakwe

Abantu abengi aba mitima yalungama bafwaya abatemwikwa babo ukusambilila ubufwayo bwa kwa Lesa lyena no kuba ne nsansa mu bumi. Lintu umuntu aipeela kuli Lesa, bambi, abaice na bakalamba, napamo balimwafwile ukusalapo bwino ku mulandu wa mibele yabo iisuma. Ifi e fyo cali kuli Jearim, umukashana umupungwe uwa ku Mexico, uwalembele kalata iyi pa bushiku bwa kulongana kwaibela ukwa Nte sha kwa Yehova:

“Ndefwaya mwebeko ifyo ntemenwe. Lekeni imushimikile. Napapita imyaka 18, ninshi nshilafyalwa, apo abafyashi bandi basambilile icine. Bamayo balilundulwike, kabili ilyo papitile nshita ine na ndume yandi twalilundulwike. Bonse pamo twalepepa kuli Yehova ukuti batata na bo bakabe mu nshila ya ku mweo. Imyaka 18 naipita, kabili lelo bushiku bwaibela kuli ifwe. Batata balebatishiwa. Ndetasha Yehova ukuti taletele impela ilyo iyi nshita twalolela sana ishilafika. Natasha, mwe Yehova!”

Pa myaka iingi, ulupwa lwa uyu mukashana lufwile lwaletontonkanya pa fishinte fyaba mu kufunda kwapuutwamo ukwa pali 1 Petro 3:1, 2, ukutila: “Mwe bakashi, petameni ku balume benu, ukuti na bakaano kuumfwa ku cebo bakolopekwe ukwabule cebo pa mulandu wa mibele ya bakashi babo, pa kuloleshe mibele yenu ya kaele iya mu katiina.” Kabili Jearim wacaice afwile alikonkele amashiwi yaba pa Amalango 5:16 ayatila: “Ulecindika wiso na noko, ifyo Yehova Lesa obe akwebele.” Ukukonka ifishinte fya musango yu no kulolela pali Yehova cine cine fyaletele amapaalo kuli Jearim no lupwa lwakwe.