Kosheni Amaboko Yenu

MU BAIBOLO, ukuboko kwalumbulwa ukucila pa miku 1,800. Insoselo umuba ukuboko shabomfiwa mu nshila shalekanalekana. Ku ca kumwenako, iminwe yasanguluka ilangilila ukuti ninshi umo wa kaele. (2 Samwele 22:21; Amalumbo 24:3, 4) Ukufumbatule minwe kwalola mu kuba na bukapekape kuli bambi. (Amalango 15:11; Amalumbo 145:16) Mu ciHebere, uubika ubumi bwakwe mu kapoosa mweo aba ngo ubika umweo wakwe mu kuboko kwakwe. (1 Samwele 19:5, NW) Ukutompola amaboko kupilibula ukufuupulwa. (2 Imilandu 15:7) Kabili ukukosha ukuboko e kuti ukuipangasha no kuba na maka ya kucita cimo.—1 Samwele 23:16.

Ilelo nacipamfya ukukosha amaboko yesu. Tuleikala mu “nshita ishayafya.” (2 Timote 3:1) Ilyo twafuupulwa, ilingi line tufwaya ukuleka, ukutompola amaboko yesu. Caliseeka ku bacaice ukuleka isukulu, abalume ukubutuka indupwa shabo, na banyina ukusha abana babo. Nga Bena Kristu, tulekabila ukukosha amaboko yesu pa kushipikisha amesho ayo twingakumanya mu mulimo wesu kuli Lesa. (Mateo 24:13) Nga tulecite fyo, tulenga umutima wa kwa Yehova ukusamwa.—Amapinda 27:11.

Ifyo Amaboko Yakoshiwa

Mu nshiku sha kwa Esra abaYuda balekabila ukukosha amaboko yabo pa kupwisha ukukuula cipya cipya itempele lya kwa Yehova mu Yerusalemu. Ni shani fintu amaboko yabo yakoshiwe? Ubulondoloshi butila: “Bacitile umutebeto wa cishatutumuka inshiku cinelubali ne nsansa; pantu Yehova abalengele ukusamwa, ayalwilile umutima wa mfumu ya Ashuri pali bene ku kukoshe minwe yabo mu mulimo wa ng’anda ya kwa Lesa, Lesa wa kwa Israele.” (Esra 6:22) Ukwabula ukutwishika, Yehova abomfeshe amaka yakwe ayabomba ku kulenge “mfumu ya Ashuri” ukusuminisha abantu ba kwa Lesa ukubwelelamo, kabili akoseleshe imitima ya bantu ica kuti bapwishishe umulimo batendeke.

Pa numa, ilyo ifibumba fya Yerusalemu fyakabile ukuwamishiwa, Nehemia akoseshe amaboko ya baYuda banankwe ukubombo mulimo. Tubelenga ati: “Nabebele ulwa kuboko kwa kwa Lesa wandi ukwali ukusuma pali ine, ne fyebo na fyo ifya mfumu ifyo yasosele kuli ine. Na bo batile, Natwime, no kukuula. Awe bakoseleshe iminwe yabo ukubombo mulimo usuma.” Nehemia na baYuda banankwe bakuulile cipya cipya ifibumba fya Yerusalemu na maboko ayakosa mu nshiku fye 52!—Nehemia 2:18; 6:9, 15.

Mu kupalako, Yehova alakosha amaboko yesu ukuti tubilishe imbila nsuma ya Bufumu. (Mateo 24:14) Acite fyo pa ‘kutulenga ukuti tupwililile mu fisuma fyonse ku kucito kufwaya kwakwe.’ (AbaHebere 13:21) Alitupeela ifibombelo fishaiwamina nga nshi. Twalikwata Baibolo ne fitabo ifilanda pali Baibolo, bamagazini, amabroshuwa, amatrakiti, na makaseti na mavidio pa kuti tulebomfya pa kushimikila ku bantu mu calo conse.  Na kuba, impapulo shesu shaba mu ndimi ukucila pali 380. Na kabili, Yehova alapayanya amasomo ya bulesa no kutukansha ifya kubomfya ifi fibombelo fisuma pa kupwishishisha ubutumikishi bwesu ukupitila mu kulongana kwa cilonganino, ukulongana kukalamba na mabungano.

Nangula Yehova alakosha amaboko yesu mu nshila ishingi, enekela ukuti tuleibikilishako. Ibukisheni ifyo kasesema Elisha aebele Imfumu Yehoashi, uwaishile mu kulomba ubwafwilisho kuli wene pa kuti ome abena Aramu balesansa. Elisha aebele imfumu ukubuule mifwi no kulasa pa nshi. Ubulondoloshi bwa mu Baibolo butila: “Alashile pa nshi imiku itatu, no kuleka. Umuntu wa kwa Lesa alimukalipile, no kutila, Aulase miku isano nangu mutanda, lyene nga kuti wauma abena Aramu wasuka wapwishishisha. Nomba ukoma abena Aramu imiku itatu fye.” (2 Ishamfumu 13:18, 19) Yehoashi tatungulwike ukuma abena Aramu, pantu taibikilisheko mu kupimpa.

Icishinte cimo cine cilabomba na kuli ifwe nga tulefwaya ukupwishishisha ifyo Yehova atupeela ukucita. Ukucila ukusakamikwa pa mafya tulekwata nelyo ifyo umulimo tupeelwe nalimo ukosele, tulingile ukubomba umulimo abapimpa no mutima onse. Tulekabila ukukosha amaboko yesu no kushintilila pali Yehova ukutwafwa.—Esaya 35:3, 4.

Yehova Akakosha Amaboko Yesu

Yehova takafilwe ukutwafwa no kukosha amaboko yesu ku kucita ukufwaya kwakwe. Kwena, Lesa takacite icipesha mano no kutucitila fye fyonse. Enekela ifwe ukucita ulubali lwesu—ukubelenga Baibolo cila bushiku, ukupekanishisha ukulongana no kusangwako lyonse, ukubombako ubutumikishi apo twingapesha, no kupepa kuli wene mu mukoosha. Nga mu busumino na mu kucincila twabomba ulubali lwesu ilyo tuli ne nshita, Yehova akatukosha ku kubomba ico enekele ukuti tubombe.—Abena Filipi 4:13.

Tontonkanyeni pa Umwina Kristu umo uwafwililwe umukashi na banyina mu mwaka umo wine. Ilyo aali acili no bulanda, umukashi wa mwana wakwe alibutwike no kuleka imikalile ya Bwina Kristu. Uyu munyina atile: “Nasambilileko ukuti teti tuisalile amesho, ne nshita yengatuponena ne miku twingeshiwa.” Cinshi camukosha ukutwalilila? Atila: “Ipepo ne sambililo lya pa lwandi fyalingafwa ukutunguluka no kushipikisha amesho. Kabili ukutungilila kwa bamunyina ne nkashi aba ku mupashi kwalinsansamusha nga nshi. Icacilapo, nalyumfwikisha ubucindami bwa kulundulula bucibusa busuma na Yehova lintu amafya tayalabako.”

Te mulandu ne fyo mwapitamo mu bumi, pampamineni pa kutetekela sana Yehova no kubomfya bwino imitantikile yonse abikako ku kukosha amaboko yenu. Lyene mukaba na maka ya kubombela Yehova umulimo ushaiwamina nga nshi kabili ukuleta ilumbo no mucinshi kwi shina lyakwe ilyapulamo.—AbaHebere 13:15.

[Icikope pe bula 31]

Yehoashi tatungulwike sana ukuma abena Aramu, pantu taibikilisheko mu kupimpa