“Ube Uwa Mano mu Nshiku Ishikakonkapo”

Jean de La Bruyère kalemba umwina France uwa mu myaka ya ba1800 atile “Icinabwingi ca bantu bekala imyaka ya kubalilapo iya bumi bwabo mu nshila ya kuti imikalile yabo iya mu myaka ya kulekelesha yaba ya bulanda.” Na cine, uwacaice uwakwata imitima ibili kuti aba uupungaila, ukuba uushaikushiwa kabili ukuba na malangulushi. Lubali lumbi, uwacaice cintalika kuti atwalilila ukuba mu nshila yalubana, icingamulenga ukukanakwata insansa ku ntanshi. Fyonse fibili, ukukanacita icalungama nelyo ukucita ifyalubana kuti kwaleta ubulanda bukalamba.

Bushe kuti twataluka shani ku ca musango yu? Mu kusoka pa lwa kuba ne mitima ibili abacaice bakwata, Icebo ca kwa Lesa cifunda abacaice ati: “Lelo ibukisha Kalenga obe mu nshiku sha bulumendo bobe, ilyo inshiku sha bubi tashilaisa, ne myaka tailafika ilyo ukatila, Tapaba kuli ine ukucankilwamo.” (Lukala Milandu 12:1) Nga ca kuti uli musepela, ibikilisheko ukusambilila pali “Kalenga obe” ilyo ucili umwaice.

E co, nomba, Baibolo yafwa shani abacaice ukutaluka ku bupumbu bwa bwaice? Itila: “Umfwo kupanda amano, pokelelo kusalapula, ku kuleka ube uwa mano mu nshiku ishikakonkapo.” (Amapinda 19:20) Na kabili Baibolo ilanga bwino ukuti ukukaana amano ya bukapepa pa mulandu wa mulekelesha nelyo bucipondoka mu nshiku sha bwaice, nelyo pa mushinku uuli onse, kuleta ifintu fyabipa. (Amapinda 13:18) Lelo, ukumfwila ukufunda kwa kwa Lesa kuleta “ukutantalila kwa nshiku, ne myaka ya mweo, no mutende,” ubumi busuma kabili ubwaba ne mifwaile.—Amapinda 3:2.