Talukeni ku Ncende ya Busanso!

ABASAMBILILA ifya kupuulika kwa mpili balikwata umulimo wa kuceeceeta no kumona ifishininkisho fya kuti ulupili lwalaswa lupuulike lyena bafwile no kusoka abantu. (Lintu ulupili lwa Fugen lwali talulapuulika, bakapokola balitalwishe abantu ku ncende ya busanso.) E fintu na basambi ba Baibolo bacita, balamona ifishibilo fya “kupwa kwa pano isonde” no kwebako bambi pa lwa busanso buli mupepi.—Mateo 24:3.

Pa cipandwa ca Baibolo icitusoka pa lwa busanso bukaba mu calo conse ubuli mupepi, tubelengapo no bulondoloshi bwa fifwile ukucitika intanshi ukuti: “Uluko lukemino luko, no bufumu bukemino bufumu; kukaba ne fipowe ne finkukuma mumo mumo. . . . Bakasesema ba bufi abengi bakema, no kulufya abengi. Kabili ukutemwa kwa bengi kukashibantukila pa mulandu wa kufulisha kwa bupulumushi. . . . Ne mbila nsuma iyi ya bufumu ikabilwa ku fyalo fyonse ku kubo bunte ku nko shonse; e lyo impela ikesa.”—Mateo 24:7-14.

Uuli fye onse kuti aishiba ifyo ukusesema kulefikilishiwa. Twalimona ukufikilishiwa kwa kusesema na kucilisha ukutendeka mu mwaka wa 1914. Muli uyu mwanda wa myaka, inkondo sha calo shibili, inkondo sha bana calo ishingi, inkondo shinono, ne sha pa kati ka mishobo na pa kati ka mipepele yapusanapusana, shalicitike. Inkondo shalileta ifipowe ku bantu, te apo peka kabili kulaba no kupusulwa ukukalamba pa mulandu wa masanso ya mu fyabumbwa. Abantu abengi balifwa ku finkukuma. Imipepele na bashimapepo ba bufumfuntungu ukubikapo fye na basambi babo bankosa mitwe balifulilako. “Ukufulisha kwa bupulumushi” kulengele abantu ukukanatemwana, kabili abengi tabaleumfwana na bena mupalamano babo nga fintu baleumfwana kale.

Ukwabula ukutwishika, umulimo wa kushimikila mu calo conse ulebombwa, kabili uli cimo pali ifi fishibilo. Bweleleni ku nkupo ya uno magazini, lintu mulebelenga umutwe mwalasangamo na mashiwi yaleti “Ulusabankanya Ubufumu bwa kwa Yehova.” Ulupungu lwa kwa Kalinda, ulusabankanishiwa mu ndimi 132 kabili ubwingi bwa lupulintwa ukucila pa mamilioni 22,  lwaba cibombelo icikalamba kuli bakashimikila wa “imbila nsuma iyi ya bufumu” ku fyalo fyonse. Iyi mbila nsuma yalikwata no bukombe bwa kuti Kalenga wa fintu fyonse, Yehova Lesa, alipampamika Ubufumu bwa mu muulu ubukonaula fyonse ifyabipa no kuleta paradise pano isonde. Cine cine, icishibilo ca kuti Lesa mu kwangufyanya ali no kucitapo cimo cili icamonekesha, kabili ici cilelangilila ukuti abantu ba mu bwikashi buno bali mu busanso.—Linganyeniko 2 Timote 3:1-5; 2 Petro 3:3, 4; Ukusokolola 6:1-8.

Ubushiku bwa kwa Yehova Ubwa Kutiinya

Cinshi cikacitika lintu inshita ya kwa Yehova iya kuleta ubupingushi yafika? Kutikeni fintu umwine alondolola mu kumfwika ifikacitika pali ilya nshita: “Nkalanga ne fya kupapa mu muulu na pe sonde, umulopa no mulilo ne ntumba sha cushi; akasuba kakaaluke mfifi, no mweshi ukaaluko mulopa, ku kutangililo kwisa kwa bushiku bwa kwa Yehova, ubukulu kabili ubwa kutiinya.”—Yoele 2:30, 31.

Ubushiku bwa kutiinya kabili ubwa bonaushi ubukalamba ubwacila na pa kupuulika kwa mpili atemwa icinkukuma, buli mupepi. Kasesema Sefania atila: “Nabupalamo bushiku bukulu bwa kwa Yehova, nabupalama no kwangufyanisha. . . . Ilyo icalo conse cikapya ku mulilo wa kalumwa kakwe; pantu akacita ukupwishishisha kwa kusakamika ku bekashi bonse ba mu calo.” Nelyo cingati ‘silfere wabo, nangu ni golde wabo, takabe na maka ya kubapokolola mu bushiku bwa kububuka kwa kwa Yehova,’ inshila ya kupusukilamo ubu bushiku bwa kutiinya e ko yaba.—Sefania 1:14-18.

Sefania alangilila inshila ya kupusukilamo, lintu atila: “Ilyo kucili takulaisa pali imwe icifukushi ca bukali bwa kwa Yehova, ilyo ubushiku bwa bukali bwa kwa Yehova tabulaisa pali imwe. Fwayeni Yehova, mwe bafuuka ba mu calo bonse. . . . Fwayeni ubulungami, fwayeni ubufuke; napamo kuti mwabelama mu bushiku bwa bukali bwa kwa Yehova.” (Sefania 2:2, 3) Kuti twabelama ukupitila mu ‘kufwaya Yehova, ukufwaya ubulungami, no kufwaya ubufuke.’ Ni bani balefwaya Yehova ilelo?

Ukwabula ukutwishika kuti mwayampanya ishiwi “Yehova” ku Nte sha kwa Yehova pa mulandu wa kushimikila kwabo. Napamo mwalipokako uno magazini kuli umo uwa bene. Balishibikwa ukuba abekashi ba mibele isuma kabili abatambalala. Baleesha ukufwalo “buntu bupya,” ububimbamo ukulundulula ubufuke. (Abena Kolose 3:8-10) Basumina ukuti, icilenga ukube fyo, ni pa mulandu wa kusambilishiwa no kuteyanya kwa kwa Yehova ukumonekela mu filonganino fya Nte sha kwa Yehova ifyaba mu calo conse ukubikako fye no ko kwine mwikala. Cine cine, kuti mwabelama pamo ne Nte sha kwa Yehova, ‘bamunyinenwe’ ababa mu calo conse.—1 Petro 5:9.

Belameni Pali Ino Ine Nshita

Nga tulefwaya ukubelama ukupitila mu kufwaya Yehova, tufwile ukuba bacibusa wakwe. Cinshi tufwile ukucita? Baibolo yasuka ukuti: “Bushe tamwaishibo kuti ukuba na bucibusa ne calo bulwani kuli Lesa? E ico uyo afwayo kuba bucibusa ne calo aicito mulwani kuli Lesa.” (Yakobo 4:4) Pa kuba bacibusa wa kwa Lesa, tufwile ukutaluka ku ncitilo shabipa ishaba muli cino calo caisulamo abantu batalamina Lesa.

Baibolo itukambisha ukuti: “Mwitemwa pano isonde, nangu fya pano isonde; ngo muntu atemwa pano isonde, ukutemwa Shifwe tamwaba muli wene. Pantu conse ca pano isonde, lunkumbwa lwa mubili, no lwinso lwa menso, na mataki ya miikalile ino, tacafuma kuli Shifwe, lelo ca pano isonde. Kabili pano isonde paleya, no lunkumbwa lwa pako; lelo uucito kufwaya kwa kwa Lesa ekalilila umuyayaya.” (1 Yohane 2:15-17) Abantu abengi ilelo bakonkelela ulunkumbwa lwa mubili e kuti ulwinso, ukutemwisha indalama, no kucululusha abantu banabo. Lelo pa kuba cibusa wa kwa Yehova, umuntu afwile ukucimfya ulunkumbwa lwa musango yu.—Abena Kolose 3:5-8.

Napamo mwalitemwa ukubelenga uno magazini mu nshita mu nshita, kabili mulasuminisha na fintu ilondolola ukusesema kwa mu Baibolo. Lelo, pambi mulashingashinga ukubishanya ne Nte sha kwa Yehova. Bushe nga ca kuti tulolenkene no busanso, kuti capwila fye mu kumfwa  ukusoka? Nga fintu twacumfwa ku cacitike pa lupili lwa Fugen ilyo lwapuulike, tulekabila ukucitapo cimo lintu twaumfwa ukusoka. Ibukisheni ukuti, bakalemba wa lyashi ukucila pali 15 na bakakopa wa fikope balifwile ilyo balefwaisha ukumona apo ukupuulika kwali no kucitikila. Na kuba, kakopa wa fikope umo afwile ninshi natinika no munwe wakwe pe batani lya kamela ukuti akope. Uwasambilile ifya kupuulika kwa mpili umo atile: “Nga kufwa, kuti natemwa ukufwila mupepi na po ulupili lulepuulikila,” na cine apo pene e pantu afwilile nga fintu fye umwine afwaile. Bonse balitemenwe incito shabo kabili balefwaya no kukwata ifintu fyafulilako. Lelo, balifwile pa mulandu wa kuti tabaumfwilile ukusoka.

Abengi ilelo balakutika ku bukombe bwa kuti Lesa alaswa onaule buno bwikashi bwabipa, kabili balamona kwena ukuti uku kusoka kwalicindama. Bapelulula ukuti, ‘Ubukali bwa kwa Lesa limbi bukesa, nomba te lelo.’ Batantalisha fye no kwisa kwa bushiku bwa kwa Yehova pa kuti tabalekele ukucita fintu abene bamona ukuti fyalicindama pa nshita ino.

Baruki na o akwete ubwafya bumo bwine. Apo ali ni kalemba wa kwa kasesema Yeremia, ukwabulo mwenso asokele abena Israele pa lwa busanso bwalalilile Yerusalemu. Lelo, pa kashita kamo alinenwike ku mulimo apeelwe. E ico, Yehova alimulungike no kumweba ukuti: “Na iwe bushe uleifwaile fikalamba? Wifwaye fi.” Nampo nga cuma, ukulumbuka, atemwa ifikwatwa, Baruki taali ‘na kuifwaile fikalamba.’ Alingile fye ukutemwa icintu cimo, ukucita ukufwaya kwa kwa Lesa e kuti ukwafwa abantu ukuba kuli Wene. Na muli fyo, aali no kupokelela ‘umweo wakwe nge ca kutapa.’ (Yeremia 45:1-5) Cimo cine na ifwe, tatufwile ‘ukuifwaile fikalamba,’ lelo tufwile ukufwaya Yehova, ne cikafumamo kupususha ubumi bwesu.

Pa lupili lwa Fugen, bakapokola ukucila pali 12 kumo na baipeele ukushimya umulilo bali pa ncito lintu imito ne cipuki fyabocele. Baleyafwa no kufwaya ukucingilila abantu baleikala muli ilya ncende yalimo ubusanso. Baali nga baume na banakashi aba pali ndakai abaipoosa pa mulimo wa kuwamya cino calo. Nelyo cingati baba ne milandu isuma, “icapondama cafilwo kololoka.” (Lukala Milandu 1:15) Ubwikashi bwapondama tabwingolololwa. Bushe kuti kwaba kupelulula kusuma ukupanga “bucibusa ne calo” ukupitila mu kucita fintu cifwaya kabili ico Lesa apampamina ukonaula?

Lintu Mwafulumuka, Te Kwesha Ukubwelelamo

Ukufulumuka ukuli ubusanso tacilepilibula ukuti calaala capwa mwacingililwa lelo mufwile ukutwalilila ukuba pamo na ‘ba bwananyina.’ (1 Petro 2:17) Twilaba balya balimi, abo pa numa ya kubatalusha ku busanso, babwelele mu kumona amabala yabo ku lupili lwa Fugen. Nakalimo, balefulukisha ukubwelela ku mikalile ya “lyonse” iyo baikele kale. Lelo kuti mwamona ukuti ukupingulapo kwabo ukwa kubwelelamo, takwalimo amano. Nakalimo tawali e muku wabo uwa kubalilapo ukuciluka umwa kupelela. Bafwile balile kuli ilya ncende ya busanso no kwikalako pa kashita kalinga ukwabula nelyo cimo ukucitika. Umuku wakonkelepo, napamo balibweleleko no kukokolako, kabili takwali nelyo cimo icacitike. Cimoneke fyo, balibeleshe ukuciluka umwa kupelela kabili balipamine ica kuti baleshingashinga ukukanafwaya ukufuma mu ncende yabo.

Yesu Kristu alandile pa mibele yapalako iyali no kucitika pa “kupwa kwa pano isonde.” Atile: “Ifyo cali mu nshiku shilya pa ntanshi ya lyeshi, abantu balelya no kunwa, baleupa no kuupwa, ukufika pa bushiku Noa aingile mu cibwato, kabili tabaishibe lyasukile ilyeshi lyaisa no kusenda bonse; e fyo kukaba no kwisa kwa Mwana wa muntu.”—Mateo 24:3, 38, 39.

Moneni ukuti Yesu alumbwile ukulya, ukunwa, ukuupa no kuupwa. Pali fi fyonse tapali nelyo cimo icalubana mu menso ya kwa Yehova. Nga kanshi cinshi calubene? Abantu ba mu kasuba ka kwa Noa “tabaishibe,” kabili imikalile yabo yali imo ine lyonse. Lelo lintu kwaba imibele ya mu kampampa, imikalile ya muntu taifwile ukuba iya “lyonse.” Ilyo mwafulumuka, atemwa ukupaatuka ku calo cilaalilile ukonaulwa, mufwile ukulwisha na maka ukucimfya ukusonga konse ukwa kufwaya ukubwelela mu kusota ifyo  mwashile. (1 Abena Korinti 7:31) Napamo lwa ku mupashi kuti mwapumbuka no kufuma mu ncende ya mutende lelo lintu papitako akashita mwabwela fye abatuntulu sana ukwabula uuli onse ukwishiba icicitike. Nangu cibe fyo, ukucite fyo kuti kwamulenga ukupama no kubwelela ku calo, kabili ukuba kulya pa kashita kalepelako. Mu kwangufyanya ukutontonkanya kwa kuti: “Impela tayaise ilelo” kulakulilako.

Kabili, ibukisheni balya banamutekenya batatu abafwile ilyo balelolela bakalemba wa lyashi na bakakopa wa fikope lintu ulupili lwapuulike. Bamo ilelo kuti bakonkelela bambi abapingulapo ukubwelela ku calo. Lelo te mulandu ne cingamulenga ukubwelela ku calo, natumona ukuti ukubeleleka takufwile ukumubwekesha kuli ilya ncende ya busanso.

Bonse abasangilwe muli bulya busanso bwa kupuulika kwa lupili lwa Fugen, balicilwike umwa kupelela no kwingila mu ncende ya busanso. Nelyo cingati bonse balyenekele ukuti bushiku bumo ulupili lwali no kupuulika, takwali nelyo umo pali bene uwatontonkenye fyo cali no kucitika pali bulya bwine bushiku. Lintu abantu abengi bamona ifishibilo fya kupwa kwa bwikashi buno, balenekela ukuti ubushiku bwa kwa Yehova bukesa limbi lelo te pali ndakai. Bambi bayumfwa fye no kuti ubu bushiku te kuti bwise “ilelo.” Imimwene ya musango uyu ilaleta ubusanso icine cine.

Umutumwa Petro asokele ukuti: “Ubushiku bwa kwa Shikulu [“Yehova,” NW] bukesa ngo mupupu.” E ico tufwile ukuba abalola, “abalolela no kufulukisho kwisa kwa Bushiku bwa kwa Lesa,” kabili tufwile ‘ukuba abacincila ukuti tukasangwe ababula akabi kabili ababula akalema mu mutende.’ (2 Petro 3:10-14) Pa numa ya konaula buno bwikashi bwa bubifi, paradise wa pe sonde uukalasakamanwa no Bufumu bwa kwa Lesa akabako. Shi twitunkwa ukubwelelamo ku ncende ya busanso te mulandu no kutontonkanya kwingesa muli ifwe, pantu nalimo bulya bwine bushiku tukatila natubwelele ku calo e bukaba ubushiku bwa kwa Yehova.

Belameni kabili ikaleni pamo na bantu ba kwa Yehova.

[Ifikope pe bula 7]

Belameni kabili ikaleni pamo na bantu ba kwa Yehova

[Abatusuminishe Ukubomfya Icikope pe bula 4]

Iwasa/Sipa Press