Bushe Ifyo Baibolo Ilanda Filatwafwa Muno Nshiku?
BAMO BALAKAANA UKUTI TE KUTI FITWAFWE. Dokota umo alandile ukuti ukubomfya ifyebo fyaba mu Baibolo cimo no kubomfya ibuuku ilyalembelwe muli ba 1920 pa kusambilisha sayansi muno nshiku. Umuntu uushasumina mu fyo Baibolo ilanda ena kuti apashanya ukubomfya Baibolo ku kubomfya akatabo umwaba ifya kubomfya kompyuta ya kale ilyo mulebomfya kompyuta ya muno nshiku. Kanshi kuti twatila abantu bamo bamona kwati Baibolo citabo ca kale kabili te kuti itwafwe muno nshiku.
Cinshi umuntu engalabomfesha icitabo ca kale muno inshiku apo kwaliba ukwa kusanga ifyebo ukwingi? Na kuba, pa mawebusaiti ayengi balabikapo ifyebo ifipya ifingafwa abantu ukwishiba ifya kucita pa fintu. Pa maTV palaba bampandamano abengi abalanda pa fyo abantu balingile ukulaikala. Na kabili kwaliba amabuuku ayengi ayo bashitisha ayapanda abantu abengi amano.
Nga ca kuti kwaliba ifi fyonse, cinshi twingalabomfesha Baibolo, icitabo icalembelwe imyaka 2,000 iyapita? Bushe na ifwe te kuti tutile ukubomfya Baibolo kwaba nga ukubomfya ibuuku lya sayansi ilya kale nelyo ukubomfya akatabo akalondolola ifya kubomfya kompyuta ya kale ilyo mulebomfya kompyuta ya muno nshiku? Kwena ukulanda ifi takwaba bwino, pantu ifyo tusambilila pali sayansi ne fya kupangapanga filaaluka, lelo ifyo abantu bakabila tafyaluka. Abantu bacili balafwaya ukwishiba ico babela pano calo, ifyo bengaba ne nsansa, ifyo bengacita pa kuti belasakamikwa, baleumfwana mu lupwa no kukwata ifibusa ifisuma.
Nangu ca kuti Baibolo citabo ca kale, calilanda pali ifi fyonse e lyo na pa fintu fimbi. Na kabili Baibolo ilanda ukuti umwine wa fyebo fyabamo ni Kabumba wesu. Ilatutungulula muli fyonse ifyo tucita kabili ilatupanda amano pa mafya ayo twingakwata. (2 Timote 3:16, 17) Ne cacilapo ukuwama ca kuti, ifyo ilanda filatwalilila ukutwafwa. Baibolo itila: “Icebo ca kwa Lesa ca mweo.”—AbaHebere 4:12.
Bushe ifyo Baibolo ilanda fya cine? Bushe ifyebo fyaba muli Baibolo kuti fyatwafwa muno nshiku nelyo te kuti fitwafwe? Luno Ulupungu lwa kwa Kalinda ulubalilepo ukufuma pa ma magazini yambi ayakakonkapo, lwalamwafwa ukusanga amasuko kuli aya amepusho.
Nalimo Kuti Mwatemwako ne fi
AMASUKO KU MEPUSHO YA MU BAIBOLO
Bushe Baibolo Cinshi?
Tendekeni ukwishibilapo na fimbi pa bukembe ubwafuma kuli Lesa ubo beta ukuti Icebo ca kwa Lesa.
AMASAMBILISHO YA MU BAIBO AYACINDAMA
Bushe Baibolo Cebo ca kwa Lesa?
Nga ca kuti Lesa e walengele Baibolo ilembwe, ninshi ifwile ukucila ifitabo fimbi ifyabako.
AMASUKO KU MEPUSHO YA MU BAIBOLO
Bushe Baibolo Kuti Yalenga Naba ne Nsansa mu Cupo?
Ukufunda ukusuma ukwaba mu Baibolo kwalilenga abaume na banakashi abengi ukuba ne nsansa mu cupo.
PA NTE SHA KWA YEHOVA
Lombeni Ukumutandalila
Lanshanyeni icipusho ca mu Baibolo, nelyo ishibilenipo na fimbi pa Nte sha kwa Yehova.
