Ifya bupe fimo filaba ifyacindama pantu abatupeela bantu ababa mu bulashi nelyo abo twacindika sana. Ifya bupe fimo nangu ca kuti tafiba ifya mutengo, tulaficindamika nga ca kuti fyafuma kuli lupwa wesu nelyo cibusa uo twatemwa. Ifi fine e fyo cali ku ca bupe ico ba Russell bapeele ba Jordan, abo tulandilepo mu cipande cifumineko. Bushe ifi twalandapo kuti twafilinganya shani ku bupe bwa cilubula?

Ica kubalilapo, Baibolo ilanda ukuti “Lesa atumine Umwana wakwe uwafyalwa eka ukwisa muli ici calo ukuti tukwatile umweo muli ena.” (1 Yohane 4:9) Ici e calenga ubu ubupe ukuba ubwacindama sana. Takwaba uwakwata amaka ukucila Lesa. UmuHebere uwaimbile amalumbo alandile pali Lesa ati: “Imwe mweka, mwe bakwata ishina lya kuti Yehova, Ni mwe Mwapulamo pano isonde ponse.” (Amalumbo 83:18) Lesa uwatupeele ici ica bupe e wakwata sana amaka ukucila umuntu uuli onse uwingatupeela ica bupe.

Ica bubili, ni co Lesa ni “Shifwe.” (Esaya 63:16) Cinshi twalandila ifi? E watupeele ubumi. Na kabili alatusakamana nga filya fine fye wishi uwatemwa abana abasakamana. Ilyo Lesa alelanda ku bantu bakwe aba ku kale abo aleita ukuti Efraimu, abepwishe ukuti: ‘Bushe Efraimu mwana uwatemwikwa kuli ine? Bushe mwana uo natemwisha? . . . Umutima wandi ulemufuluka. Kabili nkamubelela uluse.’ (Yeremia 31:20) Ifi fine e fyo Lesa omfwa na pa babomfi bakwe aba muno nshiku. Lesa ni Kabumba wakwatisha amaka, ni Shifwe kabili ni Cibusa wesu. Bushe ici tacifwile ukulenga mwacindika sana ica bupe icili conse ico Lesa e ngamupeela?

Ica bupe cilacindama sana nga ca kuti abatupeele ico ica bupe baitemenwe fye ukutupeela. Umuntu uupeela ukwabula bukaitemwe tenekela ukuti abo alepeela bafwile nabo ukumupeelako fimo.

Lesa atupeele Umwana wakwe pa mulandu wa kuti alitutemwa. Baibolo itila: “Kuli ici e ko ukutemwa kwa kwa Lesa kwamonekele muli ifwe, pantu Lesa atumine Umwana wakwe uwafyalwa eka.” Cinshi calengele acite ifi? Ni co alefwaya “ukuti tukwatile umweo muli ena.” (1 Yohane 4:9) Bushe Lesa alingile ukutupeela icilubula? Awe! “Icilubula ca kwa Kristu Yesu” e mo Lesa atulangila “icikuuku cakwe.”—Abena Roma 3:24.

Cinshi twalandila ukuti ubu bupe e mo Lesa atulangila “icikuuku cakwe”? Baibolo itila: “Lesa alitulanga ukutemwa kwakwe pantu ilyo twali tucili ababembu, Kristu alitufwilile.” (Abena Roma 5:8) Icalengele Lesa aipeeleshe ukutwafwa pa fyo twali abapelelwa kabili ababembu, ni co alitemwa sana fwe bantu. Tapali ifyo twacitilepo pa kuti atutemwe kabili tapali ifyo twingamulipila. Pa fya bupe fyonse ifyo Lesa atupeela, icilubula e ca bupe capulamo.

Ifya bupe fimo fyalicindama pantu filalanga ifyo uwatupeele aipeeleshe sana pa kutupeela. Tulacindamika sana ica bupe nga ca kuti uwatupeele aliipeeleshe ukutupeela icintu ico atemwisha sana.

Lesa “apeele Umwana wakwe uwafyalwa eka.” (Yohane 3:16) Nga alefwaya nga tatupeele icibumbwa ico atemwisha. Pa myaka iingi iyo Lesa alebumba imyulu ne calo, Yesu e walebomba nankwe kabili Lesa ‘alimutemenwe nga nshi.’ (Amapinda 8:30) Yesu “Mwana wakwe uo atemwa” kabili “e cipasho ca kwa Lesa uushimoneka.” (Abena Kolose 1:13-15) Takwatala akuba ifibumbwa ifyakwata bucibusa bwakosa nga bulya bwali pali Lesa na Yesu.

Na lyo line, Lesa ‘takeenye Umwana wakwe.’ (Abena Roma 8:32) Yehova atupeele ubupe ubo atemwishishe kabili takwaba ica bupe icacila pali ici.

Ifya bupe fimo fyalicindama pantu filalenga twakwatwa ifyo tulekabila e lyo ne fyo tukabila sana. Ku ca kumwenako, bushe te kuti mutemwe sana nga ca kuti umuntu aliipeeleshe ukumulipilila indalama ishingi isho mushingakwanisha ukuilipilila pa kuti bamundape ku bulwele bwingamwipaya? Ala ubupe bwa musango uyo kuti bwaba ubwacindama sana kuli imwe!

Baibolo itila: “Filya fine fye bonse bafwila muli Adamu, e fyo na bonse bakalengelwa aba mweo muli Kristu.” (1 Abena Korinti 15:22) Apo tuli bana ba kwa Adamu, bonse ‘tulafwa’ kabili te kuti tuipokolole ku malwele na ku mfwa nelyo ukuibwesesha kuli Lesa pa kuti tube ifibusa fyakwe no kukanaba aba mulandu kuli ena. Na kabili apo tuli bantu fye, te kuti tuilubule nelyo ukulubula “umweo” wa bantu bambi. Baibolo itila: “Tapali nangu umo pali aba uwingalubula nangu fye ni munyina, nelyo ukupeela kuli Lesa ica kumulubwilako . . . [Umweo] washala fye ukwabula ukulipilwa umuyayaya.” (Amalumbo 49:7, 8) Tulakabila sana uwa kutwafwa pantu te kuti tukwanishe umutengo wa cilubula. Nga takwali uwa kutwafwa, kuti twaba abapelelwa.

Apo Yehova alitutemwa sana, aliipeeleshe ukutulipilila ifyo twalekabila pa kuti ‘bonse tukalengwe aba mweo’ muli Yesu. Bushe icilubula cilenga shani  twaba aba mweo? Baibolo itila: “Umulopa wa kwa Yesu Umwana wakwe ulatusangulula ku lubembu lonse.” Ukutetekela mu mulopa uo Yesu asuumishe kulalenga tuleelelwa imembu, kabili kukalenga tukabe no mweo wa muyayaya. (1 Yohane 1:7; 5:13) Finshi icilubula cikacitila balupwa wesu ne fibusa abafwa? Baibolo itila: “Apo ni mu muntu umo e mwaishiile imfwa, e fyo no kubuuka kwaishila mu muntu umo [Yesu].”—1 Abena Korinti 15:21. *

Tatwatala atupokelelapo ica bupe ku muntu wakwatisha amaka nelyo ica bupe icilanga ifyo Lesa atutemwa icacila pe lambo lya kwa Yesu. Takwatala akuba uwaipeeleshapo ukutupeela ubupe ubwacindamisha ukucila pali Yehova Lesa. Na kabili takwatala akuba ica bupe ico tukabila sana icacila pa cilubula pantu cena calilenga twalubulwa ku lubembu ne mfwa. Ukwabula no kutwishika, takwaba ica bupe icacindama ukucila icilubula