MU FYALO fimo abantu balicindika sana ukukwata ishina ilisuma ica kuti kwaliba na mafunde ayakucingilila ishina ilisuma. Aya amafunde yalacingilila umuntu ku balanda ifyabipa pa muntu pa mulabasa e lyo na ku bantu bambi. Ifi filenga twaibukisha ipinda lya kale ilitila: “Cawama ukusala ishina ilisuma ukucila ifyuma ifingi; ipaalo lyawama ukucila silfere na golde.” (Amapinda 22:1) Bushe kuti twacita shani pa kuti tukwate ishina lisuma na pa kuti abantu batucindike? Baibolo ilatweba ifyo twingacita.

Ku ca kumwenako, moneni ifyo ilanda mu Amalumbo icipandwa 15. Pa kwasuka icipusho ca kuti, “Nani engaba umweni mwi tenti [lya kwa Lesa]?” kemba wa malumbo alembele ukuti muntu “uucita icalungama kabili uusosa icine mu mutima wakwe. Uushicita ulwambo . . . , uushicita icabipa ku munankwe, kabili uushiseebanya cibusa wakwe uwa pa mutima. Mu menso yakwe onse umuwelewele tamufwaya . . . Nga alapa icingamuletelela, tateluka. . . . Kabili uushipoka ifisakanwa.” (Amalumbo 15:1-5) Bushe te kuti mucindike umuntu uucita ifi fyonse twalandapo?

Imibele na imbi iilenga umuntu bamucindika, kuiceefya. Baibolo pa Amapinda 15:33 itila, “Icitangilila ubucindami kuiceefya.” Abantu abaiceefya balamona umo bashilecita bwino no kubombelapo, kabili ici cilalenga babacindika. Na kabili nga balufyanya balalomba ubwelelo. (Yakobo 3:2) Nomba aba cilumba te fyo baba, pantu bena nga balufyanya balaipokolola. Baibolo pa Amapinda 16:18 itila, “Icilumba e citangilila ukuwa, na matutumuko yatangilila ukuipununa.”

Nomba kuti mwacita shani nga ca kuti umuntu amubifisha ishina? Bushe mulingile ukwangufyanya ukucitapo fimo mu bukali? Yipusheni amuti, ‘bushe nga naipokolola, ifyo nakulalanda fyakulalenga fye ndesabankanya ubufi?’ Nangu ca kuti limo cilaba fye bwino ukutwala umulandu ku cilye, Baibolo ilatupandako amano ukuti: “Witwala bwangu umulandu ku cilye,” lelo “lubululeni no munobe umulandu babili.” (Amapinda 25:8, 9) * Ukutwala umuntu ku cilye kuti kwalenga mwapoosa indalama ishingi, lelo nga mwacita ifi Baibolo ilanda, te kuti mupoosepo indalama ishili shonse.

Baibolo tailanda fye pa fya mipepele, lelo ilatwafwa no kulaikala bwino. Bonse abakonka amashiwi yabamo balaba ne mibele iisuma iilenga bapanga ishina lisuma e lyo na bantu ukubacindika.