IFYO BAIBOLO ILANDA: “Uukokola ukukalipa awama ukucila impalume.”—Amapinda 16:32.

UMWALOLA AYA AMASHIWI: Cilawama nga tulelama ubukali. Kwena fimo ificitika kuti fyalenga umuntu uuli onse fye ukukalipa, nomba nga tatulelama ubukali kuti twailetelela. Abafwailisha pa fintu basanga ukutila abantu nga nabafulwa, ilingi line balalanda nelyo ukucita ifilenga baumfwa ububi pa numa.

IFYO MWINGACITA: Mulingile ukulama ubukali pa kuti tamucitile ifyabipa. Abantu bamo bamona kwati umuntu nga mukali ninshi mwaume nelyo mwanakashi wine wine, nomba ici te cishinka. Baibolo itila, “Umuntu uushi-ilama aba ngo musumba uushacingililwa, uwabula ilinga.” (Amapinda 25:28) Icingamwafwa ukukanaba no bukali, kwishiba ifishinka fyonse ilyo tamulacita icili conse. Baibolo ilanda no kuti “umuntu wa mano takalipa bwangu.” (Amapinda 19:11) Kanshi tulalanga ukuti tuli ba mano nga ca kuti twaishiba ifishinka fyonse ilyo tushilacita icili conse. Na kabili ukucita ifi kuti kwalenga twilakalipa bwangu.

IFYO BAIBOLO ILANDA: “Muletootela.”—Abena Kolose 3:15.

UMWALOLA AYA AMASHIWI: Abantu abengi balishiba ukutila umuntu uutasha alaba ne nsansa. Nangu fye bantu abakwatapo amafya ayakalamba balishiba ici cishinka. Balanda ukuti icilenga baleba ne nsansa ni co babika sana amano ku fisuma ifyo bakwata, ukucila ukubika amano ku mafya.

 IFYO MWINGACITA: Cila bushiku mulelemba ifintu ifyo mulingile ukutashishapo. Tamufwile ukulatasha fye pa fintu ifikalamba. Muletasha na pa fintu ifinono pamo nga ifyo akasuba kamoneka bwino nga kaletula, ifyo mumfwa bwino nga muleshimika ilyashi na cibusa nelyo lupwa e lyo na pa kuba abomi. Ukutontonkanya pali ifi kuti kwalenga mwaba ne nsansa.

Mufwile no kulatontonkanya pa fyalenga muletasha balupwa lwenu ne fibusa. Nga pali ifisuma ifyo mwingatashishapo cibusa wenu nelyo lupwa, tamufwile ukushingashinga ukumweba. Nalimo kuti mwamulembela kalata nelyo ukumutumina meseji. Nga mwacita ifi kuti mwalaumfwana bwino no yo muntu kabili mukaba ne nsansa isho tukwata nga tulepeela.—Imilimo 20:35.

MUFWILE UKUFUMAPO NGA KWABA IFINGALENGA MWATENDEKA UKUUMANA.

“Ukutendeka kwa lubuli kwapala umuntu uwaiswila amenshi; e ico ilyo ukuumana takulaima, fumapo.”—AMAPINDA 17:14.

MWILASAKAMIKWA SANA PA FISHILACITIKA.

“Mwilasakamikwa pa bushiku bwa mailo, pantu ubwa mailo bukaba na masakamika ya buko. Amafya ya mu bushiku bumo yalilinga kuli ubo bwine bushiku.”—MATEO 6:34.

ILYO MUSHILACITA ICILI CONSE MULETALA MWATONTONKANYAPO SANA.

“Ukulingulula kukakucingilila, ukwiluka kukakulinda.”—AMAPINDA 2:11.