“Ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse.”—ABENA ROMA 5:12.

Ilyo Lesa abumbile abafyashi besu aba kubalilapo Adamu na Efa, bali abapwililika. Na kabili alibapeele icifulo icisuma ica kwikalamo ico baleita ukuti ibala lya Edeni. Abebele ukutila kuti balya ifisabo fya ku miti yonse iyali mwi bala, ukufumyako fye ifisabo fya ku muti umo. Na lyo line, Adamu na Efa balibembukile Lesa ilyo baliile ifisabo fya ku muti uo babaleseshe ukulyako. (Ukutendeka 2:15-17; 3:1-19) Ilyo bakeene ukumfwila Lesa, alibatamfishe mwi bala lya Edeni kabili balitendeke ukucula. Mu kuya kwa nshita, balikwete abana kabili nabo bene balecula, balekota no kufwa. (Ukutendeka 3:23; 5:5) Icalenga tulelwala, ukukota e lyo no kufwa ni co na ifwe tuli bana ba kwa Adamu.

“Icalo conse calaala mu maka ya mubifi.”—1 YOHANE 5:19.

“Umubifi” uo ili lembo lyalandapo ni Satana. Satana ni malaika wabipa uwapondokele Lesa. (Yohane 8:44; Ukusokolola 12:9) Mu kuya kwa nshita, bamalaika na bambi balipondokele Lesa no kuba ku lubali lwa kwa Satana. Aba bamalaika babeta ukuti ifibanda. Ifibanda filabomfya amaka ayo fyakwata pa kuti filufye abantu no kulenga belaumfwila Kabumba. Filalenga abantu abengi ukulacita ifyabipa.  (Amalumbo 106:35-38; 1 Timote 4:1) Satana ne fibanda fyakwe balatemwa sana nga tulecula.

“Ico umuntu alebyala, e co akalobolola.”—ABENA GALATIA 6:7.

Ilingi line icilenga tulecula, ni co twalipyana ulubembu kabili Satana e uteka icalo umo twikala. Na lyo line, inshita shimo ifyo abantu bacita filalenga balecula. Cinshi twalandila ifyo? Nga ca kuti bacita ifyabipa nangu tabapingwile bwino pa fintu, balakwata amafya. Na lyo line, umuntu nga alecita ifisuma ifintu filamuwamina. Ku ca kumwenako, umulume kabili umufyashi uwaba ne cishinka, uubombesha kabili uwatemwa ulupwa, alalenga ulupwa lwakwe luleba ne nsansa. Lelo uwatemwa ifyangalo fya kushitikapo, uukolwa sana ubwalwa nelyo umunang’ani alalenga ulupwa lwakwe ukuba ulupiina. Kanshi calicindama ukuti tulecita ifyo Kabumba wesu atweba. Afwaya ukuti ifintu filetuwamina no kuti tuleba no “mutende uwingi.”—Amalumbo 119:165.

“Mu nshiku sha kulekelesha . . . , abantu bakaba abaitemwa, abatemwa indalama, . . . abashumfwila abafyashi babo, . . . abashailama, abankalwe, abashatemwa ubusuma.”—2 TIMOTE 3:1-5.

Pali ino nshita, abantu abengi bacita fye ifintu nge fi fine ili ilembo lyalanda. Ifyo bacita filalenga twashininkisha ukuti tuleikala mu “nshiku sha kulekelesha.” Baibolo ilanda no kuti mu nshiku sha kulekelesha mukaba inkondo, ifipowe, ifinkukuma ifikalamba e lyo na malwele. (Mateo 24:3, 7, 8; Luka 21:10, 11) Ifi filalenga abantu abengi balecula e lyo no kufwa.