IFYO ABANTU BAMO BALANDA

Abantu balalanda ifyalekanalekana pa myulu e lyo ne co yabelako. Natulande pa fya kumwenako:

• Abantu abengi abatila Bena Kristu balisumina ifyo icitabo ca New Catholic Encyclopedia cilanda ukuti umuulu “cifulo uko abantu abalungami abafwila muli Shikulu baya.”

• Bentzion Kravitz, Shimapepo umuYuda, alandile ukuti abaYuda balalanda sana pa bumi bwa muntu ilyo acili pano calo ukucila ukulanda pa ficitika nga afwa. Na lyo line, alandile no kuti “umuntu nga aya ku muulu alaya mu kusangalala sana kabili alamona ukuti napalama sana kuli Lesa ukucila ifyo aali ilyo ali pa calo.” Lelo ba Kravitz balandile no kuti “nangu ca kuti abaYuda balisumina ukuti kwaliba imyulu, Torah (amabuuku ya mafunde) tayalandapo sana.”

• AbaHindu na baBudha basumina ukuti kwaba imyulu iingi. Batila umuntu alabala aya ku muulu, lyena alafyalwa cipya cipya pano calo nelyo ukuya ku myulu imbi iyacila pa myulu ya kubalilapo.

• Abantu bamo bena balakaninina fye fyonse ifyo aba mu filonganino fyamapepo balanda pa myulu.

IFYO BAIBOLO ISAMBILISHA

Muli Baibolo, ishiwi lya kuti “umuulu” lyalikwata ubupilibulo ubwingi. Ku ca kumwenako:

• Pa Ukutendeka 1:20, Baibele ya Mushilo itila, Lesa abuumbile ‘ifyuni ifipupuka pe samba lye ulu lya muulu.’ Pali ili ilembo, ishiwi lya kuti “umuulu” lilosha kuli uyu wine umuulu tumona na menso.

• Pali Esaya 13:10, Baibolo ilanda pa “ntanda sha mu muulu na mabumba ya shiko.” Ishiwi lya kuti “umuulu” pali ili ilembo lilosha ku myulu umwabe intanda.

• Baibolo ilanda pa cifulo uko Lesa aikala ukuti ni “ku muulu” kabili ilanda no kuti kwaliba “bamalaika . . . mu muulu.” (1 Ishamfumu 8:30; Mateo 18:10) Ishiwi lya kuti “umuulu” pali ili ilembo talilosha ku cintu icamampalanya fye, lelo cifulo ica cine cine. *

“Moneni ukufuma mu muulu no kumona ukufuma mu bwikalo bwenu ubwatumpuka, ubwa mushilo kabili ubwayemba.”—Esaya 63:15.

Baibolo taisambilisha ukuti icalo cifulo apo tulingile ukwikala fye pa nshita iinono ilyo tulelolela ukufwa no kuya ku muulu. Baibolo yalilanda ukwabula no kupita mu mbali ukuti ilyo Lesa abuumbile abantu, talefwaya ukuti balefwa. Tontonkanyeni pali ifi:

• Lesa aebele abantu ba kubalilapo ati: “Fyaleni, fuleni, kumaneni pe sonde.” (Ukutendeka 1:28) Lesa abuumbile abantu ukuti baleikala pe sonde umuyayaya. Abantu ba kubalilapo baali fye no kulafwa nga ca kuti bakaana ukumfwila Lesa. Ku ca bulanda balikeene ukumfwila Lesa.—Ukutendeka 2:17; 3:6.

• Filya abantu ba kubalilapo bakeene ukumfwila Lesa, fyalengele bena e lyo na bana baali no kukwata balefwa. (Abena Roma 5:12) Bushe ici calolele mu kuti bakatwalilila fye ukulafwa?

• Baibolo itila “tulelolela imyulu ipya ne sonde lipya ifyo Lesa alaya.” * (2 Petro 3:13) Lesa akabomfya Ubufumu bwakwe, pa kuti lino isonde likawame na kabili. Baibolo ilanda no kuti “imfwa tayakabeko na kabili.” (Ukusokolola 21:3, 4) Bushe aya mashiwi yalanda pa fikacitika ku muulu nelyo pano calo? Nga twalanda ukuti icintu ‘tacakabeko na kabili,’ ninshi e ko cali pa kubala. Lelo ku muulu takwatala akuba imfwa. Kanshi kuti twatila ili ilembo lilanda ku fikacitika pano pene pe sonde, apo Lesa afwaya ukuti tuleikala kabili apo tufwaisha ukulaikala na bantu abo twatemwa. Baibolo ilanda no kuti abafwa bakabuuka kabili bakatendeka na kabili ukwikala na balupwa lwabo ne fibusa.—Yohane 5:28, 29.

Abantu abengi balatemwa sana nga basambilila icine pa fyo Baibolo ilanda pa myulu. Ku ca kumwenako, ba George, abaali ba Katolika, batile: “Nalitemenwe sana ilyo nasambilile ifyo Baibolo isambilisha ukuti tukekala pano calo umuyayaya. Nalimwene ukuti ifyo nasambilile fyali fya cine.” *

“Imyulu yena, myulu ya kwa Yehova, Lelo icalo apeela ku bana ba bantu.”—Amalumbo 115:16.