Bushe Kuti Mwa-asuka ici Cipusho?
Mulandu nshi abaume abashali bena Israele babelele abashilika ba Mfumu Davidi?
PA BAUME abali abashilika ba Mfumu Davidi abashali bena Israele pali Seleke umwina Amone, Uria umwina Hiti, na Itma umwina Moabu. a (1 Imila. 11:39, 41, 46) Na bambi abali abashilika ba kwa Davidi “bena Kerete, abena Pelete, na bena Giti.” (2 Sam. 15:18) Cimoneka kwati abena Kerete na bena Pelete bali lupwa lumo lwine na baPelishiti. (Esek. 25:16) Abena Giti batuntwike mu musumba wa Gati mu calo ca baPelishiti.—Yosh. 13:2, 3; 1 Sam. 6:17, 18.
Mulandu nshi Davidi aingishishe abaume abashali bena Israele ubushilika? Alicetekele ukuti bali ne cishinka kuli ena. Ne cacindama sana ca kuti bali ne cishinka kuli Yehova. Ku ca kumwenako, icitabo citila The New Interpreter’s Dictionary of the Bible cilanda pa bena Kerete na bena Pelete ukuti: “Balitwalilile aba cishinka kuli Davidi na lintu ifintu fya-afishe sana ilyo aleteka.” Bushe balangile shani ukuti bali ne cishinka? Ilyo “abaume ba kwa Israele bonse” bashile Imfumu Davidi no kutendeka ukukonka “icinangwa ca muntu, ishina lyakwe ni Sheba,” abena Kerete na bena Pelete bena batwalilile fye ukukonka Davidi kabili balimwafwile ukulwisha Sheba uwamupondokele. (2 Sam. 20:1, 2, 7) Inshita imbi, Adoniya umwana wa Mfumu Davidi alefwaya ukupoka ubufumu. Lelo abena Kerete na bena Pelete balitwalilile ukuba aba cishinka kuli Davidi kabili balyafwilisheko pa kuti Solomone bamubike pa bufumu, pantu e o Yehova asalile ukupyana Davidi.—1 Isha. 1:24-27, 38, 39.
Umwaume umbi uushali mwina Israele uwatwalilile fye uwa cishinka kuli Davidi ni Itai umwina Giti. Itai na baume bakwe 600 bali ku lubali lwa Mfumu Davidi, ilyo Abishalomu umwana wa kwa Davidi apondweke no kutendeka ukulaongola imitima ya bena Israele pa kuti bamubike pa bufumu. Davidi pa kubalilapo aebele Itai ukuti apo ali wa ku calo cimbi, talingile ukulwako. Lelo Itai ayaswike ati: “Na pali Yehova na pali shikulu imfumu, ukukaba shikulu imfumu, uko kwine e kukaba umubomfi wenu, ninjiteyanya no kufwila pamo na imwe!”—2 Sam. 15:6, 18-21.
Itai ali uwa cishinka kuli Davidi uo Yehova asubile ukuba imfumu
Nangu ca kutila abena Kerete, abena Pelete na bena Giti tabali bena Israele, balishibe ukuti Yehova e Lesa wa cine, no kuti Davidi e o Yehova asalile. Davidi afwile aletasha sana pali aba abaume abali ne cishinka abalemwafwilisha!
a Ifunde lya kwa Lesa ilyalembwa pa Amalango 23:3-6 lyalileseshe abena Amone na bena Moabu ukwingila mu lukuta lwa bena Israele. Nomba cimoneka kwati ili ifunde lyalelanda pa mwina fyalo ukusanguka umwina Israele, talyaleseshe aba ku fyalo fimbi ukwikala na bena Israele nelyo ukwampana nabo. Moneni Insight on the Scriptures, Volyumu 1, ibu. 95.
