IFYO ABANTU BALANDA

Bamo batila abantu balikwata insambu sha kubomfya inama mu nshila yonse iyo balefwailamo. E lyo bambi nabo batila abantu balingile ukulasunga inama kwati bantu banabo.

• Umuntu umo uwaishibikwa uulanda sana pa nsambu sha nama atile, inama “shalikwata insambu kanshi tatufwile ukulashimona kwati fipe ifya kusangilamo fye ubunonshi.” Kabili atile: “Tatufwile ukumona inama nge cipe.”

• Icintu cimo icacitike ico abengi bamona ukuti cena calicilile mu cipimo, ni cilya Leona Helmsley acitile. Alembele ukuti nga afwa imbwa yakwe bakaipeele indalama amadola ya ku America 12 milioni kabili nga yafwa bakaishike apo bakamushika.

Tontonkanyeni pali ici: Bushe mufwile ukulasunga shani inama?

IFYO BAIBOLO ILANDA

Kabumba wa bumi, Yehova Lesa aebele abantu ‘ukulateka isabi lya muli bemba ne fipupuka mu lwelele na fyonse ifya mweo ifikulika pe sonde.’ (Ukutendeka 1:28) Kanshi Lesa amona abantu ukuti balicila inama.

Cimbi icilanga ukuti abantu balicila inama ni filya icikomo 27 mwi lembo tulandilepo calanda. Baibolo itila, “Lesa abumbile umuntu mu cipasho cakwe, mu cipasho cakwe e mo amubumbiile; umwaume no mwanakashi e fyo ababumbile.” —Ukutendeka 1:27.

Pa mulandu wa kuti fwe bantu twabumbilwe “mu cipasho” ca kwa Lesa, twalikwata imibele ilya ine Lesa akwatako pamo nga, amano, ubulungi, na ukutemwa. Na kabili abantu balikwata imibele iisuma kabili balafwaya no kwishiba Lesa. Nomba inama shena te fyo shaba pantu tashabumbilwe ‘mu cipasho ca kwa Lesa.’ Kanshi inama tashalingana na bantu kabili te kuti tuleshisunga nga filya tusunga abantu banensu.

Nomba bushe ici cilepilibula ukuti abantu balikwata insambu sha kucusha inama? Awe.

• Mu Mafunde Lesa apeele abena Israele abebele ukulashipeela ifya kulya, ukushafwa nga shasanswa, ukushicingilila ku masanso e lyo no kulashileka shatushako.—Ukufuma 23:4, 5; Amalango 22:10; 25:4.

“Ulebomba umulimo obe inshiku 6; lelo mu bushiku bwalenga 7 wilabombamo, pa kutila ing’ombe yobe ne mpunda yobe fituushe.” —Ukufuma 23:12.

IFYO ABANTU BALANDA

Abantu bamo balepaya inama ne sabi ilyo baleangala ifyangalo, balomfwa fye bwino ukonka inama ulubilo no kushipaya. E lyo bambi nabo balanda nge fyalandile Leo Tolstoy umwina Russia uulemba ifitabo, uwatile “tacawama nangu fye panono” ukwipaya no kulya inama.

IFYO BAIBOLO ILANDA

Lesa alisuminisha abantu ukwipaya inama nga ilefwaya ukubacena nelyo nga balefwaya ukupangako ifya kufwala. (Ukufuma 21:28; Marko 1:6) Na kabili, Baibolo itila abantu kuti baipaya inama nga balefwaya ukulya. Pa Ukutendeka 9:3 patila: “Inama shonse isha mweo mukalelya.” Nangu ni Yesu alyafwileko abasambi bakwe ukwipaya isabi ilya kulya.—Yohane 21:4-13.

Nomba Baibolo itila Lesa alipata umuntu onse “uwatemwa ubunkalwe.” (Amalumbo 11:5) Kanshi Lesa tafwaya ukuti tulecusha nelyo ukwipaya inama pa mulandu wa kufwaya fye ukwangala.

Baibolo itila Lesa alicindika sana ubumi bwa nama.

• Baibolo ilanda ukuti ilyo Lesa alebumba ifintu, “apangile inama sha mu mpanga isha pano isonde mu misango ya shiko ne fitekwa mu misango ya fiko ne fikulika mu misango ya fiko. Kabili Lesa amwene ukuti cawama.”—Ukutendeka 1:25.

• Baibolo ilanda ukuti Yehova: “Apeela inama ifya kulya.” (Amalumbo 147:9) Lesa alapeela inama fyonse ifyo shikabila pa kuti shitwalilile ukuba no mweo.

• Davidi imfumu ya bena Israele yapepele ukuti: “Mupususha umuntu ne nama, mwe Yehova.” (Amalumbo 36:6) Ku ca kumwenako, ilyo Yehova aonawile abantu babipa ku Ilyeshi ilyaliko isonde lyonse, apuswishe abantu 8 ne nama isha misango yonse.—Ukutendeka 6:19.

Nga fintu mwamona, Yehova alitemwa inama isho abumbile, kabili afwaya ukuti na bantu bene baleshisunga bwino.

“Umulungami asakamana umweo wa citekwa cakwe.”—Amapinda 12:10.