Aba ku World Wildlife Fund batile, ukufuma mu 1997 ukufika mu 2011, balisangile ifinama ne fimenwa ifingi ifyo bashaishibe ukuti e ko fyaba. Ne fi bafisangile mu ncende iyo beta ati Greater Mekong, umwaba ifyalo pamo nga Cambodia, Laos, Myanmar, Thailand, Vietnam e lyo na mu citungu ca Yunnan, ku China. Pali ifi paali ne fwafwa ilyo beta ati Trimeresurus rubeus. Pa fyo basangile mu 2011 mweka, pali ifimenwa fyalekanalekana 82, ifikulika 21, isabi lya misango yalekanalekana 13, inama sha ku mulundu na pa menshi 5 e lyo ne mitundu ya nama imbi 5.

Inyunshipepala ya The Moscow Times yatile, “mu fyalo fyonse ifya ku Bulaya” muli ubwafya bwa kwiba abantu no kubatwala kumbi. Abanakashi balabashitisha ku bafwaya ukubacenda, abantu balabapatikisha ukubomba incito e lyo balabepaya pa kuti “bashitishe ifilundwa fya mibili yabo.” Abacita amakwebo ya musango uyu balashukila abantu pa mulandu wa bupiina, ubulofwa na pa mulandu wa kuti bamona abanakashi ukuti tabacindama.

Abafwailisha pa fintu basangile ukuti ukutamba sana TV ilingi line kulalenga abaice ne misepela “ukukanaumfwana na bantu bambi.” Ifyo basangile fyalengele balande ukutila kuti cawama abaice “ukulatamba amaprogramu ya pa TV ayasuma pe awala fye limo nelyo yabili cila bushiku.”

Imishi iingi sana iya ku Alaska yabela mu mbali ya mimana kabili iyi mishi ilabunda ku menshi kabili ilonaika pa mulandu wa matipa. Amalipoti yalanga ukuti pa mulandu wa kuti kulakaba sana, amenshi makasa tayapangika, ne ci cilenga imishi ukonaulwa pa mulandu wa mfula ya cimwela.

Umukalamba wa kabungwe kalolekesha pa malaiti, Maria van der Hoeven atile: Nangu ca kuti tulepoosa indalama ishingi sana pa kupanga amalaiti ukubomfya akasuba no mwela fye, “amalaiti yalafumya sana ifiko nga filya fine yalefumya imyaka 20 iyapita.”