“Incito Yapwa”
“Incito Yapwa”
ABAKALAMBA ba ncito balitemenwe sana ba Fred pantu balebombesha sana. * Amano ba Fred bakwete yalengele akampani ukulapanga indalama ishingi nga nshi pa myaka yonse 6 iyo babombelepo. Kanshi bushiku bumo ilyo babetile ku bakalamba ba ncito, ba Fred batontonkenye ukuti balabalundilako amalipilo nelyo ukubasumbula pa ncito. Lelo ku ca bulanda babebele ifyo bashale-enekela ukutila, “Incito yapwa.”
Ba Fred balipapile pa fyo baumfwile. Batile, “Nalefola indalama ishingi kabili nalitemenwe incito nalebomba, lelo mu nshita fye inono ifintu fyalyalwike.” Ilyo ba Fred baile-eba abena mwabo ba Adele ifyacitike, nabo bene calibapeseshe amano. Ba Adele batile, “Naumfwile kwati umulopa ulepongoloka ukufuma mu mubili wandi. Natile, ‘Nomba twalacita shani?’”
Nga fintu mulemona ifipendo ifili pe samba, abantu abengi nga nshi ukuli konse incito ilapwa nga fintu cali kuli ba Fred. Lelo ifipendo fyeka fyeka tafilanga ifyo abali pa bulofwa bacula na matontonkanyo. Tontonkanyeni pa fyo ba Raúl abafumine ku Peru ukuyaikala ku America baumfwile ilyo babafumishe incito pe hotela limo ilikalamba mu New York City apo babombele imyaka 18. Ba Raúl balefwayafwaya incito lelo tabaisangile. Batile, “Pa myaka 30 nalesakamana bwino ulupwa lwandi. Nomba apo ndefilwa ukubasakamana bwino, ndeumfwa kwati shili mwaume.”
Ifyacitikile ba Raúl filetulanga ifyo ciba kubo incito ipwa, incito nga yapwa abantu tabakwata fye ubwafya bwa kusanga indalama epela. Lelo ilingi line cilalenga balesakamikwa. Ba Renée abo abalume babo ba Matthew bali pa bulofwa pa myaka ukucila pali itatu batile, “Natendeke ukuyumfwa kwati nshili kantu. Nga ca kutila taukwete nangu fimo, abantu kuti balekumona fye kwati tapali ifyo uli, kabili mukupita kwa nshita na iwe kuti watendeka ukuimona ifyo fine.”
Bonse abo incito ipwa balasakamikwa, kabili balakwata no bwafya mu mikalile, tabakwata indalama sha kubomfya ishalinga. Ba Fred batile, “Ilyo twakwete indalama tatwaletontonkanyapo ukushita ifintu ifyanakako umutengo. Lelo ilyo incito yapwile, e fyo twatendeke ukushita pantu twalishibe ukuti tufwile ukumemengela indalama twakwete.”
Nomba ilyo mucili mulefwaya incito, mufwile no kulashipikisha amafya ayalekanalekana ayo abantu bapitamo nga bali pa bulofwa. Na kabili kuti cawama mwacefyako ifyakushita. Lekeni intanshi tulande pa fintu fibili ifingamwafwa ukukanasakamikwa ilyo incito yapwa.
[Futunoti]
^ para. 2 Amashina yamo ayali muli fino fipande, te mashina yabo aya cine.
[Icikope pe bula 3]
(Nga mulefwaya ukumona icikope, moneni muli magazini)
Impendwa ya baali pa bulofwa mu 2008 mu fyalo fye fitatu
Japan 2,650,000
Spain 2,590,000
United States 8,924,000